¹ Ndamala nindola isolo nirula munyanja. Yali nende chinjika. ekhumi nende emirwe saba. Khuchinjika chiayo khwali nende chisiimbi ekhumi ne khumirwe kiayo khwali nende amakhuwa ka khumulekeresia Nasaye. ² Isolo ino eyandalola yali kori ing'we. Makulu kayo kara kori akerinani, naye omumwa kwaye khwari kori kwa idalangi. Okuyukha kulia nikwebelesia amaana, naye khusisala sio buruki nende bunyala bwa maani lukali bwo khuruka. ³ Omurwe kwa isolo ndala khu nichio kwabonekhana khuba nende likonjo likhongo eria kha khoyera okhufwa khwayo. Arali likonjo liayo liaona, mani sialo siosi ni siukisibwa nisilonda isolo. ⁴ Khandi benamira kuyukha okhubera kwa beresiania obunyala isolo iria. Nibenamira isolo yosi, khandi bachiririra, ni wina kori isolo? khandi wina onakhayana nayo? " ⁵ Isolo niberesibwa omunwa mbwe ibole amakhuwa ka okhwefumia nende amanyeko. Yafukirirwa okhuba nende obunyala khulwa emiosi amakhumi kane nende kibiri. ⁶ Kario isolo yekula omunwa kwayo okhulolamaloma amanyeko khu Nasaye, yanyeka lira liaye, abandu wayali niyamenya nende abali nibameya mwikulu. ⁷ Isolo yafukirirwa okhukhola eliiye nende abasubira nende khubakhira. Khandi yaberesibwa obunyala akulu wa buli imbia ya abaandu, lulimi, nende sialo. ⁸ Boosi abamenya musialo banainamira buli sia mulala owa elira liaye lisiandikwa, khurula okhulongwa khwa esialo musitabo esie obulamu, esiri mbwe ne sia omwana we likondi owasiinjwa. ⁹ Nikali mbwe yesi yesi ali nende okhurwi abulire. ¹⁰ Nikali mbwe omulala khunibo yabukulibwa mumboye, yaaboywa, ne khandi mumboye anachia. nikabu mbwe mulala khunibo yeera nende olupanga, khulupanga aneerwa. Kuno no mulango kwa omulembe nende okhwesimirisia nende obusubiri khubala abali abatakatifu. ¹¹ Khandi nindola isolo yindi niyiicha orula musialo yali eya chinjika chibiri kori echielikondi nayo nilomaloma kori injukha. ¹² Yekesia bunyala bwoosi khu isolo iria eya mberi imberi wayo nende khukhola musialo nende balia abali bamenya nibailama isolo iria eyamberi eyelokonjo liayo liwonere. ¹³ Yakhola akamangalimwa akamaani, kata yakhola omuliro kwekha musialo khurula mwikulu imberi wa baandu. ¹⁴ Khandi khu lwe silolero yafukirirwa khukhola, nibabacha abo abekhala musialo nibaboolera okhureresia esifwanani khulwa esiriibwa sia isolo yali iumisibwa nende olupanga, arali yachiririra okhumenya. ¹⁵ Yafukirirwa khurusia emiuya khurula musifwanani sia isolo iria mbwe sifwanani sinyole okhukhola maani okhukhola balia boosi abakhaya okhwinamira isolo beerwe. ¹⁶ Khandi yaika buli sia mulala, obula bukusi nende owa maani, omuyinda nende omumani, omulekhule nende omuboye, khunyola esibalikho khu mukhono musacha kose khubweni. ¹⁷ Biali mbwe khasi binyalikhana khubuli omundu okhukusia kose okhukula arali oli nende sibalikho esia isolo. Ne ino ni inamba yali yamerere eliira liaye. ¹⁸ Lino lidakha amakesi. Nikali yesi yesi ali nende obumanyirisi, mulekhe akhole obubali bwe inamba ya isolo. Okhubeera ne inamba ya omuundu. inamba yaye ni 666.