¹ Bulano esie Paulo mewene basaba mukhweduduya nende obwedemberefu bwa Kirisito, esie oli owo khweyikhia asi nindi alala nang'we, kata nimbulao ndi nende ichuoni khweng'we, ² arali basaba mbwe kata nindiwo, ndareecha ndaba nende ichuoni yo khupara mbwe esie ndi akulu wa baandu bala abaparanga mbwe efwe khukenderanga mumbeera yo mubiri ³ Khulwo khuba kata kario khukendera mumubiri, khasi khukhuyananga mumbeera yo mubiri, ⁴ khulwo khuba ebilwaniro bie liiye liefwe khasi nibio mubiri khaba, arali bili nende obunyala mu Nasaye khulwo khukoka echingoba. ⁵ Khandi nikhukoka amaparo nende buli sindu esiekingula akulu wa makesi ka Nasaye, nikhudira buli maparo kosi mbwe kanyole khuria Kirisito, ⁶ khandi nikhuba aberekekhe khukalukhania amabi koosi, khuula kori ngolwa khuria khweng'we khuchia khulirira. ⁷ Mulingale kala akali imberi weng'we.Ne omuundu niyesubiramo omwene mbwe ali omuundu wa Kirisito, kario Khandi apare mumwoyo kwaye ari kori ngolwa ali omuundu wa Kirisito, nilwo olwa efwe fwesi khuli. ⁸ Khulwo khuba kata nindakhefumiakho budidi khulwo khubeera obunyala bwefwe obwa khwaberesebwa nende Omwami, mbwe khunyole khubombakha, ne khurabakwisia, khasi njia okhwambisibwa chisoni khaba. ⁹ Ne ndarecha ndabonekhana kori nga owenya khubarisia khulwe chibarwa chiange. ¹⁰ Khulwo khubeera abaandu bandi babola bari, chibarwa chiaye nichisiro chia maani, arali omwene naliwo mumubiri nimudekhere, khandi makhuwa kaye khasi nisindu sikhoyera khurekeresia. ¹¹ Omuundu kori oyo amanye mbwe kori ngolwa khuli muchibarwa chiefwe nikhuraliwo, nilwo olwakhuli mubikhole nikhuliwo. ¹² Khulwo khuba khasi khwakhateema khwebalira alala nende bala abefumia abene, kose khwekerania ninabo, arali abene nibakerania chimbeera chiabwe bene khu bene, khasi bali nende obumanyirisi khaba. ¹³ Ne efwe nafwe khasi khunefumia akulu wo bunyala bwefwe, arali khulwo bunyala bwe sikero esia khwapimirwa nende Nasaye, mbwe khunyole obunyala bwo khubolera. ¹⁴ Khulwo khuba khasi khwekhwesa okhira obunyala bwefwe, obeera ori khasi khubolereranga, khubeera khwarangirira khubolerera khubirira muyifanjili ya Kiristo. ¹⁵ Ne khasi khwefumia akulu wo bunyala bwefwe, khubirira mubunyakhani bwa baandu bandi, arali nikhuli nende linaaya mbwe obusubiri bwefwe nibukhula, khunakhusibwa khweng'we mubunyala bwe sikero siefwe nende khunyoola obwichufu, ¹⁶ kata khuyaala ifanjili mubialo bili imberi weng'we, ne khuranyoola khwefumia musikero sio undi khulwa makhuwa kamala khukasibwa. ¹⁷ Ne ula owelaya, yeleyire Mumwami. ¹⁸ Khulwo khuba omuundu ofukirirwa khasi ni ula owelaya mwene okhuba okhoyera, arali ni ula olaywa nende Omwami.