¹ Mumalolo ndabulira omuundu nalomaloma muidoboosi ikhongo mukhekalu khubalia bamalaika abali nende echibakuli saba naboola "Rula ano , ochie ochukhe musialo ifini ili muchibakuli saba - Bino binakere abaandu basande okhuba Nasaye ali nobusinyifu nabo" ² Kho malaika wamberi yachia nachukha khusialo ebiali mubakuli yaye. Akarulirao, ebifwiimba bimaanu ebichuuni biarula khubuli ulia yesi owali yafukirira esibalikho sieisolo okhwandikwakho amera kayo - abo abali nibenamire esifwanani sieyisolo ³ Malaika wokhubiri nachukha munyanja ebiali mubakuli yaye, ni niyakhachukha ibakuli yaye amachi kakalukhana nikekhola amabanga arali sinamabanga malamu, kali nga mabanga komundu mufu, ne esilonge siosi esiali munyanja siafwa ⁴ Khandi malaika wo khudaru nachukha mumialo nende echisebere chamachi ebiali mubakuli yaye, niya khamala okhuchukha okhurula mubakuli yaye, amachi komumialo nende chisebere kakalukhana amabanga. ⁵ Ndabulira malaika owali nende obunyala khumachi naboola khu Nasaye " Ewe Nasaye oliwo khandi buli lwosi obechangao. Newe mutakatifu newe mukhalaki mulayi wabaandu. ⁶ Abaandu bang'aanya khurula khwewe, beera abaandu bao batakatifu nende abanabii, Kho oyera okhubaberesia sinyasio khulwa okhubaba amabanga okhung'wa sino nisio esibakhoyera. ⁷ Nimbulira omuundu undi mubwali nakalusia "Kario Omwami Nasaye ewe oruka buli sindu okhalakiranga baandu mubulungifu nende obwadieri" ⁸ Malaika wokhune yesi nachukha khuliuba ebiali mubakuli yaye, yaberesibwa obunyali obwokhukhola eliuba okhuba nende abubafu mbwe linyalirwe okhulasia abaandu khu muliro. ⁹ Kho abandu bayia muno nibaboola amamaanu khunasaye okhuba yali ndobunyali obwokhubakhola basandisibwe mungira chino arali basiri bakhaya okhwekalukhania khurula khubiima biabwe ebibi nibakhaya okhumufumia. ¹⁰ Malaika wakharano yachukha khusisaala sioburuki sieisolo ebiali mubakuli yaye, esiirima siengira ewa isolo irukanga. Ne nibaluma echinimi chiabwe khulwa obuchuuni ¹¹ "Banyeka Nasaye orukanga mwikulu okhuba ebifwiimba biabwe biali ndobuchuuni bungi ne bakhaya okhulekha obubi bwabakholanga. ¹² Malaika wakhasasaba yachukha mu mwalo kwa Ephrato ebiali mubakuli yaye. Amachi komwalo okwo kakhama okhuula abaruki bebialo biebwe banyalirwa okhukhalania halala nende abamayie babwe. ¹³ Nindola emioyo mimaanu ekifwanana nende amakhere. Mulala kwarula mumunwa kwa okuyukha mulala khurula mumunwa kwe isolo nomulala khurula mumunwa kwa munabii wobubacha. ¹⁴ Emioyo ekio kiali ekiebikhieno ekinyala okhukhola ebiamakana. kiarula nikichia khu baruki bibialo bioosi okhubuusia amayie kabwe, Kano kali kario mbwe banyale okhulwana indalo iria indobole eya Nasaye wamaani yakhabe nasandianga abasuku baye. ¹⁵ Lingers njicha ngomwibi. noweikhabi oyo oba meso, nalinda chingubo chiaye, areecha yakenda siekenye,many balola echisoni chiaye. ¹⁶ Nakibuusia kioosi alala abundu alangwa mulweburania mbwe Amagedoni. ¹⁷ Malaika wa saba yesi nachukha mumiayaka akali mubakuli yaye. Akarulirao omundu yabola muidoboosi ikhongo khurula khusisaala sioburuki abundu andakatifu "Ebikha bia Nasaye okhusandia abakhayi biulire" ¹⁸ Olwa Malaika yamalana nende ibakuli yaye, olumieso lwamiesukha nikhuba nende okhududuma nende okhwadulukha khwelikulu, esialo nisirenga. Khwalikhurengerekha khwamaani muno khukhira okhwaliwo khurula abaandu nibachaaka khumenya khusialo. ¹⁹ Akarulirao, elidokho likhongo elio nilikabukhanamo ebimeka bidaru. Nasaye khandi yasasia amadokho mubialo bindi. Nasaye siyebirira mbwe abaandu ba Babeli Bali bakhola obwononl bungi. Kho yabang'wesia esikombe sieifini esiababa obuchuuni bungi khulwokhuba yasinyikha nabo. ²⁰ Okhulondana nende okhurengerekha khwesialo, buli siginga siakhamao nachio chinguli nichikwalala. ²¹ Amakina makhongo keifula, akayera obusiro chiratili amakhumi kadaru nende chidaru karula mumalesi nikakwa khubaandu. Abaandu banyeka Nasaye okhubeera yali nabasandisie mungira yobuchiuuni khuba amakina Kali makhongo muno.