¹ Lunyuma lwa makhuwa kano, Paulo yarula Athene mani niyola Korintho. ² Yamala nanyola omuyaudi undi olangwa mbwe Akila omwibulanwa wa Ponto, yali ambi ao narulire Italia, khubera mbwe Kilaudia yali nakhengere mbwe Abayaudi boosi barule Roma babweo naye Paulo yamala nachia owabali. ³ Khubera bakholanga emirimo kifwanana, Paulo yechia yamenya nabo, nibakholera emirimo alala; emirimo kiabwe kiali okhureresia amayema. ⁴ Manu buli inyanga ya sabato yakheberanga amandiko ninabo musinagogi niyekweda Abayaudi nende Abayunani. ⁵ Bulanu nga olwa Sila nende Timoteo bechia nibarula Makedonia, Paulo yanyakhana mumwoyo, namala nabarusiria obuloli mbwe Yeso niye Kirisito. ⁶ Ne nga baingana naye, nende okhumunyeka Nasaye , Paulo yasisimula chingubo chiaye, namala nababoolera ari, amabanga keng'we kabe khu mirwe kieng'we; esie mbulakho esibi dawe; bulanu buri njia khu Banasialo. ⁷ Narula nachia munyumba ya omundu undi, elira liaye mbwe Yusto, owamulamanga Nasaye, owa inyumba yali khulwakho lulalal nende Isinagogi. ⁸ Naye Kirisipo, omuruki omukhongo wa isinagogi, yeecha yamusubira omwami nende inyumba yaye yoosi, mani nga Bakorintho bangi babulira boosi basubira, manu ni babatisibwa. ⁹ Lunyuma lwa ako omwami yalomaloma nende Paulo mumalolo ari, oraria, arali lomaloma, khandi arabulera khaba. ¹⁰ Okhubeeera ndi ninawe, ne aumao omundu ochia okhwicha okhuyaala. ¹¹ Okhubera ndi nende abaandu bangi mulidokho omwo khulwa omwaka mulala nende emiosi kisasaba, niyekesia elikhuwa lia Nasaye akarikari wabwe. ¹² Nga olwa Galio yali omukhongo, omudiidi wa Akaya, Abayaudi bakhungana okhumukhoba Paulo,manu nibamudira nibamurera okhumukhalakira musango. ¹³ Baboola bali omundu uno ali okhubooleranga baandu mbwe bamulame Nasaye muyingera irali mumalako dawe. ¹⁴ Bulanu Paulo nga olwa yali nadakha khuchaka khulomaloma, Galio yaboolera Bayaudi ari, nikali mbwe liakhabere elikhuwa libi kose elia obukhubakhubania, eng'we Bayaudi, biakhabere biadieri esie okhufukirisania nang'we. ¹⁵ Ne nikali mbwe nebifune bia amakhuwa nende amera, nende bia amalako keng'we, mukalingeremo eng'we bene; khubeera sindakha okhuba omukhalaki wa makhuwa ako dawe. ¹⁶ Namala naberukhania khurula imberi owa sisala sia obukhalaki. ¹⁷ Abayaudi boosi bamala nibamudira basositene, omuruki omukhongo wa isinagogi, nibamuira imbeli wa sisala sia obukhalaki. Ne kata Galio khasi yadeba okhukholakho sindu sioosi dawe. ¹⁸ Lunyuma Paulo yeecha yamenyakho ao bikha bingi, namala nasebulana nende abakherwa nanina imeli okhuchia Shamu, yali nende Priska nende Akila, nga olwa yali yakhamala okhubeka omurwe kwaye ela Kenkera khubera yali yarao lilakano elio. ¹⁹ Boola efeso namala nabalekha ao; naye omwene yengira musinagogi, nakheberesia maandiko nende Abayaudi. ²⁰ Nga olwa benya mbwe achiririre okhumenya nabo khulwa ebikha birambi khasi Yafukirira khaba, ²¹ Arali yabasebula, naboola ari, khuyekhere nende esidialo esiri Yerusalemu; Ne khandi ndakalukha mbe nang'we, Nasaye nakhera. Namala nanina imeli nabwao okhurula Efeso. ²² Nga olwayola Kaisaria , yanina akulu, nakhesia likanisa, namala nachia emwalo Antiokia. ²³ Nga lwa yamala ebikha nabulebe eyo,yabwao, nabirira mubungi obwa musialo sia Galatia nende Frigia lidokho khu lidokho, nabombakha abeka mubusubiri, ²⁴ Ne Omuyaudi elira liaye mbwe Apolo, owebulwa Isikanderia, omundu wa makesi, khandi owamanya amandiko yeecha Efeso. ²⁵ Omundu uno yekesebwa ingira ya Nasaye; bulanu khubera omwoyo kwaye kwali nende elikhuwa lia Nasaye, yalomaloma nende okhwekesia sirungi elikhuwa lia omwami, naye yali yamanyasa ebatisia lia Yokhana. ²⁶ Apolo yamala nachaka okhulolmaloma nende ichwoni musinagogi nga Akila nende Prisila bali nibakhamuulira, bamubukuula nibachia naye owabwe, nibamuboolera ingira ya Nasaye musilungifu. ²⁷ Nga olwa yadakha okhwambukha okhuchia Akaya abakherwa bandika ibarwa, khubera bali Akaya mbwe bamwingisia ; nga olwa yolayo , yakhoonya lukali balia abali nibasubire khubirira mubukosia. ²⁸ Khubera mubukhongo muno yayingira Abayaudi, okhubirira mubwakhakhu, yekesia nende mandiko mbwe Yeso niye Kirisito