¹ Ne ngolwa inyanga ya pendekote yali niyulire, boosi bali alala mubulala. ² Mulwangu esioka nisibulirikhana okhurula mwikulu kori omuyaka omukhongo okuucha, nikwichula munyumba eyabalimo nibekhaale. ³ Manu nichilolekha khunibo echinjesere chiechinimi ngomuliro, nichiema khubuli mulala khunibo. ⁴ Manu nibechusibwamo rokho omutakatifu nibachaaka okhulomaloma nende echinimi chingeni, ngolwa rokho yabanyalira okhuboola. ⁵ Ne bali Yerusalemu nibamenyere Abayaudi, abandu balobole, okhurula echimbia chioosi echiesialo asi welikulu. ⁶ Ne kano koosi nikabulirikhana, emikanda nikiicha alala, nibaukisibwa, mbwe okhubera babulira buli mulala nalomaloma muchinimi chiabwe. ⁷ Ne boosi bauka, nibaboola mulala khu undi bari, "lingera, abalomalomanga bank boosi sinabagalilaya?. ⁸ Ne mbwe sina khubabulire nibalomaloma buli mulala mululimi lwefwe,olwokhwibulwa? ⁹ Abapatia, nende Abamedi, nende Abaelamite, nende abamenyaranwa ba Mesopotamia, nende aba Yudea, nende aba kapadokia, mu poto nende Asia, ¹⁰ Aba Firigia, nende aba Pamufilia, Mumisiri nende muchimbeka echia libia ambi nende Kirene, nende abakeni ba Eburomo, Abayaudi nende abaonisibwa. ¹¹ Aba Kirete nende Abarabu, khubulira nibalomaloma mu chinimi chiefwe ebikhole ebikhongo ebia Nasaye. ¹² Ne boosi baukisibwa, nibarasubira, nibaboola omulala khu undi, bino nibio sina? ¹³ Abandu muchingacho nibaboola, "Abandu bano bamerere." ¹⁴ Naye Petero niyema alala nende balia ekhumi nende mulala, nakingula omwoyo kwaye, nababoolera ari, eng'we abaandu ba Ebuyaudi, nende boosi abamenyere Yerusalemu, kano kamanyikhane mweng'we, khandi mubulire amakhuwa kange. ¹⁵ Okhubeera bano khaba khasi bamerere, ngolwa mupaara, khandi mumanye mbwe bisiri echisa chidaru echiesidere. ¹⁶ Arali nibio ebialomalomwa nende omunabii Yoeli. ¹⁷ Bichia okhubira muchinyanga chiobumulirikhi, aboola Nasaye, ndachukha omwoyo kwange khubuli mubiri ne abaana beng'we abasiani nende abakhana bachia okhurusia obunabii, ne abaana beng'we ababuukha bachia okhulola amalolo, nabo abakofu beng'we bachia okhulora amalooro. ¹⁸ Ne khu barumwa bange nende abarumwa bange besikhaye njia okhuchukha omwoyo kwange muchinyanga echio, nabo bachia okhurusia obunabii. ¹⁹ Khandi njia okhwekesia ebiamakana mwikulu akulu, nende ebilolero asi musialo, amabanga nende omuliro, nende omuya kwo mwosi. ²⁰ Eliuba lichia okhukalukhana okhuba esirima, ne omwosi okhuba amabanga niisiri inyanga ikhongo yomwami okhuula. ²¹ Ne bulanu binoola ebikha, ebia omundu owalangwa khulira elia omwami anaonisibwa. ²² Eng'we abandu ba Israili, bulira amakhuwa kano; Yeso owa Nasareti, omundu awofukirirwa nende Nasaye akari weng'we okhubirira mu ebiamaya nende amangalimwa nende ebilolero ebia Nasaye yakhola akari weng'we, kori eng'we mwesi mumanyire. ²³ Niye owanwa mubukeraki nende obumanyi obwa Nasaye, eng'we mwamubukula, nende amakhono mabi mwamubaamba nimumwira; ²⁴ Owa Nasaye yamulamusia, nabolole obuchuni obwe lifwa; okhubera khaba khasi bianyalikhana okhudirwa khwaye nalio. ²⁵ Okhubera Daudi yalomaloma