¹ Obukheri bwa bakherwa buchiririre. ² Murebiriranga okhwingisia abakeeni, okhuba mungira yene eyo abaandi bakhengisia abamalaika oburamanya. ³ Mwichulisie abali musiboye, nga abo abamwaboywa ninabo, naye bala abasandisibwa nga nimuli mumubiri mulala. ⁴ Lidekhisania liberesibwe siriibwa mubioosi,ne obuliri bube obulafu, araali abayeyi nende abadaamba balikhalakirwa nende Nasaye. ⁵ Lekhe okhulomaloma khweng'we khuraba nende obwekoombi araali mwikusibwe nende ebiamuli ninabio, okhuba yaboola ari, ''Sinjia okhulekha kose okhukhaya.'' ⁶ Kakera nikhuboola khuri, ''Omwami niye orukhonyanga: sindakharia, Nisina esio muundu yakhakhoola? ⁷ Ichulisie abemeresi beng'we , abo bababoolera likhuwa lia Nasaye, nimulonda obusubira bwabwe , nikhumanyirisia obumalirikhi bwabwe. ⁸ Yeso Kiristo niye ulia ekulo, inyanga ino, nende buli lwoosi. ⁹ Murakadirisibwa nende amekesio kakabukhane khaandi amakeni, okhuba nebilayi omwoyo okhudinyisibwa nende obukosia khukhira ebiakhulia, ebiabalia abakholegana ninabio sibulao esiabanyoola. ¹⁰ Khuli nende obwali oburafukirira bala abakhola muliyeema okhulia ebiakhulia biakhwo. ¹¹ Okhuba emibiri kiebisolo ebia mabaanga kabio karerwangwa muikhekalu nende omukukhani mukhongo khulwe chiimbi , bisambwangwa erwanyi wolukaka. ¹² Khulwa ako Yeso yeesi, okhuula yoosie abaandu nende amabaanga kaye, yasandisibwa erwanyi wesiribwa. ¹³ Bulano khumuchire erwanyi wolukaka nikhukingire okhukhaywa khwaye. ¹⁴ Khulwo khuba ano khubula elidookho lirabwayo, Araali khukonyanga lila eliicha. ¹⁵ Khubirira muniye khurusie buli lwoosi esisakhiro sieifuma khu Nasaye, esiri siamo sieminwa kiefwe nikhwechomia elira liaye. ¹⁶ Araali murebiriranga, okhukhoola amalayi nende khusangirana khulwo khuba ebisakhiro bifwana birio nibio ebimusangasianga Nasaye . ¹⁷ Mubarie abo ababemiriranga nimweduduya khu nibo nga bala abakhiesianga khulwe mioyo kieng'we khaandi abakharusie obubali,banyoole okhukhola bario mubuchachaafu ,araali mukhusinyikha khulwo khuba sibibakhoyera. ¹⁸ Murusabire okhuba khusubira mbwe khuli nende amaparo malayi, khubechenge abesikwa mubiindu bioosi. ¹⁹ Nange basaba lukali mukhole ako, khunyale okhukalusibwa khweng'we lwangu. ²⁰ Bulano Nasaye womulembe, owarusia mubaafu Omwami wefwe Yeso , omwayi ulia mukhongo owa makoondi, okhubirira mumabaanga kelilakano liralibwayo, abakasie ²¹ mubuli mulimo mulayi khukhola lienya liaye, nabakholeramo kala akasangaasia mumoni chiaye, mu Yeso Kiristo oyera oluyaali buli lwoosi. Amina. ²² Ne basaba bakherwa, fukirire likhuwa lielikerako lino, okhuba mbandikire ibarwa mumakhuwa membikiri. ²³ Mumanye mbwe omusiani wefwe Timoteyo alekhulirwe, niyanguya okhwicha mbaa ndeecha khubalola ninaye. ²⁴ Kheesia boosi ababemiriranga nende abatakatifu boosi. Aba Italia babakheesia. ²⁵ Obukosia bube khweng'we mwesi , Amina.