¹ . Khu kario khukhoya okhuberesia obumanyirisi bukhoongo khu biindu bia khubulire, khureecha khwoola khwabilekhula bibwao. ² Ni nikaba mbwe elikhuwa liabolwa nende bamalaika liali lidinyirifu, nibuli bumaanu nende obukhayi bianyoola omurungo kuyera, ³ khunaona khurie nikhukhaya okhudeeba obuwonia bukhongo buno? Obwarangira okhulomalomwakho nende Omwami nibuchuchuisibwa nende balia abamubulira. ⁴ . Nasaye mwene naberesania obuloli, okhubirira khubilolero nende ebiamakana, ebiukisia bikabukhane nende ebianwa bia Rokho mulafu, khulondana nende okhwenya khwaye omwene. ⁵ . Sikhubolaanga mbwe Nasaye yara asi wabamalaika esialo siichayo esikhulomalomangakho. ⁶ . Arali omuundu uundi, abuunduandi yaboola ari, ''Omuundu nisina, esikera nomudeeba likali? Kose Omwana womuundu owolindaanga? ⁷ Wamukhola okhubakho mudiidi , asi wabamalaika ; wamufunikha nende oluyali alala nende siriibwa, nomura akulu wemirimo kiamakhono kao. ⁸ Nora ebiindu bioosi asi wamakulu kaye.'' Ne khulwo khuba yara bioosi asi waye , Sibulao esiarara asi waye khaba. Kata kario khusiri okhulola mbwe yara asi waye bioosi. ⁹ Arali khulola Yeso, owakholwa okhubakho asi wabamalaika khulwo khusandisibwa khweliifwa liaye, afwasibwe oluyaali nende esiriibwa, mbwe ye khulwobukoosia bwa Nasaye abilikho eliifwa khulwa bulimuundu. ¹⁰ . Biakheresia Nasaye, khulwo khubeera bioosi biliwo khulwa obeera niye khandi khubirira muniyei; mukhurera abaana baangi muluyaali, niyekhola omwimirsi wobuwonia bwabwe omwekenderefu okhubirira mubinyasio. ¹¹ . Khuboosi, ye olabianga nende abalabisibwa nesindu silala. Khu kario oralola chisoni okhubalanga abakheerwa. ¹² . Ne aboola mbwe, ''Ndalandasia eliira liao khubaana befwe, ne akari welikanisa ndakhwembera nikhuba ifuma.'' ¹³ Ne khandi ndara obusuubiiri bwange Khu niye,' khandi lola esie alala nende abaana ba Nasaye yamberesia ndi ano.'' ¹⁴ Bulano, ngolwabaana bali abasangirani bomubiiri nende amabaanga, mungeri eyo, yeesi omwene yabiriramo, mbwe okhubirira mukhufwa , anyoole okhusasia ulia owali nende amaani keliifwa, oli sietani. ¹⁵ Khandi anunule balia abali mububoye mubulamu bwabwe bwosi nibaria eliifwa. ¹⁶ Obwadieri siyerakho eyimera yabamalaika khaba, aral yerakho eyimwo ya Ibraimu. ¹⁷ Khu kario mubioosi biamukheresia okhufwanana nende bamwanang'ina , mbwe abe omukukhani mukhoongo owesisa nende obwesikwa, mubiindu bioosi ebio bunasaye, okhukhola obusasani khulwe bionono biabaandu. ¹⁸ Ne khulwo khuba ye yasandisibwa mu khuteemwa, anyala okhu khonya balia abateemwa.