¹ Manu omukukhani omukhongo naboola ari,ebindu bino biri birio? ² Naye nabola ari , abandu abakherwa, nende abasefwe, bulire; Nasaye owoluyali yamulolekhera sefwe Aburakhamu, ngolwa yali Mesopatania nasiri okhumenya Harani, ³ namuboolera ari, rula ewe musialo sieng'we, nende olwibulo lwao, ochie musialo esindakhwekesia. ⁴ Manu narula musialo esia Abakalidayo namenya Harani; ne okhurula ao, samwana nafwire namurusia okhumureera musialo sino, owa mumenyere bulanu ⁵ Khandi Khaba Khasi yamuberesia obulaame bwoosi mukari, Khaba kata sa adiidi obwa anyala orakho okhukulu; kata kario yalaka mbwe yakhamuberesie kama omwaandu, nende khuimwo yaye. ⁶ Ne Nasaye yalomaloma kano mumakesi, mbwe olwibulo lwaye lwakhamenye musialo esirende, mbwe khandi bakhakholwe okhuba ababoye, khandi bakhabasandie khulwa emiaka echimia chine. ⁷ Ne esialo esia bakhabemo baboye ndakhabakhalakire esiina, yabola Nasaye, ne lunyuma olwa ako bakharulemo abakhalabanira abundu ano. ⁸ Naye namuberesia elilakano elia okhukhebwa khulwako Abrahamu namunyola Isaka, namukheba inyanga eya munane; naye Isaka namunyola Yakobo; naye Yakobo nanyola ekhumi nababiri bakuuka befwe. ⁹ Nabo abakuuka nibakhola imbalikha, nibamukusia Yosefu muMisiri, arali Nasaye yali alala naye, ¹⁰ Ne namununula okhurula mumanyakhano kaye kosi, namuberesia esisa nende obumanyirisi muchimoni echia Farao omuruki wa Misiri, namukhola okhuba omuruki khu Misiri nende inyumba yaye yoosi. ¹¹ Bulanu nikhuba nende injala khusialo esie Misiri nende Kanaani, nende okhunyakhana okhukhongo; ne abasefwe sibanyala okhunyoola esiakhulia. ¹² Ne ngolwa Yakobo yabulira mbwe khuli nende ebiakhulia muMisiri, yabaruma basefwe imberi. ¹³ Ne olwa khabiri Yosefu yemanyisia khubakheerwa babwe; ne abaana babwe Yosefu bamanyisibwa khu Farao. ¹⁴ Ne Yusufu naruma, nibamulanga Yakobo owa yali, nende olwibulo lwaye lwoosi, abandu makhumi saba nende barano. ¹⁵ Manu Yakobo nachia Misiri nafwa ye nende basefwe, ¹⁶ Manu nibabakinga okhubayira Sikemu, nibamusikha musirindwa esie Aburakhamu yakula amapesa okhurula khu abaana aba Emori Sikemu. ¹⁷ Arali ebikha ebia elilakano liali ambi, elia Nasaye yechubira Aburakhamu abandu bakhula nibemeeda muMisiri. ¹⁸ Khuula omuruki oundi niyeecha khuburuki, oramumanya Yosefu. ¹⁹ Omwene oyo yasandia olwibulo lwefwe, ne nabakhola ebibi abasefwe, nabalagira okhurusia abaana babwe abadiidi, mbwe mukhumalirikha barabakho nende okhumenya. ²⁰ Muchinyanga echio Musa nuyebulwa, naye yali omulayi muno nakhulira munyumba ya samwana obweyango obwemiosi kidaru; ²¹ Ne nibamusukuna erwanyi, omukhana wa Farao namubukula, namulera kori omwana waye. ²² Ne Musa niyekesibwa mubumanyirisi bwa aba Misiri naba owobunyali mumakhuwa nende mubikhole. ²³ Ne ngolwa emiaka amakhumi kane ekiuliriire, amaparo kaye nikamwichira okhubakendera abakherwa babwe abaana ba Isiraili. ²⁴ Ne namubona omulala nasandisibwa, namukhonyera, namwira ulia owali namusandia, namukhuya omumisiri. ²⁵ okhubera yapaara mbwe abakherwa baye banamanyirisia ngolwa Nasaye okhubirira mumukhono kwaye yakhabanunule; arali khasi bamanyirisia. ²⁶ Ne inyanga ilondakho yabalola abene nibayingana, niyenya okhubakabula khandi naboola abesiriibwa, eng'we muli abakherwa; mbwe sina okhulwana bene khubene? ²⁷ Arali owali namukosere owasie namusukuma ale, naboola, niwiina okhukholere ewe okhuba omuruki khandi omukabuli akulu wefwe? ²⁸ Wenya okhunjira, kori ngolwa wakholere omumisiri ekulo? ²⁹ Manu Musa niyerukha okhubera amakhuwa ako, naba omukeni musialo esia madiani, eria owayanyola abaana babiri abasiani . ³⁰ Ne emiaka amakhumi kane nikibwere, malaika womwami namulolekhera musichiimi khulugulu olwa Sinai mulumweso olwomuliro musichakha . ³¹ Ne ngolwa Musa yakalola; yakanakana khubialolekha; nasuda ambi okhulingera, idoboosi yomwami nimwichira, ³² Niboola esie nesie Nasaye owa basoo; Nasaye owa Aburakhamu; khandi Nasaye owa Isaka khandi Nasaye owa