¹ Esindu sindi sikeni nisilolekhana mumalesi. Nindola malaika saba, ebemirimo kiabwe kiali okhusandia bala baandu bakhayi muchingira saba echikabukhane. Luno nolumalirikha Nasaye okhusandia baandu mungira ino, okhuba biakhekesie mubwichufu elirima liaye ngolwa liri. ² Ndalola esiafwanana nende inyaanja eyakasibwa nga igilasi yisasanisibwe nende omuliro. Khandi siesi ndalola abaandu abali bakhirire isolo nende esifwanani siayo munamba eyemerere eliira lie isolo. Bali bemere indulo weinyaanja eyali indafu ngeigilasi. Ne Bali nibadirire ebinaanda ebia Nasaye yababeresia. ³ Bali nibembaanga olwimbo ngolwa Musa omukholi wa Nasaye yemba muchindalo chiabira. Bemba luno okhufumia omwana we likoondi mungira ino:"Omwami Nasaye, orukaanga ebiindu bioosi, ebiokhola nibia maani khandi biukisia! Buli lwoosi okhola mubulungifu nende mubwadieri. Oli Omwami buli lwoosi khubialo bioosi. ⁴ Ewe Nasaye, Buli muundu anakhuria nende khukhuba luyaali okhuba ewe weng'ene oli mutakatifu. Ebialo bioosi bineecha nibiinama imberi wao, okhuba wekesia mbwe wakhalakira buli mulala mungira ingololofu. ⁵ Olunyuma lwa ako ndalola ikhekalu yo mwikulu niyikukhe eweliyema litakatifu liali. ⁶ Malaika saba ebemirimo kiabwe kiali okhusandia abaandu bakhayi mungira saba echikabukhane barula abuundu andakatifu. Abamalaika bali befwalire chingubo chindafu, echiamanginiesi; nibefwalire emisipi kie idakhabu mubirifu biabwe. ⁷ Mulala khubilonge bine yaberesia buli mulala khu malaika saba eyibakuli ye idakhabu eyichule ifini yemerera Nasaye, omenyere buli lwoosi, yali nobusinyifu bungi khubaandu abamukosera khandi achia okhubasandia. ⁸ Ikhekalu yechusibwamo nende omwosi okwekesia okhubao khwa Nasaye wo luyaali khandi owa maani koosi. Abulao yesi owanyalirwa okhuwingira mukhekalu okhuula nga malaika saba bali nibamalire okhusandia abaandu besialo muchingira saba echiaukhane.