¹ Lino ni likhabi liange elia khadaru okhwicha oweng'we. Buli likhuwa lichia khulirira khu minwa kia baloli babiri kose badaru. ² Malire khubabolera, khandi kori nga ndaliwo likhabi lia khabiri, khandi kario nindaraliwo, mbolera bala abakhola chimbi khurula mukhuchaka, nende abandi boosi, mbwe ninjicha, khasi njia khubelalikhira khaba, ³ khulwo khuba mukonyanga simanyiro sia Kirisito olomalomanga mukari mwange, orali mudekhere khweng'we, arali ali nende obunyala mukari mweng'we. ⁴ khulwo khuba yabambwa mubudekhere, ne yamenya khulwa maani ka Nasaye. Ne efwe fwesi khuli badekhere mukari mwaye, ne khuchia khumenya ninaye khulwo bunyala bwa Nasaye obuli mukari mweng'we. ⁵ Mwelingale eng'we bene nibili mbwe muli mubusubiri, mwemanyirisie abene. Kose khasi mwemanyire eng'we bene, mbwe Yeso Kirisito ali mukari mweng'we? Muraba abakhayibwa. ⁶ Arali subira mbwe munamanyirisia mbwe efwe khasi khwakhaywa khaba. ⁷ Bulano khusaba Nasaye mbwe murakhola elibi liosi liosi, khasi bili mbwe efwe khunyoole khubonekhana okhuba abafukirirwe, arali eng'we mukhola elikhoyera, kata efwe nikhuli kori abaandu bakhayibwa. ⁸ Khulwo khuba efwe khasi khunyala okhukhola likhuwa liosi elirali eliobwadieri, arali ni khubwadieri sa. ⁹ Khubera efwe khusangaala nikhuli badekhere, nang'we nimuli nende amaani. Khandi khusaba mbwe lino liolerere khweng'we. ¹⁰ Khulwako, esie nyandiika kano nimbulao, ne nimbao, ndarekhonyera obwalaba khulwo bunyala bula obwandaberesibwa nende Omwami, khulwo khumbakha ne khasi ni khulwo khukoka khaba ¹¹ Mukhumala, abakheerwa, muchiririre bilayi, mulirire, mulemisibwe, mube nende mapaaro malala, mumenye mumulembe, ne Nasaye wo bukheri nende mulembe achia khuba ninang'we. ¹² Mukhesanie mukhuchunjunana khutakatifu. ¹³ Abatakatifu boosi babakhesia. Obukosia bwo Mwami Yeso Kirisito,nende obukheri bwa Nasaye,nende obusngirani bwa Roho mulafu bube ninang'we mweesi. Kebe kario.