Omuliango 11
1
Bulano obusuubiri nibuchwichwifu bwamakhuwa kalindilirwangwa, esimanyiro siamakhuwa karalolekhana.
2
Khulwanibwo abakhuluundu befwe babolwakho amakhuwa amalayi.
3
Okhubirira mubusubiri khusubirira mbwe esialo sialoongwa okhubirira mulikhuwa lia Nasaye, mbwe ebiindu bilolekha bialongwa okhurula mubiralolekha.
4
Okhubirira musubiri Abeli yaana khu Nasaye esianwa esilayi okhukhira esia Kaini, khulwa nisio, obulooli buboola mbwe yaali omukololofu, Nasaye mwene namanyisia ebianwa biaye, ebikera kata niyafwa asiri alomalomanga.
5
Mubusuubiri Enoka yakalukhanisibwa naralola eliifwa. ''Ne naralolekhana okhuba Nasaye yamubukula.'' Ne nasiiri okhukalukhanisibwa, kaboolwa mbwe yajamisia Nasaye.
6
Ne oburali nende obsuubiri sibinyalikhana okhumujamisia. Khu kario oyo yesi omwichakho kenyekhana amanyirisie mbwe Nasaye aliwo , ne aberesanianga ebianwa khu abo abamukoonya nende amaani.
7
Mubusuubiri Noa, yabolerwa nende Nasaye okhulondana nende akaali kechanga nikasiabonekhana, mukhuria nende okhwesika Nasaye, yareresia eliaro khulwo khuonia abeinyuumba yaye. Khulino yakhalakira esialo esiina, naye niyekhola omulamirwe wobwadieri khubirira mubusuubiri.
8
Mubsuubiri Ibraimu olwayalangwa okhuchia musialo sia yali akhoyere alamirwe lunyuma, yafukirira namala nachia nakorerwe owali khuchichanga.
9
Mubusuubiri yekhala ebukeeni musialo sila esiayalakwa nga orali mwenesio. Niyekhala mumayema alala nende Isaka nende Yakobo, abalaamirwe ninaye abelilakano elio.
10
Khulwo khuba yaali nalindiriranga elidookho eliachakisibwa nende okhumbakhwa nende Nasaye omwene.
11
Mubusuubiri Sarah, owali niyabiririra emiaka yanyoola amaani kokhuyera inda niyebula omwana, khulwo khuba ula owamulaka yaali omwesikwa.
12
Khulwesio okhubirira mumuundu mulala owali ngomufu, bebulwa abaandu baangi ngeching'ining'ini chia akulu, khaandi ngawakhabona omusenye khulukuku lweinyaanja okurabalikha.
13
Bano boosi bafwiira mubusuubiri, nibarabwene akalakwa. Arali bakabonera ale, nibajamisibwa nende okhukafukirira, ne nibaboola bari, nabakeeni khaandi babira_ngira musialo.
14
Abo ababolaanga ako bekesianga abulafu mbwe bakonyanga obumenyo.
15
Ne obwadieri baaba nende amapaaro kesialo sia barulamo, bakhekombere okhukalukhayo.
16
Arali bulanu bekombanga esialo silayi esiomwikulu. kario, Nasaye siyalola echisoni okhulangwa Nasaye wabwe, khulwo khubeera yamala okhubakasiria elidookho.
17
Mubusuubiri Ibraimu ngolwa yateemwa yarusia Isaka ngesisakhiro. Naberesania ulia omwana mudeerwa yeng'ene owa yaali naberesebwe mumasubisio.
18
Muye kali kaboolekha mbwe ,'Isaka olwibulo lwaye lulimanyikhana.''
19
Kabalwa mbwe Nasaye yaali nobunyala bwo khumulamusia khurula mubafu, owayaali namurusiisie mufwaani.
20
Mubusuubiri Isaka yaanira chikhabi Yakobo nende Esau khulwamakhuwa kali imberi.
21
Mubusuubiri Yakobo, nafwichanga, yalaamira abaana ba Yosefu, nga alaama nagunaame khumudiro kwaye.
22
Mubusuubiri Yosefu nafwichanga, yarumbula okhurula khwa baana ba Isiraili, nalakirisia okhulondana nende amakuumba kaye.
23
Mulisuubira Musa niyakhebulwa, yakisibwa nabebusi baye emiosi kidaru, khulwo khuba bajamisibwa ninaye, nibararia akomuruki yabisia.
24
Mulisuubira Musa, ngolwa yaali nakhulire, yakhaya khulangwa omwana womukhana womuruki Farao.
25
Nalobola okhusanda alala nende abaandu ba Nasaye, okhukhira okhuchiririra okhwesangaasia nende akobwonooni akebikha bimbikiri.
26
Nabukula okhusaanda khwa Kiristo khuba okhwobukhoonyi buungi khukhira emiandu kia Misiri, okhuba yadeeba muno omurungo kulimo.
27
Mulisuubira yarula Misiri oburaria oburima bwomuruki, okhuba yaali nalindiriranga ulia oralolekha.
28
Mulisuubira yoseresia pasaaka nende okhwanywakho amabaanga, mbwe ulia omusasi wa baana bokhurangirira arabadirakho.
29
Mubusuubiri bambuukha inyanja injakhanyu eyumire. Ne abamisiri nibamirwa nende amaachi.
30
Mubusuubiri eliida lia Yeriko lialikulukha niliakhabodokhanwa echindaalo saba.
31
Mubusuubiri omudamba Rahabu siyafwa alala nende abarasuubirira, okhuba mumuleembe yaali nakisire balia abeecha okhukhebera esialo.
32
Mboole sina khaandi? Ebikha bifukiriire ndakhaboolere khu Gidioni ,nende Baraki, Samusoni , Yefutani, Daudi, Samueli, nende abanabii boosi.
33
Abeene abo khubirira mubusuubiri bakwisia abaruki, nibakhola akobulungifu, nibanyoola akalakwa nende okhwikala eminwa ekie chidalang'i,
34
basimia obukhakafu bwomuliro, nibaona obwoki bwolugaanga, mubudekhere nibaba abamaani mumaye, ne niberusia abasuku bamayie.
35
Abakhasi banyoola abaandu babwe khubusiibwa mubafu, naye abaandi nibasandisiibwa oburafukirira okhununulwa, mbwe, bamale banyoole obulamukhi bulayi khukhirao.
36
Ne abaandi babirira mukhuteemwa khudinyu nende khusandisiibwa, kata okhuula khurebwakho eminyororo nende mubiboye.
37
Nibalaswa nende amakina. Nibarandulwamo khabiri, nibateemwa, abaandi berwa nende olugaanga. Nibakendakenda mubiefwalo abiamasero kamakoondi alala nende akechimbusi. Nibanyolekhana okhuba abaandu balekherwe, abasandisibwe, nende okhukhaniakhanisibwa.
38
Bali kori abaradakhikhana musialo. Bayiyanga mulumira, nende muchingulu, nende mumeena, nende maulukhu komusialo.
39
Ne bano boosi, nibamalire okhuboolwakho amalaayi khubirira mubusubiiri sibanyoola esisubisio.
40
Khulwa khuba Nasaye yaali arangrire okhururerao esiindu silayi, mbwe barolerisibwa araali efwe nikhuraliwa