¹ Khu kalia amakhuwa kakhumalire khulomaloma, obumalirikhi bwako nibwo buno mbwe; Khuli nende omukukhaani mukhongo owekhala khumukhoono musaacha khusisaala sioburuki mwikulu. ² Niye omukhalabani womubwaali, eyiri inyuumba yadieri, eyomuundu arombakha arali Omwami Nasaye mwene. ³ Khulwo khuba buli omukukhani mukhoongo arebwangao khulwo khwaana ebianwa nende ebisakhiro. Khu kario uno yeesi yali ayera akhole ario. ⁴ Aba mbwe ali khusialo, siyakhabere omukukhani khaba, khulwo khuba abo abalikho barusianga ebianwa mungira yelilako. ⁵ Bakhoola emirimo muifwani nende esiniikha siebindu biomwikulu. Bili sa ngolwa Musa yali nabalirwe nende Nasaye mubikha biayaali niyombakha eliyema liemikhung'ano; Nasaye yamuboolera ari, ''Onakhola buli siindu okhulondana nende eyifwani yawekesibwa khulugulu.'' ⁶ Ne bulano yanyoola obukhooli bukhirakho mubulayi, ngolwa ali omwambani welilakano lilayi, eliombakhwa khumasubisio malayi. ⁷ Elilakano lieimberi liba mbwe libulamo obuleemu, eliokhubiri siliakhenyekhane khaba. ⁸ Namalire okhunyoola obuleemu khunibo, aboola mbwe, ''Lola, echinyaanga chiicha Omwami aboola mbwe, njia okhureresia elilakano liyaakha nende inyuumba ya Isiraili nende inyuumba ya Yuda. ⁹ Lino siliakhabe nga elia ndakhola nende abasaabwe olwandabarusia nomukhono kwange musialo sia Misiri. Okhuba sibachiririra mulilakano liange ngaolwabikhoyera, Khukario ndamala bakhaye - Omwami aboola ario. ¹⁰ Lino nilio elilakano lianjia okhukhola nende inyuumba ya Isiraili olunyuuma lwechinyaanga echio, Omwami aboola ario, njia khura amalaako kange mumapaaro kabwe, khaandi nende okhwandiika mumioyo kiabwe. Ne ndaba Nasaye wabwe nabo naba abaandu bange. ¹¹ Ne anabulao onekesia omumenyerani waye, kose omuundu khwekesia omusiani wabwe mbwe, 'Mumanye Omwami.' Okhuba boosi bachia okhuumanya khurula khumudiidi okhuula khumukhoongo. ¹² Khulwo khuba ndaba owesisa khubumaanu bwabwe , khubionoono biabwe nende obukhayi bwabwe, sindirichulisia khaba.'' ¹³ Ne khwako aboola ari, elilakano liyaakha alikholere okhuba elikhuluundu, ne silia esibola khandi esili esikhulundu sichia okhubwayo.