¹ Naye Melikisedeki uno, omuruki wa Salemu, omukukhani wa Nasaye oli akulu lukali, yabukanana nende Ibraimu narula okhwira abaruki, namuanira echikhabi. ² Kario Ibraimu yamuanira esilala khulikhumi lia bioosi ebia yalinabio. Mukhurangirira alangwa mbwe, ''Omuruki wobulungifu,'' nolunyuma, ''omuruki wa Salemu, oli omuruki womuleembe.'' ³ Orali nende samwana, ng'ina kata abeekho, abula owarula , oburangiriri bwechindaalo kose obumalirikhi bwobulamu, arali mukhufwananisibwa nga Omwana wa Nasaye, yaulwa omukukhaani owokhuchirira buli lwoosi. ⁴ Paririsiakho obukhongo bwomuundu uno owa kata Ibraimu omukhulundu yaberesia esikhumi sia ebia yali nabukule muliiyie. ⁵ Nobwadieri mbwe, nolwibulo lwa Lawi olwobukukhaani, nilwo lwong'ane olwafukirirwa nende amalaako okhubukula esikhumi khurula khubaandu, bolwibulo lwa Ibraimu, kata kario boosi nabalala khunibo. ⁶ Ne oyo orali owolwibulo lurabalirwa munibo, yabukula ebikhumi niyaanira echikhabi oyo owali nende ebisubisio . ⁷ Kario bubulao obuyingani bwoosi mbwe omuundu mudiidi yanirwanga ikhabi nende omukhiira. ⁸ Naye ano, abafwa baberesibwangwa ebikhumi, naye ulia owabarusiriangakho obuloli amenyanga. ⁹ Ne ngolwa mboola, Lawi owanyola ebikhumi yaana ebikhumi khubirira mu Ibraimu. ¹⁰ Okhuba yali asiiri okhwibulwa Melikisedeki nabukanana ninaye. ¹¹ Nikakhabere mbwe obwolerefu burulana khu burumikhi bwa Balawi, ( okhuba khubirira munibo niwo owa baandu banyoola elilako), obukhonyi sina obwaliwo mbwe khaandi omukukhani undi abeo khurulana nende obuchiririri bwa Melikisedeki, mubweyango bwokhulangwa khulondana nende Aruni? ¹² Okhuba obukukhani nibukalukhana, kenyekhana, elilako liosi likalukhane. ¹³ Okhuba ulia olomalomwangwakho kano nowoluuyia lundi, omurarulakhoomo omukholi wokhubwaali. ¹⁴ Kamanyikhane mubwakhakhu mbwe Omwami wefwe yarula khu Yuda, oluuyia lwa Musa araboolakho khulondana nende obukukhaani. ¹⁵ Khaandi kamanyikhane khukhirao mbwe olunyuma lwa Melikisedeki arulirao omukukhani uundi. ¹⁶ Orakholwa mumbeera yelilako lie lilakano liomubiri, arali khumaani kobulamu buralibwayo dawe. ¹⁷ Okhuba aboola mumaandiko narusia obuloli ari: ''Ewe oli omukukhani buli lwoosi muimbeera ya Melikisedeki.'' ¹⁸ Kario khuliwo okhukalukhanisibwa khwelilako khulwo khuba elidekhere nende obulemu bulirimo. ¹⁹ Sibulao esielilako liadinyisia, arali elinaaya lilayi, elirunyalira okhusuda ambi nende Nasaye. ²⁰ Ne khaandi kario sibiabula okhwechuba! Kata abaandi nibakhwolwa abakukhani nibarechubire, ²¹ Nabo bakholwa abakukhaani nibarechubire ,arali naye yakholwa khubirira khwoyo owaboola ninaye ari, ''Omwami yechubire oburekanira mbwe : 'Onaba omukukhani owechinyaanga chioosi". ²² Okhukhirao Yeso yakholwa omusuubisi welilakano lilayi. ²³ Nobwadieri abakukhani barangira bali baangi, khulwo khubeera eliifwa liabamalanga mubukholi bwabwe. ²⁴ Ne khulwo khubeera Yeso nomulamu echinyaanga chioosi, obukukhani bwaye noburabwayo. ²⁵ Khu kario anyala okhuonia lukali abo boosi abeecha khu Nasaye muniye, khulwo khuba aliwo khulwo khubalamiraanga. ²⁶ Khulwe esio biakhoyera mbwe khube nende omukukhaani mukhoongo, oli mutakatifu, omuchwenifu, owaonisibwa mubonooni, ne nakingulibwa akulu welikulu. ²⁷ Omwene uno sienyekho buli lwoosi okhurusia ebisakhiro, imberi khulwe chiimbi chiaye, khaandi lunyuma khulwa chiimbi chiaabaandu, nga bakukhaani baandi. Yosirisia kano lulala, olwa yali niyerusianga. ²⁸ Elilako likholanga abaandu bali nobudekhere abakukhani, ne elikhuwa liesichubo, okhurula mukhuchaaka khwelilako, lialobola Omwana nilimukhola okhuba omwolerefu chinyaanga chioosi.