¹ Khandi nindola omwana we likoondi niyemere khulugulu lwa Sayuni mu Yerusalemu. Alala ninaye bali abaandu 144,000. Eliira liaye nende elia Samwana kali nikaandikirwe khubweni bwabwe. ² Ndabulira esioka khurula mwikulu, esiabulirikhana ngo khukwa khwa maachi mangi. kose okhwadulukha khukhongo. Khandi nibibulirikhana nga baandu baangi abali okhubaanga ebinanda. ³ Abaandu 144,000 bali nibembaanga olwimbo luyakha nibemere imberi we sisala sio buruki, imberi we bilonge bila bine, khandi imberi wabakhulundu. Abaandu bala 144,000 bong'ene, nibo abo mwana we likondi yanunula okhurula mubanasialo, bakheke olwimbo olwo. Abulao oundi owakheke olwimbo olwo. Abo 144,000 nibo abo ⁴ abarasasanisibwa mubumaanu nende abakhasi, okhuba sibakhola obuyeyi. Nibo abo abalondanga omwana we likoondi wosi owaba nachia. Bano nibo abo mwana we likoondi yanunulira Nasaye khurula mu bamenyeranu besialo; nibo bala abo mwana we likoondi yaberesania khu Nasaye nende ye omwene. ⁵ Abaandu bano sibabolakho obubacha khaba, khandi sibakholakho akobuyeyi. ⁶ Khandi nindola malaika undi naburukha akari we salo nende likulu. Yali nareranga amakhuwa makeni ka Nasaye malayi akobulamu buralibwayo khusialo, mbwe anyale okhubalandasiria abaandu bamenya khusialo. Yakhalandasie khu buli sialo, oluya, olusungo, nende abaandu. ⁷ Yabola mulidobosi likhoongo ari, " Muwechoomie Nasaye nende khumufumia okhuba nebikha bia ye khukhalakira buli muundu! Mumwinamire okhuba niye owaloonga likulu, esialo, nende echisebere chiamaachi." ⁸ Malaika undi- Owokhubiri- Yabmuloonda naboola ari, " Elidokho limaanu lila elia Babeli limalire Okhusasibwa! Babeli yakera abaandu be bialo bioosi nibaambana ninaye mubwekoombi bwo buyeyi. Babeli ifwanana nende omuundu omesia owasie khumalwa maangi! ⁹ Malaika undi, owo khudaru, yeecha lunyuma, naboola mulidoboosi likhoongo ari, " Nikaba mbwe abaandu benamira isolo nende sifwanani siayo, kose bafukirire esilolero siayo sirebwe khubweni bwabwe kose khumukhono kwabwe, ¹⁰ Nasaye anasinyikha ninabo, ne oburima bwaye bunaba nga amalwa malulu akaanabakhola bangwe. Anabasandia mumuliro mululu imberi wa bamalaika baye batakatifu nende imberi wo mwana we likoondi. ¹¹ " Omwosi khurula mumuliro kusandia kunadumukha buli lwoosi. Nasaye anabasandia okhuchiririra, sideere nende siro. Kano niko akakhekholekhe khwabo abenamira isolo nende sifwanani siayo kose abafukirira bandikwekho eliira liayo." ¹² Khu Kario abaandu ba Nasaye, abo abafukirira aka Nasaye alaka nende abesika Yeso, bakhoyere bachiririre okhuria nende okhumwesika. ¹³ Ne nimbulira idoboosi khurula mwikulu niibola yiri, " Yandika kano: Nibeyikhabi abafwa bulano okhuchiririra nibambanire nende Omwami." Roho wa Nasaye aboola ari, " Kario nibakhamala khufwa, sibakhabirire khandi mukhusanda. Arali, bakhabulukhe, khandi buli muundu yakhamanye amalayi kabakhola. ¹⁴ khandi nindola esindu sindi siukisia. Liali elilesi lilafu, ne khulilesi elio omuundu yali yekhalekho oufwanana nende omwana wo muundu. Yali afwalire olusiimbi lweidakhabu khumurwe kwaye. Mumukhono adirire ingeso injoki. ¹⁵ Khandi malaika undi narula mukhekalu mwikulu; mudoboosi ikhoongo, naboola ari, oyo owali yekhale khuliresi, " Ebikha biakhola okhukesa yimwo khusialo, kesa nende ingeso yao okhuba eyimwo yilabire." ¹⁶ " Ne ula owali yekhale khulia yaucha ingeso yaye khusialo, nakesa esialo. ¹⁷ Malaika undi narula mukhekalu mwikulu. Yesi yadiira ingeso injoki. ¹⁸ Khandi malaika undi yesi narula mubwali. Oyo okhola emirimo khumuliro ko khubwali. Yaboola mudoboosi ikhoongo khu oyo owali nadirire ingeso, " we khonyere ingeso yao okhukhenga amasaga kemisabibu mumikanda khusialo! Omale obusie masaga kemisabibu alala okhuba ebiamo biakio biengere." ¹⁹ Kho malaika naira ingeso yaye khusialo, nabusia emisabibu musiruli sikhoongo ewa Nasaye lirima yakhasandie abakhiamu. ²⁰ Nasaye yaswaka eisabibu musinu erwanyi we lidookho, ne amabaanga nikarula! Amabaanga nikakhulukusia omukhula musiro okhuula esioka sie chifarasi okhuula burambi bwe chimaili echimia chibiri.