¹ Biakhabere bilayi nimwakhesimiriesie budidi mubusiru bwange mu Nasaye, ne murajonga nange khaba. ² Khulwo khuba esie babonera imbalikha yo Bunasaye, khubeera ndabambania khu musaacha mulala, mbwe nyoole khurerera Kirisito omusisira mulafu. ³ Arali ndi nende oburi mbwe, karakhaba mungira yosi, kori nga injukha yabachirisia Hawa mubikesi kesi biayo, areecha yanyasia maparo keng'we karusibwa khu khweduduya khuli mukari mwa kirisito. ⁴ khulwo khuba omuundu undi neyecha khuyaala Yeso undi owefwe khurayaala, kose nimunyoola roho undi owamuranyoola, kose ifanjili yindi eyamurafukirira, nibilayi mwesimirisie ninaye. ⁵ Khulwo khuba mbaara mbwe khasi ndalemerwa nende esindu siosi esia barume bakhoongo bali nasio. ⁶ Ne kata nindaramanyire khulomaloma mubumanyirisi bwa makesi kange, khwamanyisibwa khweng'we mubuli sindu. ⁷ Nange esie ndakhola sibi siosi khulwo khweduduya mbwe eng'we nang'we munyoole khukingulwa? khulwo khuba ndabayalira ifanjili ya Nasaye mubwakhakhu. ⁸ Ndebera makanisa kandi emiandu kiabwe, nimbukula mukabo kwange khubakholera eng'we. ⁹ Ne nga ndali alala ninang'we, nindi mukhwenya, khasi ndayekhera omuundu yesi yesi, khulwo khuba bila ebiali nibilemukhe, abakheerwa abarula Makedonia bamberesia ebiindu khulondana nende amenya kange, nange esie mwene ndelinda mbwe ndarabayekhera mumakhuwa koosi kata budidi, ne khandi ndachiririra okhwelinda. ¹⁰ Ne okhulondana nende kori obwadieri bwa Kirisito buli mukari mwange, abulao omuundu ochia khungayira okhwefumia khuno, mumbeka chia Akaya. ¹¹ Khulwa sina? Ni khulwobeera mbwe khasi ndabakheera? Nasaye amanyire. ¹² Arali eliakhola ndachiririra khulikhola, mbwe nyoole okhwakamia bala abakonyanga omwoyo kwange baranyoola obweyango, mani babonekhana kori efwe mulikhuwa elio eliabelayirangakho. ¹³ Khulwo khuba abaandu kori abo ni barume bo bubacha, abakholanga mirimo mubwekaadi, abekalukhanianga okhuba abakholi ba Kirisito. ¹⁴ Ne elio khasi liukisia khulwo khuba Sietani mwene yesi yekalukhanianga aba kori malayika wo bulafu. ¹⁵ Khulwako , khasi nilikhuwa likhoongo abakholi baye bosi nibekalukhania okhuba kori nga abakholi bo bwadieri, ne obumalirikhi bwabwe bwakhafwane kori emirimo kiabwe ¹⁶ Khandi mbola mbwe, omuundu arapara mbwe esie ndi musiru, ne kata kario nimumbarira murio, mufukirire sa kori nga omusiru, mbwe nange nyole okhwefumia budidi. ¹⁷ Ne eliambola khasi ni lilako lio Mwami khaba, arali ni kori nga khubusiru, muchuoni yo khwelaya khuno. ¹⁸ Khulwo khuba abaandu bangi befumianga mumbeera yo mubiri, ne esie siesi ndefumia. ¹⁹ Eng'we nang'we, muchiranga alala nende basiru mubusangafu, khulwo khuba muli bakesi. ²⁰ Khulwo khuba muchiranga alala nende omuundu kata nabara mububoye, nabamira, nabadira, niyekingula, nabakhuya mubweni. ²¹ Nomanoma mumbeera yo khweleka obeera ori efwe khwali badekhere.Ne omuundu nali nende ichuoni khulikhuwa liosi liosi, nomanoma mubusiru, esie siesi ndi nende ichuoni ²² Ni Abayiburania nibo? Nende esie siesi. Ni Abayisirayili nibo? Nende esie siesi. Ni bo lwibulo lwa Iburaimu? Nende esie siesi. ²³ Ni abakholi ba Kirisito?nomanoma kori nga omusiru, esie nange khirakho, mukhusanda lukali, mukhuboywa lukali, mukhukhuywa khubira sikero, muliifwa buli lwosi ²⁴ Ndanyoola makhubake makhumi kane nomalokho ndala khurula khu Bayaudi makhabi karano. ²⁵ Makhabi kadaru ndakhuyirwa musarita, likhabi lala ndakhuyirwa makina, imeli yafunikha makhabi kadaru nindi munyanja, ninyoola khuonga siro nende sidere mulusiba lwe inyanja, ²⁶ ndali mukhusamula makhabi mangi, mubudinyu bwa machi, mubudinyu bwa banyuli, budinyu nende abaandu besialo siange, budinyu khu bialo bindi, budinyu bwo mudokho, budinyu bwe sialo sio mulumira, budinyu bwo munyanja, budinyu bwa baana befwe abo bubacha, ²⁷ mukhusanda nende mumanyakhano, mukhuranyalirwa khukona makhabi mangi, munjala nende buluo, mukhusiiba makhabi mangi, khuba mumboo nende siekenye. ²⁸ Ne nolekhana nende akerwanyi ako, kaliwo kandi angachichiranga buli nyanga, khulondana nende obwayi bwa makanisa koosi. ²⁹ Ni wina ali mudekhere, nange esie ndakhaya khuba mudekhere? Ni wina owasinyisibwa nange ndakhaya khubulira buchuni mukari mwange. ³⁰ Ne nibikhoyera khwalaya, ndelaya khulwa makhuwa ko budekhere bwange. ³¹ Nasaye oli Samwana Mwami Yeso, owo luyaali chinyanga chiosi, amanyire mbwe khasi mbacha. ³² Ne omukhoongo asi wo muriki Areta owa Damesiki, yali nalindanga lidokho lia baandu ba Damesiki, mbwe anyole khundiira, ³³ ne nibanjikhisiria musikapo khubirira mulidirisa, ninyoola khuona khurula mumakhono kaye.