¹ Naye Sauli yafukirisania nende lifwa liaye. Ebikha ebio khwali nende omusando khulikanisa elia Yerusalemu, bamala nibasalanisibwa mubialo bindi okhuula muchimbeka chia Yudea nende Samaria, omalakho abarume. ² Ne abandu balobole bakiinga Stefano khuchia khumusiikha manu nibamulira lukali. ³ Naye Sauli yachiririra okhukhaniakhania elikanisa, yengira mubuli inyumba, nabadira abasacha nende abakhasi nabatupa mumboyero. ⁴ Nabo bala abali basalana mu bialo bia ingerekha bachia buli abandu nibayaala ifanjili. ⁵ Naye Filipo nachia musialo sia Samaria, nabayaalira Kirisito. ⁶ Nabo abaandu mulichomo lala bafukirira amakhuwa ka Filipo yayala, nibakabulira nende okhulola akamangalima kayakhola. ⁷ Khubeera ebikhieno, bialira mudoboosi, nibirula mubaandu bangi abali ninabio; nabo abangi abali bekhuyuka, nende abalema baonisibwa. ⁸ Manu khwecha khwaba, nende isangalo ikhongo mudokho omwo. ⁹ Ne khwali nende omundu undi,mbwe Simoni, owokhurula khale mudokho omwa yekhonyeranga obulosi naloka abaandu ba Samaria, niyelolesia mbwe nomundu omukhongo. ¹⁰ Owaboosi bali bamubulira, okhurula khu mundu mudiidi okhuula khumukhongo, baboolanga mbwe, omundu uno namaani makhongo,ka Nasaye. ¹¹ Khandi bali bamuba esiriibwa khubeera mbwe chinyanga chinyiingi yabalokanga nende obulosi bwaye. ¹² Arali nga basubira Filipo nayaalanga khubindu bikhola khu bwami bwa Nasaye, nende eliira lia Yeso Kirisito, babatisibwa, boosi basacha nende bakhasi. ¹³ Lunyuma Simoni mwene yesi yasubira; ne olwa yabatisibwa, yachiririra khukenda nende Filipo, naukisibwa nalolanga akamangalimwa nende ebilolero biekholaanga. ¹⁴ Bulanu ngolwa barume bali Yerusalemu babulira mbwe Samaria babukule elikhuwa lia Nasaye babarumira Yokhana. ¹⁵ Nabo nibolere babasayiira, mbwe banyole omwoyo mutakatifu. ¹⁶ Khubera Kwali kusiiri okhwikhirakho yesi yesi dawe; bali sa, nibabatisibwa mulira lia omwami Yeso. ¹⁷ Manu nibabarakho amakhono kabwe, manu nibanyola rokho mutakatifu . ¹⁸ Naye Simoni olwayalola mbwe khulwokhurebwakho makhono nende abarume abaandu baberesibwa Rokho mutakatifu yababeresia esende. ¹⁹ Naboola ari, "mumberesia siesi amaani kano mbwe siesi owandarechangakho makhono anyale okhunyoola Rokho mutakatifu." ²⁰ Arali Petero yamuboolera, sasikha nende echisende chiao, khubeera wakhapaara mbwe esianwa sia Nasaye sinyala okhukulwa nende echisende. ²¹ Obulakho esidonye kose omukabo mumirimo kino; khubeera omwoyo kwao khasi nomukololofu mumoni chia Nasaye, ²² Bulanu wekanire chimbi chiao chino, manu olame Nasaye, nikaba mbwe aundi maparo ka omwoyo kwao kanyala okhulekherwa. ²³ Khubeera ndola mbwe oli ndobuchuuni ngobufira bweindusie nende mumboye yemabi. ²⁴ Naye Simoni nakalusia,naboola ari musayiire khu Mwami mbwe libuleo khumakhuwa kano kamwakhaboola esinanjichakho. ²⁵ Ne nga olwabamala okhurusia obuloli nende khuyaala elikhuwa liomwami bakalukha Yerusalemu, khandi nibayaala imboosi muchingoongo chinyingi echia Basamaria. ²⁶ Naye malaika wo omwami nalomalomera Filipo, naboola ari, singira manu ochie lubeka lwa emwalo khungira ichia asi khurula Yerusalemu khuchina Gaza, eyiri mulumira. ²⁷ Manu nasingira nachia; khandi, lola omusacha okhurula Ithopia omuchiri owali nende obunyala bukhongo asi wa omukhasi muruki wa Baethopia, owemereranga embikhiro chioosi echiomuruki ne yali niyechere Yerusalemu okhulaama. ²⁸ Yali nakalukhangayo niyekhale muligaari liaye nasomanga Isaya omunabii. ²⁹ Lunyuma omwoyo mutakatifu kwaboolera Filipo chia ambi, manu wambane nende lingari. ³⁰ Manu Filipo nachia bwangu owayali, namubulira nasoma omunabii Isaya naboola oli obulirangamo aka oli khusomanga?" ³¹ Naye naboola, nyala khubuliramo endie nimbula omundu okhonya? Nasaba Filipo mbwe yengire manu yekhale naye. ³² Esidonye sia mandiko kayali nako siali sino, bamuyira musibapakiro kori elikondi, khandi obera esimeme sidimbe imbeli wabeeri basio kata siekhulao omunwa kwaye ³³ Mukhusandisibwa khwaye esina siaye siarusibwayo; ni wina owakhaboolere olwibulo lwaye? khubeera obulamu bwaye burusibweyo khusialo. ³⁴ Ne muchiiri ula namukalusia Filipo, naboola, khusaba omunabii uno amakhuwa aka oboola kano ka wina; kaye omwene kose ka omundu oundi? ³⁵ Naye Filipo niyekula omunwa kwaye manu nachakira khu mandiko ako, manu namuyala Yeso. ³⁶ Ne nga olwabali nibachiririra nende lukeendo lwabwe, beecha boola owa amachi kali; Nate omuchiri ula naboola,lola amaachi ngaka; sina singaira okhubatisibwa? ³⁷ Naye Filipo nabola, nosubira nende omwoyo kwao kwosi binyalikhana. Naye nakalusia naboola, subira mbwe Yeso Kirisito no mwana wa Nasaye. ³⁸ Yamala yarusia lilaako mbwe lingari lieme; manu boosi bekha nibachia mumachi, Filipo nende omuchiri bombi; namala namubatisia. ³⁹ Ne olwa beecha akulu nibarula mumachi omwoyo mutakatifu kwomwami kwamurusiao Filipo khandi omuchiri ulia khasi yamulola khaba; namala nabwao niyekhoya. ⁴⁰ Arali Filipo yanyolekhana Asoto. ne nabiramo yayaala mu madokho koosi khula olwa yola kaisaria.