Yakobo. Naye narengerkha nakhirwa okhulingera. ³³ Ne Omwami namuboolera mbwe, rusiamo ebilaro mumakulu kao; okhubera abundu owa wemere neliloba litakatifu. ³⁴ Esie mbwene, okhunyakhana okhwa abandu bange abali Misiri, khandi mbuliire okhulira khwabwe ne njichire asi okhubanunula. Bulanu icha, ndakhuruma ewe Misiri. ³⁵ Uno Musa owa bakhaya, nibaboola mbwe wiina owakhukhola okhuba omuruki khandi omukabuli? omwenoyo niye owa Nasaye aruma khuba muruki khandi omununuli khumukhono okwa malaika owamulolekhera musichakha. ³⁶ Yabarusiamo namalire okhwekesia ebiamaya nende ebilolero musialo esia Misiri, nende munyanga eya mabaanga, nende khandi musichiimi emiaka amakhumi kane ³⁷ Uno niye Musa owaboolera abaana aba Isiraili mbwe Omwami Nasaye anakhukinguula omunabii okhurula mubakherwa beng'we, ofwanana nasie, omwene oyo munamubulira. ³⁸ Uno niye, owali mulikanisa eliomusichiimi nende malaika owalomaloma ninaye khulugulu lwa Sinai khandi nende abasefwe, niye waberesebwa amakhuwa akobulamu okhuruberesia efwe. ³⁹ Owa basefwe barabulira, arali bamukhaira ale okhurula khunibo; mumioyo kiabwe nibakanakana khandi okhukalukha Misiri. ⁴⁰ Nibamuboolera Haroni, rukholere efwe eminasaye kirwimirire khubeera Musa uno owarurusia musialo esia Misiri khaba khasi khumanyire esimwekholekhanakho. ⁴¹ Nibakhola akhamoosi echinyanga echio, nibarera esimalamusango khubilonge nibasangalira emirimo ekia makhono kabwe abene. ⁴² Naye Nasaye nakalukhana, nabalekhula okhwinamira amayie komwikulu; kori olwa kandikwa musitabo esia abanabii mbwe, eng'we inyumba ya Isiraili, mwandusiria esie ebisolo bifwire nende ebimala misango emiaka amakhumi kane musichiimi? ⁴³ Eng'we mwabukula eliyema elia moleki, nende ing'ining'ini eya nasaye weng'we Rafani, ebilonge ebiamwakhola okhubiinamira nange ndabakiinga okhubayira ale okhubira Babeli. ⁴⁴ Basefwe bali nende eliyema eliobuloli musichiimi, ngolwa yali nalagiire naboolere Musa, mbwe ayikhole ifwanane nende ifwani eya yali nabwene. ⁴⁵ Eya basefwe boosi abeecha lunyuma barera alala nende Yeso okhuba emiandu ekia abarasubira, aba Nasaye yarusia okhurula mubweni obwa basefwe, okhuula khuchinyanga echia Daudi, ⁴⁶ owanyoola bukoosia imberi wa Nasaye, niyekoomba okhunyoola eliyema elia Nasaye owa Yakobo. ⁴⁷ Arali Suleimani yamumbakhira inyumba . ⁴⁸ Kata kario omukhongo owa akulu khaba khasi amenyanga muchinyumba echombakhwa nende makhono, ngolwa omunabii aboola. ⁴⁹ Mwikulu nibwo obwikhalo bwange, ne esialo nisio esisaala sia amakulu kange kabulukhirakho. Inyumba sina eya wakhanyumbakhira? aboola omwami; kose ni abundu sina ewa ndakhabulukhira? ⁵⁰ Khaba khasi namakhono kange akakhola ebindu bino biosi? ⁵¹ Eng'we aba amakosi momu nende abarakhebwa mumioyo nende amarwi , engwe buli lwoosi mukhaya rokho omutakatifu kori nga abaseng'we bakhola, mwesi mukhola murio. ⁵² Ne omunabii sina owa abaseng'we barerukhania? Ne khandi babeera balia ababekesia imberi okhwicha khwa oyo omulungifu; owa eng'we mwakhobere nende khumwira; ⁵³ Eng'we abanyoola amalako khurula khu bamalaika akabakhwa, kata kario simwakaliinda. ⁵⁴ Ne ngolwa babulira amakhuwa ako nibachunisibwa mumioyo kiabwe, nibamulumanisiria ameno Stefeno. ⁵⁵ Arali ye niyechusibwemo rokho omutakatifu, yalingera siruungi mwikulu, naloola oluyali olwa Nasaye, naye Yeso niyekhaale khumukhono omusacha okwa Nasaye. ⁵⁶ Naboola, lingera mbona elikulu likuukhe ne omwana womundu yemere khumukhono omusacha okwa Nasaye. ⁵⁷ Nabo nibayula nende omwoyo omukhongo nibekalira amarwi kabwe, niberukha alala mubulala khumudiira. ⁵⁸ Nibamurusia erwanyi welidokho, nibamukhuya nende amakina; ne abalola nibageng'a echingubo chiabwe khumakulu akoomusiani omuraga, olangwa mbwe Sauli. ⁵⁹ Ne nibamukhuya Stefano nende amakina, nalanga Nasaye , naboola omwami; Yeso, bukula omwoyo kwange . ⁶⁰ Nasigama asi nalira nende omwoyo omukhongo, omwami orababalirikho imbi ino. Ne namalire okhuboola kano, nafwa.