¹ Ne ngolwa balomalomera abaandu, abakukhani, nende abeemirisi aba ikhekalu, nende abasadukayo, babeechera. ² Nibasinyisibwe okhubeera bekesianga abaandu nibayaala okhubirira khu Yeso owalamukha okhurula mubaafu. ³ Nibabandiira nibabekalira okhuula inyanga yalondakho, okhubeera bwali nibwirire. ⁴ Kata kario abaangi khu abo ababulira elikhuwa basubira ne inaamba eyabasacha yali ambi nende chilifu chirano. ⁵ Ne nibukhiere inyaanga ilondakho abaruki babwe, nende abakhulundu, nende abandiiki, ⁶ Nende Anasi omukukhani mukhongo, nende Kayafa, nende Yokhana, nende Alekisanda nende abandi baangi abali abolwibulo olwa omukukhani mukhongo bakhung'ana mu Yerusalemu. ⁷ Ne nibabarere akari Petero nende Yokhana babareba mbwe nikhubunyali sina kose mulira sina mukholere kano? ⁸ Naye Petero niyechusibwemo Rokho Mutakatifu, Nababoolera, eng'we abaruki babaandu nende abakhulundu ba Isiraili, ⁹ Nikaba mbwe inyaanga ino barureba khulwa elikhuwa elilayi eliekholekhe khu mulwaaye khulwa obunyala sina aonere, ¹⁰ Kamanyikhe khweng'we mweesi, nende khuboosi aba Israili, mbwe khulira lia Yeso kirisito owa Nasareti, owa, mwabamba, owa Nasaye yalamusia okhurula mubafu, khubirira khuniye omuundu uno yemere ano omulamu. ¹¹ Lino nilio elikina elia eng'we aboombakhi mwakhaya, elimalire okhuba likina likhongo eliomukona. ¹² Khulwo khuba khasi khuli nende obwonia mu muundu uundi yeesi, kata lira lindi liosi asi welikulu eliaberesanwa khubaandu, mbwe khunilio khunyole khuonisibwa. ¹³ Ne nibalola ichwooni eya Petero nende Yokhana, balinayo, nibamanyirisia mbwe bali abaandu barasoma khandi abasiru ababula obumanyirisi bauka; ¹⁴ Kario nibamulola omuundu owaali naonere niyeemere nabo, babula eliokhuboola akulu wabwe. ¹⁵ Ne nibamalire okhubalagira mbwe barule erwanyi wolubarasa, baboolana beene khubene. ¹⁶ Barebana bari, khunakhoola siina khubaandu bano? okhubeera obwadieri esiamayia esiyekholekhe ninabo simanyikhe muboosi abamenyere mu Yerusalemu; khandi sikhwakhasikaana. ¹⁷ Arali likhuwa lino lialandaala mubaandu, bulano khubarikhirisie mbwe baralomalomakho nende muundu yesi yesi mulira lino. ¹⁸ Babalaanga khandi nibabalagira oburalomaloma kose okhwekesia muliira elia Yeso. ¹⁹ Nabo Petero nende Yokhana bakalusia nibaboola bari, abeene baloole nibiri ebilayi mumoni echia Nasaye okhubabulira nibo okhukhira Nasaye. ²⁰ Arali khasi khunyala khwaleekha okhulomaloma khubiindu ebia khubwene nende okhubulira. ²¹ Ne ngolwa bali khandi nibabarikhirisie nibabalekhuula okhubwao, nibaranyoola esiakhakera babasandie, okhubeera abaandu boosi bafumia Nasaye khulwa sila esiali nisiekholeekhe ²² Okhubeera omuundu uno yaali akulu wemiaka amakhumi kane, owa esiamakana siokhuona siali nisimwekholeekhekho. ²³ Ne nibabalekhuulire, bachia okhukhung'aana nende abasiabwe, nibababoolera aka abakukhani abakhoongo nende abakhulundu bababolere. ²⁴ Nabo nibabulire ako, bakinguula emioyo kiabwe khu Nasaye nende lichoomo elala nibaboola, Omwani ewe newe Nasaye owaloonga elikulu nende esialo, nende inyanja nende ebio bioosi ebirimo. ²⁵ Ewe walomaloma okhubirira mumunwa okwomukhalabani wao Daudi noboola mbwe, khulwasina abanasialo bakhuuba esioka, ne abaandu bapara ebirariwo?' ²⁶ Abaruki abesialo bemeere nibaambana alala okhumukhaya Omwami nende Kirisito waye. ²⁷ Kario obwadieri, Herodi alala nende Pontio Pilato, nende abanasialo nende abaandu aba Israili bakhung'ana alala akulu womubakhe wao Yeso . ²⁸ Okhukhola ebia omukhono kwao nende amaparo kao kaloboola okhukhola okhurula mukhuchaka. ²⁹ Bulano Omwami lingeera okhurikhirisia khwaabwe, mani obanyaliire abakhooli bao babe nende ichwoni yoosi banyale okhuboola elikhuwa liao. ³⁰ Nokolola mukhono kwao noonia; nende ebilorero nende akamakana kekholekhe mulira litakatifu elia mwana wao Yeso. ³¹ Ne nibamalire okhusaaya, abuundu wabali nibakhung'anire narangerekha; ne boosi nibechusibwamo Rokho Mutakatifu, nibalomaloma elikhuwa elia Nasaye nende ichwoni. ³² Ne abaandu balia abasuubira baali mumwoyo mulala nende mapaaro malala; khaandi abulao yeesi owalola mbwe biindu bioosi ebiayaali nabio biali ebiaye yeng'ene; arali baali nende obusaangirani mubindu bioosi. ³³ Ne mubunyala obukhongo abarumwa barusia obulooli bwo bulaamukhi bwa Omwami Yeso; ne obukoosia obukhongo bwali akulu wabwe boosi. ³⁴ Khandi abulao omuundu yesi owalemeerwa, Okhubeera abaangi abali nende emiandu ekia maloba kose echinyumba bakusiamo nibarera obukusi obwa ebiindu ebia bali nibakusisiemo, ³⁵ Nibageeng'a mumakulu kabarume nibakabira buli mulala khulondana nende ameenya kaye. ³⁶ Naye Yosefu, owa abarume balaanga mbwe Barinaba, {owa nokalula nomwana wokhulemisia} omulawi, owesialo sia Sipro, ³⁷ Owali nende omukuunda, yakusiamo, narera echisende , nachigeeng'a mumakhulu aka abarume.