okhulondana naye ari, ndalola omwami buli lwoosi mubweni bwange, okhubera ali khumukhono kwange omusaacha, mbwe ndaradengeisibwa. ²⁶ Khulwesio omwoyo kwange nomusangafu, nalwo olulimi lwange lwekhoya; khandi omubiri kwange kwosi kunabulukha mulinaya. ²⁷ Okhubera ewe khaba khasi onalekha mwoyo kwange emagombe khandi khaba khasi onamulekha omulungifu wao alole obusasikhi. ²⁸ Onjekesia echingira echiobulamu,onakhola esie mbe nende obusangafu bwichule. ²⁹ Abandu nende abakherwa, lekha mulomalomere obulekhule khulondana nende omukhulundu wefwe Daudi mbwe yafwa khandi yasikhuwa, nesirindwa siaye siriano nafwe okhuula inyanga ino. ³⁰ Khulwa ako nali omunabii, khandi nikhumanyire mbwe Nasaye yamwechubira nende elilakano khuye mbwe nende ebiamo ebiarula musibuno siaye okhulondana nende omubiri, yakhamubusie Kirisito okhwikhala khusisala siaye siobumeri. ³¹ Ye namalire okhulola kano imberi yalomaloma khulwa obulamukhi obwa Kirisito mbwe mwoyo kwaye kuralola obusasikhi. ³² Yeso owa Nasaye yabuusia , owa efwe fwesi khuli abaloli. ³³ Khulwako nali khumukhono omusacha okwa Nasaye yakingula, khandi nanyola okhurula khu sefwe elilakano elia rokho omutakatifu, yekesia esindu sino, esia mulola nende okhubulira bulanu buri. ³⁴ Okhubera Daudi asiri okhunina mwikulu arali aboola omwene mbwe, omwami yaboolera omwami wange, "yikhala ewe khumukhono kwange omusaacha ³⁵ okhuula esie mbara abasuku bao asi wa amakulu kao." ³⁶ Bulanu inyumba yoosi eya Israili bamanye obwadieri, mbwe Nasaye yakhola Yeso omwene oyo, owa mwabaamba, omwami khandi Kirisito. ³⁷ Bulanu ngolwa babulira kano, bafumirwa mumioyo kiabwe, nibamuboolera Petero nende abarumwa bandi boosi mbwe, abandu nende abakherwa, khukhole sina? ³⁸ Manu Petero nababoolera ari,mwekanire, manu mubatisibwe buli mulala khweng'we mulira lia Yeso Kirisito khulwa okhulekherwa ebionooni, manu munanyola esianwa siarokho mutakatifu. ³⁹ Okhubera elilakano liri khweng'we, nende khubaana beng'we, nende abo boosi abali ale, nende balia abandi abomwami Nasaye wefwe analanga. ⁴⁰ Khandi nende amakhuwa kandi mangi yarusia obuloli nabalagira, naboola mweonie abene okhurula khulwibulo luno olubi. ⁴¹ Ne abo ababulira nende obusangafu elikhuwa liange babatisibwe; ne khunyanga yeneyo khwamederwakho khunibo ambi nende emioyo echilifu chidaru. ⁴² Manu nibachiririra mubulungifu mumekesio akabarumwa nende, mubusangirani, nende mukhufunaka omugaati, nende mumasayo. ⁴³ Okhuria nikhwingira mubuli omwoyo; ne ebiamakana nende ebilolero ebingi biakholwa nende abarumwa. ⁴⁴ Ne boosi abasubira bali alala nibali nende ebindu bioosi mubwambani. ⁴⁵ Nibakusia bioosi ebiabali nabio nende emiandu kiabwa, nibakabira abandu boosi ngolwa buli mulala yali nende elienya. ⁴⁶ Ne, bachiririranga buli inyanga mubulala mu ikhekalu, nende mukhufunaka omugaati khurula munyumba okhuchia khuindi, balichanga ebiakhulia mubusangafu nende omwoyo mulala. ⁴⁷ nibafumia omwami nibanyola oluyali, okhurula khubandu boosi, omwami nameeda khulikanisa buli inyanga balia abali nibaonisibwe.