¹ Khukario, abakheerwa balungifu, abasangiirani bomulaango kwomwikulu. Ichulisiekho omurumwa, oli omukukhani wobusubiriri bwefwe, Kiristo Yeso. ² Owali omwesikwa khu ulia owamuloboola, nga Musa yeesi yali omwesikwa munyuumba ya Nasaye yoosi. ³ Okhuba omuundu uno yabalwa okhoyera oluyaali lungi okhukhira Musa, ngolwa omumbakhi weinyumba ali nende siriibwa sikhoongo okhukhira inyuumba yeene. ⁴ Khulwo khuba buli inyuumba yumbakhungwa nende omuundu, naye owombakha ebiindu bioosi ni Nasaye. ⁵ Naye Musa mubwadieri yali omwesikwa munyuumba yaye yoosi, ngomurumwa khulwobuloli obwebiindu bilia ebiali bibolwe lunyuma. ⁶ Arali Kiristo ngamwana omwemeresi we inyuumba yoosi ya Nasaye, eyiri mbwe nefwe , nikaba mbwe khudiririra nende amaani obusubiriri nende isangalo yelinaya liefwe okhula okhumalirikha. ⁷ Khukario ngolwa Roho mulafu aboola ari, ''Inyaanga ino, nobulira idoboosi yaye, ⁸ Muromirania emioyo kieng'we mukhusinyisia, muludalo lwo khurekekhwa mulumirira. ⁹ Nga abaseng'we baandema, mukhungerania, nibamala nibalola ebikhole biange, emiaka makhumi kane. ¹⁰ Khukario ndasinyisibwa nolwibulo olwo. Nimboola mbwe, bakoranga bario, mumioyo kiabwe khandi sibamanyire echingira chiange. ¹¹ Khulwwsio bili sa kori ngandechuba mulirima liange; ''Mbwe sibakhengire mububuluukhi bwange.'' ¹² Mwekenderesie, baana befwe, arabamo mwing'we oli nende omwoyo kwobumaanu okwokhurasuubira, okwokhulekha Nasaye mulaamu. ¹³ Nimudinyisanie buli lwoosi, nisiiri niilangwa inyanga ino; mbwe arabao owomwoyo kwaye kunakholwa okhuba omwomu khubirira mububacha bweimbi. ¹⁴ Khubeera khukholerwe abasangirani ba Kiristo nikhudiririra nende obudinyirifu mukhuchaaka khwobusuubiriri bwefwe okhuula mubumalirikhi. ¹⁵ Khulino, kabolwa mbwe, ''Lero luno nimubulira omulaango kwaye, muromirania emioyo kieng'we, mubukhayi.'' ¹⁶ Ni wina abamubuliira Nasaye nibamubukhaya? Sinabeene abo abarula Misiri nibemirirwe nende Musa? ¹⁷ Ne khandi wina abayasinyisibwa nabo emiaka amakhumi kane? Sinibalia abali nibakholere obwononi, abemibiri kiabwe kiakona mulumira? ¹⁸ Niwina aba yechubira mbwe sibengira mububulukhi bwaye, arali balia abarafukirira? ¹⁹ Khulwesio khulola mbwe sibengira mububulukhi bwaye khulwoburasubirira bwabe.