¹ Ne muchinyanga echio ngolwa obukhumi obwa abeka bwemeeda, khwabao okhubuluula okhwa abagerasi akulu wa abaebrania, okhubeera abakhasi abalekhwa babwe bebirirwa mumakhuwa aka buli nyanga. ² Manu balia ekhumi na babiri nibalanga mukanda okwa abeka, nibaboola bari, khasi bikhoyera efwe okhulekha elikhuwa elia Nasaye, manu khukhalabanire echimesa ³ Arali, abakherwa, mulingere eng'we akari weng'we abaandu abesikwa abechusiibwe rokho omutakatifu nende amakesi, abo khunyale obalobola khulwa emirimo kino. ⁴ Nafwe khunerusia okhuchiririra khulwa amasayo, nende oburumikhi obwa elikhuwa. ⁵ Amakhuwa ako nikafukirirwa nende omukanda kwoosi; nibamulobola Stefano, omundu owechulamo obusubiri nende rokho mutakatifu, nende Filipo, nende Prokoro, nende Nikanori; nende Timoni, nende Parimena, nende Nikolao omulokole wa antiokia; ⁶ Nibabemekha imberi wa abarumwa ne nibamalire okhusaba nibabarakho amakhono kabwe. ⁷ Ne elikuwa elia Nasaye nilichiririra okhulandaala, ne obungi obwa abeki nibwemeeda lukali mu Yerusalemu ne omukanda okwa bakukhani ni kuba omurekerefu khubusubiri. ⁸ Naye Stefano, niyechulemo obusubiri nende obunyali, nakhola ebiamangalimwa nende ebiamakana akari wa abaandu. ⁹ Nibakingukha abandi khubasinagogi abalangwa mbwe Abasinagogi abalekhuule nende Abakereno, nende Abalekisanda, nende balia aba Silisia nende aba Asia, nibaingana nende Stefano. ¹⁰ Ne khaba khasi banyala okhukhaya amakesi nende rokho owa yekhonyera okhulomaloma. ¹¹ Manu nibabachunjubania abaandu, ababola mbwe khwamubulira nalomaloma amakhuwa amabi khu Musa nende khuNasaye. ¹² Nibabachuuba abaandu, nende abakhulundu, nende abandiiki, nibamwichira, nibamudiira, nibamurera mulubarasa. ¹³ Nibamurakho obuloli obwo bubacha, obuboola mbwe, omundu uno khaba khasi achweya okhulomaloma amakhuwa aka okhunyeka abundu andakatifu ano, nende amalako; ¹⁴ Okhubeera khumubulira naboola mbwe, Yeso uno owa Nazareti anasasia abandu ano khandi anakalukhania emilukha ekia Musa yaruberesia. ¹⁵ Ne balia boosi abali nibekhaale mulubarasa, nibamulingera nibomiisie chimoni, nibaboola,obweni bwaye buli kori obwa Malaika.