¹ Esie nyala ndelaya, kata kario khasi bikhoyera, arali njia khwolerera mumalolo nende obufwimbuli bwo Mwami. ² Aliwo omuundu mulala mukari mwa Kirisito owa manyire, akulu we miaka ekhumi nende kine, ne niyali mumubiri, kose rwanyi wo mubiri, esie khasi manyire khaba, arali Nasaye niye amanyire. Ne omuundu oyo yabukulwa nayirwa akulu mulikulu lio khadaru. ³ Khandi manyire mbwe omuundu oyo, kata niyali mumubiri kose rwanyi wo mubiri, esie khasi manyire arali Nasaye niye amanyire, ⁴ yabukulwa nayirwa muparadiso, ne nabulira amakhuwa akarakherumbula, ako muundu arafukirirwa khukarumbula. ⁵ Nange esie ndelaya mubweyango bwo muundu oyo, ne khasi ndelaya khulwange mwene, arali khulwo budekhere bwange. ⁶ Khulwo khuba esie mba ndenya okhwelaya khasi ndakhabere omusiru khaba, khubeera mbola obwadieri. Arali ndeyikalira mbwe omundu arambalira okhira kala akabona kose akabulira khwesie. ⁷ Ne ndaranyoola khwebulisia khubira sikero, okhulondana nende obungi bwo bufwimbuli obwa ndaberesebwa libwa mumubiri, omurumwa wa Sietani mbwe anyole okhusandia, ne ndarelaya okhubira sikero ⁸ Ne khulondana nende esindu esio, ndasaba Omwami makhabi kadaru mbwe anyole khusindusiamo. ⁹ Naye nayambolera ari, obukosia bwange bukhuyera, khulwo khubeera bunyala bwange buliriranga mubudekhere. Khulwako nde bulisiria budekhere bwange mubusangafu bungi, ne obunyala bwa Kirisito bunyoole khuba akulu wange. ¹⁰ Khulwako, esie kheresibwa nende obudekhere , nende khulekeresibwa, nende masira, nende mateemo, nende budinyu, khulwo khubeera Kirisito. Khulwo khuba nindi mudekhere khumba ndi nende maani. ¹¹ Mbere musiru, ni nengwe mukholere okhuba endio, khulwo khubeera biakhoyera mbwe esie fumisibwe alala ninangwe. khubeera khasi ndali asi wa barume bakhongo mulikhwa liosi, kata nindarali sindu. ¹² Ni bwadieri mbwe ebikhole bia barume biakholwa akari weng'we mubwedemberefu bwoosi, mubikhole nende ebiukisia nende amangalimwa. ¹³ Khubeera ni sina esiamwalemerwa okhira makanisa kandi, arali khulwo khuba esie sindabayekhera? Mundekhere mwako. ¹⁴ Lingera, lino ni likhabi lia khadaru esie khuba murekekhe khwicha oweng'we, ne khasi ndabayekhera. khulwo khuba khasi ngonyanga ebiindu bieng'we, arali ngonyanga eng'we, khubeera khasi bikhoyera abaana khubikhira bebusi babwe imbikhiro, arali abebusi nibo bakhoyere babikhire abaana babwe. ¹⁵ Esie nange ndasalania mubusangafu, khandi ndasalaania khulwo khubeera mioyo kieng'we. Ne ngolwa njiririra khubakheera lukali, khukherwa khwange khududuyanga? ¹⁶ Ne kabe kario,esie khasi ndabayekhera, arali ndabadira mububeyi khulwa makesi kandali nako. ¹⁷ Ne esie ndabukulakho sindu khweng'we khubirira khu muundu owa ndabarumira? ¹⁸ Ndakania Tito, ne ndamuruma alala nende musiani wefwe undi.Tito yababukulakho esindu? kose khasi khwakenderanga mu Roho mulala ula nende mubusenero bula bula? ¹⁹ Mupaara mbwe kata bulona khudakha khwelolesia khweng'we? Khulomalomanga imberi wa Nasaye mukari mwa Kirisito. Ne kene ako koosi ni khulwo khubombakha eng'we bakheerwa. ²⁰ Khulwo khubeera ndi nende oburi mbwe ninjicha khasi ndabanyoola mumbeera eya ndakha, ne mbonekhane khweng'we kori olwa muradakha, ndareecha ndanyola mayingani nende imbalikha, nende lirima, nende busoolo, nende khukhikhira, nende khubulula, nende khweninia, nende milwano, ²¹ nange ninjicha khandi, Nasaye wange areecha yanjikhia asi imberi weng'we, ndelalikhira abaandu bangi abokhola mabi khurula khale, ne khasi bekanira obumali bwabwe, nende obuyirani, nende obulaangu bwabakhola.