¹ Khulwesio, khulwa khuba khubodokhanwe nende eliilesi likhoongo eliabalooli, khulekhule obusiro bwoosi nende obwonooni buruboyanga mubwangu, khwirukhe mubwedemberefu khwirukha echimbiiro chili imberi wefwe. ² Nikhulingeera Yeso oli omuchakisi khaandi omumalirisi wobusubiiri bwefwe. Owesimirisiria omusalaba khulondana nende isangaalo yaali ninaye, nalekeresia echisoni, namala niyekhala khumukhono musaacha kwe sisala sia Nasaye. ³ khulwesio, paririsiekho oyo owesimirisiria obuyingani bukhoongo ngobwo okhurula khu abakholi bechiimbi, murola mwajong'a nende okhufwa emioyo. ⁴ Musiiri okhukhuyana okhuula okhuchukha amabaanga nimulwana nende obwonooni khuula khuchukha mabaanga: ⁵ khaandi mwibirire okhudinyisibwa okhwamwanyoola kori ngabaana, noboolerwa mbwe: ''Mwana wange oralekeresianga okhukololosibwa nende Omwami, kose mufwe emioyo nimwalabirwa ninaye. ⁶ Okhuba Nasaye akololosianga owayakheera, khaandi ne amala akhuya buli omwqna owayakheera. ⁷ Nikali mbwe ofukirira okhukololosibwa, Nasaye akholanga ninangwe kori ngabaana, naye nomwana sina owasamwana arakololosianga? ⁸ Kario nimukhaya obukololosi obwa buli omwana akhoyeera anyoole , awo muba muli ngabaana berwanyi abarali abomunyuumba yeene. ⁹ Kata kario abebusi bomubiri bakharukololosianga nikhubabulira, sinimuno khubulira Sefwe womwoyo kweimera nende okhumenya? ¹⁰ Khubeera obwadieri muchinyaanga chindiidi barukololosia khulwo khukheera khwabwe abene. Naye khulweingaanga yefwe mbwe khunyoole okhusangirana obutakatifu bwefwe. ¹¹ Bulano mubikha bino khubulao okhukololosibwa okhubonekhananga okhuba okhwokhusangasia, araali okhwokhusinyisia nende obuchuni. Arali olunyuma khureranga ebiamo biobulungifu mumuleembe khu balia abanasibwa . ¹² Khukario mukinguule amakhono kadofule nende amakhumbo kekhuyuka ¹³ Khaandi mureresie echingira echiakololokha khulwa makulu keng'we, mbwe sila sioosi esilema sirakosibwa araali siwonisibwe. ¹⁴ Mube ne sinaani siokhukoonya omuleembe nende abaandu boosi alala nende obutakatifu, okhuba araali nibwo abulao onyaala okhumubona Omwami. ¹⁵ Mwekenderesienge arabao oyo olemerwa obukoosia bwa Nasaye bikeere esisina esiobuchuuni sireecha siameera siabanyasia ,kumale kubakhe abaangi obumaanu, ¹⁶ Arabao omuyeeyi kose oraria Nasaye nga Esau, owakusia ubulaame bwaye bwokhubulwa kwamberi khulwa esiakhulia silala. ¹⁷ Nga olwa mumanyire olunyuma niyekomba ikhabi eyo,yakhaywa , okhuba siyanyoola obweyango bwokhwekanira kata nende niyakoonya mukhulira amasika. ¹⁸ Khulwo khuba simwichire khulugulu ludiriikha khaba, kose olwakha omuliro, kose lilesi limali, nende esirima, nende esifusie, ¹⁹ Nende oluyoka lwa itarumbeta, nende oluyoka lwa makhuwa, olwa bala abalubulira basaba barabolerwakho khaandi elikhuwa lindi. ²⁰ Okhuba sibesimirisiria ekhuwa lila elialagirwa, ne kakhabere mbwe kata '' isolo niyekuuda khulugulu olwo yakhakhuyirwe nende amakina.'' ²¹ Ne ako kalolekhana muingira yokhuriisia, kata Musa naboola ari ndirirwe nende oburi buungi nende okhurengerekha. ²² Ne mwichire khulugulu lwa Sayuni elidookho lia Nasaye mulamu , Yerusalemu yomwikulu nende malaika barabalikha. ²³ Mukhung'ano mukhoongo nende likanisa eliabebulwa bamberi abandiikwa mwikulu, nende Nasaye omukhalaki wa baandu boosi nende emioyo kia baandu balungifu bolerefu ²⁴ Nende Yeso omwaambani welilakano liyaakha, nende amabaanga kokhunyukhirisia akalomaloma ebiindu bilayi khukhira aka Abeli. ²⁵ Lingeere muramukhaya ulia alomaloma ,khuba ngolwa baraona abakhaya owalomaloma musialo, fweesi sikhuchia okhuona nikhulekeresia ulia olomaloma khurula mwikulu. ²⁶ Owe idoboosi yae yareengia esialo, ne luuno alaka ari, ''Sinjia okhurengia esialo siong'ane, araali kata elikulu.'' ²⁷ Kata kario elikhuwa lino khaandi, mbwe arusiao biria ebirengeresibwa manu bila ebireyuya bidong'eo. ²⁸ kario okhuba khunyoola obwami oburadengeywa, mubukosia khukholere Nasaye mungira ifukirirwa mukhweocheresia nende okhuria Nasaye. ²⁹ Okhuba ye nomuliro kumululanga.