¹ Nobwadieri elilakano eliamberi liali nende amalaako akobukholi nende obwaali bwo bunasaaye musialo. ² Okhuba mukhuchaaka inyuumba yemekhebwa omwalimo esiemero sieitara, imesa, omugaati kwesilorero ebilangwa esimeeka esia abuundu andakatifu. ³ Ne inyuuma weipasia yokhubiri khuli nende esimeeka muliyeema esilangwa mbwe andakatifu wobutakatifu. ⁴ Esiali nende siuchisirio sia idakhabu nende elisanduku lielakano liafunikhwa nende idakhabu echimbeka chioosi. Mubwene omwo mwalimo indamu eya idakhabu niirimo esiakhulia sia manna, indaukhi ya Haruuni eyasebukha, nende amakina kelilakano. ⁵ Akulu wasio amakerubi koluyaali kafunikha esisala siesisa, esiakhuranyala okhulomalomerakho bikha bino muburaambi. ⁶ Khukario ebiindu bino nibiakhamala okhurebwao abakukhaani bengiranga muikhekalu bulilwosi musimeka sieimberi nibosirisia obukholi khu Nasaye. ⁷ Naye muyokhubiri yengirangamo omukukhani mukhoongo yeng'ene, lulala khumwaka nali nende amabaanga akayamaliranga omusango kwaye halala nende amabi kabaandu baandi. ⁸ Roho Mulafu yekesia mbwe ingira ilia eyokhwingira andakatifu wobutakatifu isiri khwikukha nikaba mbwe ikhekalu ikhale isiiriwo. ⁹ Sino siali esimanyiro khubikha bino, ebiaanwa nende ebisaakhiro bia banasiaalo sibialabiangia ulia orusisie nende okhukhola amapaaro kaye okhuba amolerefu. ¹⁰ Bino bialondana sa nende chinyama nende ebiokhung'wa, nende khwosibwa khukabukhane mumikholo kiesinamuundu, ekia badwikhibwa okhuula ebikha biobwekalukhasi. ¹¹ Naye Yeso ulia omukukhani mukhoongo webiindu bilayi biicha, khubirira munyuumba ilia ikhoongo khaandi eyulilire, eirakholwa namakhono komuundu, yila iralondana nende esiumbakhe sino. ¹² Ne khasi nikhulwa amabaanga kechimbusi nende ebimoosi, arali akaye mwene, yengira abuundu andakatifu lulala lwong'ane narunyoolera obununuli buralibwayo. ¹³ Ne nikaba mbwe amabaanga kechisurusi nende chimbusi alala nende amakokhe akeimoosi akaanywangwa, okhulabia balia abasiri okhulabisibwa emibiri, ¹⁴ sinokhukhirao muno amabaanga ka Kiristo oweyama omwene khubirira murokho wobulamu yeyana esisakhiro esirali nelikoondo khu Nasaye khulwo khulabia, amapaaro khurula mubikhole bifu, bakholeere Nasaye omulamu? ¹⁵ Khu liene lino ye nomwaambaani owelilakano liyaakha, okhubirira muliifwa khulwokhununula abo abaali abelilakano lieimberi khurula muchimbi chiabwe, balia abalangwa banyoole esisubisio siobulaamirwe buralibwaayo. ¹⁶ Owe lilakano lio bulaame liri, khaandi bikhooyera abeo oyo ofwira lilakano elio. ¹⁷ Khulwo khuba elilakano liobulamirwe liri nende amaani khubafu, ne libula amaani khuulia osiiri mulamu. ¹⁸ Kata eliarangira liosi liachaakwa nende amabaanga. ¹⁹ Olwa Musa yasomera abaandu ebilagiro bilondana nende malaako, yabukula amabaanga akebimoosi, nende chimbusi, nende amaachi , nende obwoya bwakhanyu, alala nende Hisopo niyanya khusitabo nende abaandu boosi. ²⁰ Naboola ari, ''Kano namabaanga kelilakano lia Nasaye yabambanisiriamo.'' ²¹ Khaandi niyaanya amabaanga khu liyeema lila alala nende ebiindu bioosi biomukhekalu ebie khonyirwangwa mubukholi. ²² Ambi buli siindu siosibwanga nende amabaanga, khulondana nende elako, khulwo khuba obubi sibwakharusibwao amabaanga nikaredikhe. ²³ Khu kario bienyekhana ebilolero biebiindu biomwikulu biosibwe birio, nende ebisakhiro biebisoolo. Arali ebiindu biomwikulu biene biamala bilabisibwe nende ebisakhiro ebili bilayi khukhirao. ²⁴ Kirisito siyengira andakatifu eyakasibwa nende amakhono, esiiri sifwanani siadieri, arali mwikulu yene mbwe alolekhe imberi wa Nasaye khulwa efwe fweesi. ²⁵ Sibiri mbwe yerusienge nga esisakhiro buli sikha, muisaambo ngeyabakukhani bakhoongo bengiranga andakatifu buli mwaka nende amabaanga kesiindu sindi. ²⁶ Biakhabeere birio, khwakhabeere okhusandisibwa khungi muno khurula mukhuchaaka khwesialo. Arali yerusia omwene lulala ngesisakhiro khulwo khumalao echiimbi chesialo. ²⁷ Khu kario abaandu barerwao okhufwa lulala, nesilondakho nokhukhalakirwa, ²⁸ kario Kirisito yarusibwa okhukinga obwonooni bwabaangi, ne khubalia abamusubiriranga alilolekha olwa khabiri oburakhalabanira obwonooni khubalia abamulindiriranga khulwo buonia.