¹ Khukario, nikhulekha ameekesio kokhurangirira aka Kiristo , nekhusude mukalia akokhuruoleresia: Khurakalukhira khandi khu kala akhwekanira khurula mubikhole bifu nende akelisuubira khu Nasaye, ² kose ameekesio kokhubatisia, okhurebwakho makhono, nende okhulamusibwa khwabafu, nende obukhalakirwi oburalibwayo. ³ Ne kano khunakakhola Nasaye nafukirira. ⁴ Khulwo khuba nebidinyu khulwa abo abali nibamanyisibwe, obulayi bwesianwa siomwikulu, nibakholwa abasangirani abomwoyo mulafu, ⁵ khandi nibabila elikhuwa lia Nasaye lilayi nende amaani kesialo esiicha, ⁶ nibamala bakwa ( bakalukha inyuma)_ sibinyalikhana okhubakhoola khandi bekanire, khulwo Khuba bali okhubaamba Omwana wa Nasaye buya nende okhumwanikha khuchisoni alafu. ⁷ Okhuba eliloba eling'wechanga buli ifula yilikwira, niliana ebiamo khuabo abalireresianga, banyolanga yikhabi khurula khu Nasaye. ⁸ Nalio niliama amabwa nende eliiswa , silifukirirwa arali liri ambi khuchubwa nende khumalirikhira mukhusambwa. ⁹ Ne abakheerwa, Kata kario khulomaloma akene kano mumakhuwa keng'we khusubirira mumakhuwa kalia amalaayi kobuonia. ¹⁰ Okhuba Nasaye sinomukoyanu owakhebirira emirimo nende obukholi bwen'gwe bwobukheeri obwamumalire okhwekesia Khu liira liaye , khulwokhuba munyakhanire abatakatifu baye, khandi musiiri mubakhalabanira. ¹¹ Ne khwekoomba muno mbwe buli mulala yekesie sinani sila sila esie linaaya liobwolerefu okhuula mubumalirikhi. ¹² Muraaba abakara, Kata kario mube abaloondi abokhubirira mubusubiri nende obwesimirisi bonyoolanga ebisubisio biobobulaame . ¹³ Khulwo khuba Nasaye nakhola elilakano nende Ibraimu , yechuba khuye omwene okhuba yabulao omukhira. ¹⁴ Naboola ari , ''Obwadieri ndkhuberesia echikhabi ne okhumeeda ndakhumeeda.'' ¹⁵ Khokario , ngolwayesimirisia yamala anyoole eliayalakwa. ¹⁶ Khulwo khuba abaandu bechubaanga khu ulia obakhira . Khulwa esiakamo siokhumalao obulekani , okhwechuba khukhusirisia. ¹⁷ Olwa Nasaye yeenya okhuchwichwisiria abalaamirwe belilakano mbwe ni Nasaye orakalukhananga mulikhuwa liaye , yamala alichwichwisie nende okhwechuba. ¹⁸ Mbwe khulwebiindu bibiri ebirakalukhananga khaba , okhuba nebidinyu Nasaye okhuboola obubacha , mbwe khunyoole khulemesibwa khwolerefu, aberukhira okhudiira linaya eliarebwa imberi wefwe ; ¹⁹ Elinaya elio eliri ngeisiro yomwoyo , eyadieri khandi indinyirifu eyingira nende okhukhalania muipasia. ²⁰ Oyomurangiriri wefwe Yeso yabiriramo nakholwa omukukhani mukhoongo chinyaanga chiosi muikhola ya Melikisediki.