¹ khubeera buli omukukhani oloboolwe akari wabaandu, yabakhwa amafura khulwabaandu khulwa makhuwa kalondana nende Nasaye, khulwokhurusia ebianwa nende ebisakhiro biobwononi. ² Onyala okhubeerera nende abo abaramanyirisianga, nibabachwa mubukori, khulwo khuba omwene yeesi nomudekhere. ³ Khulwakeene ako akhoyere arusie esisakhiro siebionono khulwa baandu nende ye omwene. ⁴ Ne abulao owefwasianga esiriibwa sino omwene, arali ulia owalangwa nende Nasaye nga Aaruni. ⁵ Khukario, Kiristo yeesi siyefwasia omwene oluyaali ngomukukhani mukhoongo. Arali ulia owaboola mbwe, ''Ewe oli Omwana wange; inyanga ino khwibuule.'' ⁶ Ngayaboola abuundu andi ari, ''Oli omukukhani buli lwoosi mubuchiane bwa Melkisediki.'' ⁷ Owamuchinyaanga chiaye chiomubiri, yaana echisala nende amasabo mukhulira nende amasika mumaani khu ulia owali anyala okhumuonia mulifwa, ne nabulirikhana khulwo khuba yali omweyecherefu mubulamu bwo bunasaye. ⁸ Kata kario yali Omwana , yeeka okhweduduyia khubirira mukhusaanda. ⁹ Ne niyakhakholwa omwolerefu, yekhola omuchaakisi wobuonia bwobumeri khuboosi abamuria. ¹⁰ Yalangwa nende Nasaye ngomukukhani mukhoongo mufwaani ya Melkisedeki. ¹¹ Naye khuli nende amaangi kokhuboola kata kario nebidinyu khurumbula, okhuba simuli abaangu bokhubulira. V 12 Khulwo khuba ebikha bia mwakhabeere nimwekesianga, musiiri khandi mwenya omuundu abekesie amekesio kokhuchaaka mumakhuwa ka Nasaye. Musiiri mudaakha amabeere, arali sinebiakhulia biomu! ¹³ Khulwo khuba oyo yeesi owekhoonyera amabeere abula obumanyirisi mulikhuwa liobulungifu, okhuba nomwaana mudooro ¹⁴ Arali esiakhulia sioomu nikhubalia abaangafu, okhurulana nende oburumikhi bamanyire okhukabukhania amalayi nende amabii.