¹ Elilaako khulwo khuba nesinikha siamakhuwa malayi kalibao, arali nesifwanani siamakhuwa kene. Abo abamuchiira Nasaye sibanyala okhulabisibwa mubwichufu khubirira khubisakhiro ebiabareranga buli mwaka. ² Kata kario , ebisakhiro biene ebio sibiakhakame okhurusibwa? Khulwobeera abalami bakhosibwenge lulala nibarula mumbeera yokhwondondwa khweimbi. ³ Arali mubisakhiro ebio buli lwoosi khuli nende okhwichulisibwa obwonooni buli mwaka. ⁴ Okhuba amabaanga kechisurusi nende chimbusi sikanyala okhurusiao echiimbi. ⁵ Khukario Kirisito niyeecha musialo, aboola ari, ''Esisakhiro nende esianwa siwajamisibwa ninabio , arali omubiri kwawangasiria; ⁶ Sisangaalira mubianwa biokhusambwa nende ebisaakhiro biebionono. ⁷ Nilwo olwa ndaboola mbwe, 'lola, njichire ndiwo (ngolwa kaandikwa mubitabo) okhukhola elienya liao Nasaye .''' ⁸ Akulu wako yaboola ari, ''ebisakhiro nende ebianwa biokhusambwa nende ebisakhiro biebionono sindajamisibwa nabio.'' Khandi sisangaliranga, khuba birusibwanga mungira yelilako. ⁹ Ne naboola ari, ''Lola njicha okhukhola elienya liao Nasaye. Mbwe arusiao elieimberi anyale okhwemekha eliokhubiri. ¹⁰ Mulienya liene elio khulabisibwa lulala okhubirira musianwa siomubiri kwa Yeso Kiristo. ¹¹ Ne buli lwoosi omukukhani yemeraanga okhurusia ebisakhiro bilia ebiramalao ebionoono. ¹² Naye uno niyakhamala okhwerusia ngesimalamusango lulala, yekhala khumukhono musaacha kwa Nasaye. ¹³ Khurula ao alindiriranga abasuku baye boosi okhurebwa asi wamakulu kaye. ¹⁴ Khubirira musisakhiro silala yalabia abalobole boosi oburalondamo khandi. ¹⁵ Kata Roho Mulafu yeesi nomuloli khu kano. Aboola ari, ¹⁶ ''Lino nelilakano lia ndilikhola ninabo lunyuma lwechindaalo echio, Omwami aboola ario. Ndakhare amalako kange mumioyo kiabwe, ninyandika akene ako mumapaaro kabwe.'' ¹⁷ Ameeda khuboola ari, ''Obwononi bwabwe nende obumaanu bwabwe sindakhechulisie khaba.'' ¹⁸ Bulano owobulekheri bwe bionoono buli, abulao khandi okhurusia esisakhiro siebionoono. ¹⁹ Khukario, abakherwa, khulwo khuba khuli nende ichwoni eyokhwingira andakatifu, khubirira khumabanga ka Yeso. ²⁰ Khubirira mungira injiakha eyobulamu eyayarukasiria khubirira muipasia, okuli omubiri kwaye. ²¹ Ne khulwo khuba khuli nende omukukhani omukhoongo munyuumba ya Nasaye, ²² Kario khuside ambi mumwoyo okwobwadieri okuli nende ichuoni yelisuubira, emioyo kiefwe kilabisibwe khurula mumapaaro amabi, nakio emibiri kiosibwe nende amaachi machwenufu. ²³ Khukario fwesi khudiririre nende amaani elisuubira liokhufukirira khwefwe oburadofula, okhuba ula owalaka nomwesikwa. ²⁴ Ne kario fwesi khupaare mubudinyirifu ngolwakhunyala khudinyisania mukhukhwera nende ebikhole bilayi. ²⁵ Khandi khuralekha okhubukanananga ngolwa kuli omunalo kwabaandi, ne khudinyisanienge ngaolwa khulindirira indaalo eyo ngolwaisida aambi. ²⁶ Ne nikhukhoola obwonooni nikhumalire khunyoola bumanyirisi bwobwadieri , khubula khandi esisaakhiro siebionoono. ²⁷ Arali khulindirira okhukhalakirwa khalala nende omuliro kurisia okulindiriranga okhumira abakhayi abali basuku ba Nasaye. ²⁸ Oyo owalekaanga lilako lia Musa, yerwangwa oburaba nende sisa khubulooli bwa babiri kose badaru. ²⁹ Opaara omuundu oyo osenakira Omwana wa Nasaye ayera sinyasio siaka sirie, oradebeere amabaanga kelilakano akayalabisibwamo naba najarire Rokho wobukosia? ³⁰ Khuba khumanyire owalaka ari ,'' okhurunga esikwori nokhwenge, khumulekhere ; khaandi Omwami yakhakhalakire abaandu baye.'' ³¹ Ne nelikhuwa liokhurisia okhukwa mumakhono ka Nasaye mulaamu. ³² Arali ichulisiakho chinyaanga cheimberi echiamwakhoserwa obulafu, nimwesimirisia obuyingani bukhoongo nende amanyakhano makhoongo. ³³ Mungira ndala mwasandisibwa nende khunyasibwa, ne mungira yiindi mwabalirwa alala nende abo abakholerwa keene ako. ³⁴ Mwabonera esisa abo abali musiboye , kata khaandi mwasangalira ebiindu bieng'we nibibukulibwa nga mumanyire mbwe muli nende esianwa silayi mwikulu esiranyasikha. ³⁵ Kario murasukuna ichiuoni eyamulininayo, okhuba omurungo kwayo nomukhoongo. ³⁶ Kata kario kenyekhana mwesimirisie, lunyuma lwo khukhoola elienya lia Nasaye, khumunyoole esisubisio siayalaka. ³⁷ ''Ne mubikha bimbikiri, oyo owichanga aneecha oburachelewa khaba.'' ³⁸ Bulano omulungiifu achia okhumenya mubusubiri, araali omuundu nakalikha inyuma, omwoyo kwange sikuchia sikuchia okhumusangalira khaba.'' ³⁹ Arali efwe sikhuli mwabo abakalukhiranga obumaanu, arali khuli mubalia abasubiriranga okhuula khuonia emioyo kiefwe.