¹ Lunyuma yeecha Deriba nende Lisito naye ao khwaliyo nende omweka mulala, olangwa mbwe Timoteo, omwana wa omukhasi muyaudi, owali yasubira; arali samwana yali muyunani. ² Abakherwa bali Lisitio nende Ikonio bamulomalomakho ebilayi. ³ Paulo yadakha mbwe bache ninaye, manu namala namukheba khulwokhubera Bayaundi bali mu chimbeka echio: ⁴ Nga olwa babira mumadokho, bababeresia malako kalia akabisibwa nende abakofu abali Yerusalemu, mbwe bakadire. ⁵ Makanisa nikaberesibwa amaani mu busubiri, nabo nibemeda inamba buli inyanga. ⁶ Nibakhamala khubira mu Frigia nende Galatia yoosi, bakairwa nende Omwoyo mutakatifu mbwe sibayaala likhuwa mu Asia. ⁷ Nibamala khuula Misia bateema okhuchia Bitinia; arali omwoyo mutakatifu khasi kwabafukirira khaba. ⁸ Bulanu nga olwa babirira Misia bekha emwalo khuchia Trao. ⁹ Lunyuma Paulo, yalola amalolo nikamwichira musiro; yamulola omuundu wa Makedonia niyemere, namusaba ari, yambukha wiiche Makedonia, orukhonye. ¹⁰ Nga olwa yamala okhulola malolo mulwangu khwadakha okhuchia Makedonia, khubera khwapara mbwe omwami arulangire mbwe khuchie khubayaalire ifanjili . ¹¹ Khulwasio khwarula Trao, khubirira munyanja khwachia tiiri khwola Samatra, inyanga yalondakho khwachia Neopolisi. ¹² Okhurula ao khwola Filipi ebiri mbwe nilio lidokho likhongo mulubeka olwo olwa Makedonia, khandi lidokho lia Abaroma barukanga, manu mudokho omwo khwalimo chinyanga chichiririre. ¹³ Kata inyanga ya sabato khwarula erwanyi we lodokho, nikhuchia khundulo wa omwalo, owa khwapaara mbwe baliwo abaandu bokhulamira, khwekhala asi, khwalomaloma nende abakhasi ababukanananga ao, ¹⁴ Naye omukhasi undi olangwa mbwe Lidia, owakusianga irangi injakhanyu owa lidokho lia Thiatira owaria Nasaye, yarurekeresia owa omwami yekulao omwoyo kwaye manu nalondana nende okhubulira aka Paulo yali nayaalanga. ¹⁵ Nga olwa yamala khubatisibwa, omwene nende inyumba yaye, yarwekweda, naboola ari, nikali mbwe mumbwene mbwe ndi omwesikwa khu omwami, mwingire munyumba mwange,naruika. ¹⁶ Lunyuma nga khwachia okhulalama, omukhana undi omurumwa owalimo esikhieno sio bulakusi yarubukananira, naye yarereranga abayinda baye inganga inyingi nga yalakulanga. ¹⁷ Omukhana oyo yalonda Paulo nende , niyayulanga, naboola abaandu bano ni bakholi ba Nasaye oli akulu, abaruyalira ingira ya obuwonia. ¹⁸ Ne kano yakakhola chinyanga chinyingi, arali Paulo nga oluyasinyikha, yakalukhana niyalabira esikhieno, mbwe khulagira mulira lia Yeso Kirisito orule mukari mwaye , manu nisirula esikha esio. ¹⁹ Ne nga olwa bayinda baye balola mbwe linaya liabwe lia inganga libwereo, badiira Paulo nende Sila nibabakhwekhwesa khuula musiiro imberi wa bakhongo belidokho. ²⁰ Nibabarera imberi wo mukhalaki wemisango, nibaboola, abaandu bano, ni Bayaudi ni bali okhurera indoboyo mubungi mulidokho liefwe. ²¹ Khandi bali okhwekesia emima, ekirali mumalako mbwe efwe khunyole khufukirira kose okhulonda khubera efwe khuli Abaroma. ²² Manu omukanda omukhongo okwa bandu alala kwababukhirakho; nabo abakhalaki be misango bafwalula chingubo chiabwe, nibalagira mbwe Paulo nende Sila bakhuywe. ²³ Nga olwa bali nibabakhuya chimbariki chinyiingi babara mumboyero, nibalagira abaliindi ba imboyero okhubaliinda bilayi. ²⁴ Omuliindi niyakhamala okhunyoola lilako elio, yabara mumboyero yomukari, nababoya amakulu nende minyororo. ²⁵ Ne akari wesiro Paulo nende Sila bachaaka okhulaama nende okhwimba chinyimbo chia okhufumia Nasaye; kata baboye bandi bosi bababulira nibemba. ²⁶ Mulwangu sa esialo siachaaka okhurengerekha, kata amakuru ka imboyero kachaaka okhudengeya; ne abweneao emiliango kioosi ekia imboyero kiekukha, nakio eminyororo kia buli muboye kiabololokha. ²⁷ Nga omuliindi wa imboyero yasimukha khurula muchindoolo, nalola emiliango kia imboyero nikikukheo, yakhwesa oluganga, nadakha okhweyira, napaara mbwe ababoye beruukhe. ²⁸ Arali Paulo yayula nende idoboosi ikhongo , naboola oreyira; khubera fweesi khuliwo. ²⁹ Yamala nadakha chitara chirerwe, naruuma nakwa mukari mwa imboyero, yali narengerekhanga , yamala nakwa asi mumakulu ka Paulo nende Sila . ³⁰ Nabarusia erwanyi naboola abami khole sina khunyole obuwonia?. ³¹ Nabo nibamubolera, subira mu mwami Yeso Kirisito, nawe ochia khuwonibwa, nende inyumba yao. ³² Khandi bamulomalomera elikhuwa liamomwami, nende khu balia boosi bali munyumba mwaye. ³³ Yamala nababukula mu bikha ebio bia musiro, nabapangusia obukhuye, namala nababatisia, omwene nende abaandu baye boosi. ³⁴ Nga olwa yali niyakhabarera munyumba yaye, nababeresia esiokulia khandi nasangala okhusubira mu Nasaye alala nende inyumba yaye. ³⁵ Bulanu nga olwabwakhia abakhalaki abe misango babaruma abakhongo babalinde, nibaboola bari, mulekhe abaandu abo babweo. ³⁶ Khandi ula omulindi wa imboyero yaboolera kano Paulo, mbwe abakhalaki be misango bakharuma elikhuwa mbwe babalekhule mubweo; bulanu chaka lukendo, mani muchie nende omulembe. ³⁷ Arali Paulo yababoolera mbwe, barukhuyire mubwakhakhu arali kata okhukhengera musango ne efwe khuli barumi, khandi barufungire mumboyero; bulanu badakha khururusia mubwefiso? khasi binyalikhana lekha abene beche barurusie. ³⁸ Manu abakhongo babalindi bachia baboolera abakhalaki be misango makhuwa kano ; ni baria, nga babulira mbwe bali Abaroma. ³⁹ Bamala nibeecha nibabekweda nibabarusia erwanyi, babasaba barule mudokho. ⁴⁰ Bamala nibarula mumboyero, manu nibengira munyumba ya Lidia; nga bamala okhulolana nende bakherwa, bababeresia omwoyo, nibamala nibabwao.