¹ Khulwako, esisubisio siokhwingira mububulukhi bwaye sisiriwo, khwekenderesie mbwe, arabao omuundu yeesi khweng'we onasilemukhira. ² Khulwo khubeera khwayalirwa ifanjili nganibo, arali elikhuwa lia bayalirwa si liabakhonya okhuba silialimasibwa nende obusuubiri. ³ Khulwo khuba efwe abasuubira khwingira mububulukhi obwo, ngolwa yaboola ari, ''kori ngandechuba muburima, mbwe kario emirimo kiabwa mukhuchaaka khwesialo, Sibakhengire mububulukhi bwange. ⁴ khubeera abuunduandi yalomalomakho khunyaanga ya saba ari , ''Nasaye yabuluukha khuinyaanga ya saba mumirimo kiaye kioosi. ⁵ Ne khandi abuundu bwene ano aboola ari, ''Sibalingira mubulukhi bwange.'' ⁶ , nikalolekhana mbwe abaandi okhuula bengire, ni balia abayalirwa imberi sibengira khulwo khurasubira. ⁷ Khandi yarao inyaanga naboola khubirira mu Daudi ari, inyaanga ino , Lunyuma olwa ebikha ebirambi ; nga olwakaboolwa, inyanga ino nimubulira idoboosi yaye, muromirania emioyo kieng'we.'' ⁸ Bibeere mbwe banyoola obubuluukhi khubirira khu Yeso, siyakhalomalome khuludaalo lundi. ⁹ Khukario oludaalo lwobubulukhi lusiriwo khubaandu ba Nasaye. ¹⁰ Oyo owingira mububulukhi bwaye yeesi abulukhanga mumirimo kiaye, nga Nasaye yeesi yabulukha. ¹¹ Khulwesio khwekasirie okhwingira mububuluukhi obwo, arabao osuba khulwo khurasuubira nga nibo bakhola. ¹² Elikhuwa lia Nasaye nelilamu, khandi liri nende amaani, nende obwoki okhukhira olugaanga lwakalwa chimbeka chioosi. Olufumira nilukabukhania esinamuundu nende omwoyo, khandi chinyungo nende obudunduli, nilimanyirisianga amapaaro nende elienya liomwoyo. ¹³ Ne sisiriwo esilonge siosi esiramanyikhana mumoni chia Nasaye, arali ebiindu bioosi nebiakhaakhu khu oyo owakhwakhaboole amakhuwa kefwe . ¹⁴ Okhuba khuli nende omukukhani mukhoongo owengira mwikulu, Yeso Omwana wa Nasaye, khudiririre mubudinyirifu elinaya liefwe. ¹⁵ Abulao omukukhani mukhoongo orakhanyala okhuchiana ninafwe khumakhuwa kefwe kobudekhere. Arali, mumbeera chioosi yateemwa ngefwe, naye naronona khaba. ¹⁶ Khukario khwiiche imberi wesisaala siaye siobukoosia nende ichuoni, mbwe khunyoole esisa esinaruba obukoosia mubikha biakhwenya obukhoonyi.