¹ Ndamala ndalola malaika uundi omukhoongo niyeekha asi khurula mwikulu. Yali naboyerwe mulilesi, ne khwali nende oluyiingi lwe yifula akulu wo murwe kwaye, obweni bwaye bwali kori nga eliuba ne amakulu kaye kali kori nga echisiiro chio muliro. ² Yali nadirire sitabo sididi mumukhono kwaye esiali nisifunulwe, naye yara khukulu khwaye khuluungi akulu we yinyaanja ne okhukulu khwaye khukaada akulu we liloba. ³ Yamala niyayula mudoboosi ya akulu kori nge idalangi idiriranga, ne ebikha ebiayarusiria idoboosi, miadulukho saba kiadulukha. ⁴ Ebikha bie miadulukho saba kiaduduma, ndali ambi khwandiika, arali ndabulira idoboosi khurula mwikulu niyiboola yiri, " Biikha libe elio bwekisi sila esie miadulukho saba kibolere. Oraandika khaba." ⁵ Olunyuma malaika ula owandabona niyemere akulu we yinyaanja nende khusialo, yakingula mukhono kwaye akulu mwikulu, ⁶ nende khwelaama khu ula owamenya bumeri nende bumeri- owalonga likulu nende bioosi ebilimo, esialo nende bioosi ebilimo, nende inyaanja nende bioosi ebilimo: " Khasi khuchia khuba nende okhukhiinda. ⁷ Arali inyaanga yila, ebikha bia malaika wa saba achia khuba ambi okhuuba olwika lwaye, niwo owa elio bwekisi lia Nasaye lichia khuba liolerere, kori ngolwa yasalasia khu barumikhi baye abanabii" ⁸ Idoboosi yandabulira khurula mwikulu yambolera khandi yiri, " chia , obukule sitabo sididi esiafunulwa esili mumukhono kwa malayika owema akulu we yinyaanja nende akulu we liloba. ⁹ Ndamala ninjia khu malaika nimubolera mbwe amberesie sitabo sididi. Yambolera ari, "Bukula sitabo mani osilie, sinakhola inda yao yibe nende buchuni, arali mumunwa kwao sinanyunyula kori ngo bukhi. ¹⁰ Ndabukula sitabo sididi mumukhono kwa malaika, ne kori ndasilia, sianyunyula kori ngo bukhi mumunwa kwange, arali olunyuma lwo khulia, inda yange yali nende buchuni. ¹¹ Olunyuma chidoboosi chindi chiambolera chiri, " Okhoyere khurusia bunabii bwe likhuwa lia Nasaye khulondana nende abaandu bangi, chisungo, nende abaruki."