¹ Khulondana nende amakhuwa akokhubakholera abatakatifu, esie mbula esifune esio khubandiikira, ² khulwo khubeera manyire oburekekhe bweng'we obwandelayirakho khu baandu ba Makedonia, mbwe Akaya yali yerekekha khurula mwaka kwabwere, khandi esinani sieng'we siberesie mwoyo abaandu bangi. ³ Bulano , ndaruma abakheerwa abo mbwe okhwelaya khwefwe khulwengwe khurakalukhanisibwa mulikhuwa lino, ne munyoole khuba abarekekhe ngolwa ndabola, ⁴ nende lichomo mbwe Abamakedonia nibeecha alala nange, ne nikhubanyola murabeere abarekekhe, ne khureecha khwambisibwa echisoni,khuraboola mbwe eng'we mumbeera eyo eyakhwesika. ⁵ Khulwako ndabona mbwe bikhoyera okhubolera bakheerwa bano mbwe barangirire okhwicha eyo mani banyoole khurekekha ebianwa bieng'we ebiamwalaka, binyole okhuba birekekhe kori nga chikhabi, ne biraba kori nga esindu sirusiibwe mukhuyikwa. ⁶ Ne mbola mbwe, oraaka mubudidi achia khukesa mubudidi, ne oraaka mubungi achia khukesa mubungi. ⁷ Buli muundu akhole kori ngolwa aparire mumwoyo kwaye, ne arakhola musibeera kose mukhuyikwa khaba, khulwo khubeera Nasaye Yakhera ula orusianga khurula mumwoyo mulekhule. ⁸ Ne Nasaye anyala khwichusia obukosia mubungi , mbwe eng'we nimuba nende obunyoolero bufwana burio chinyanga chiosi, munyoole khwedinya musikhole silayi siosi, ⁹ kori ngolwa kaandikwa kari, Yabisalania naberesania abamanani, ne obulungifu bwaye nibwa chinyanga chiosi. ¹⁰ Ne ula oberesania yimwo khu ula oraaka nende omugati kwo khulia, achia khuberasania nende khumeeda mubwichufu yimwo yeng'we eyo khuraaka, khandi achia khumeeda bikese bio bulungifu bweng'we. ¹¹ Ne muchia khuyindisibwa mubiindu bioosi mbwe munyoole okhuba nende obwani, obuchia khukera Nasaye yebasibwe khubirira mwefwe. ¹² Khulwo khuba oburumikhi bwe mirimo kino khasi bwosirisiria abatakatifu obunyolero obwa baleemerwa sa, arali bumeeda okhuba nende ingaanga khulwo khwebasia Nasaye khulwo bunyala bwaye, ¹³ khulwo khuba nimutemibwa muburumikhi obwo, Nasaye afumisibwa khulwo khuria khweng'we mukhfukirira likhuwa lia Kirisito, nende khulwo bwani bweng'we obwa mwambanisiriwamo nende abaandu boosi, ¹⁴ nabo ebene nibasaba khulwo khumenya khweng'we khandi nibababonera obuluwo khulwo khubeera bukosia bwa Nasaye obwechula muno mukari mweng'we. ¹⁵ Kkhwebasia Nasaye khulwe sianwa esiakhuranyala khufumia kori nga bikhoyera.