¹ Khandi baana bwefwe, khubabolera makhuwa ko bukosia bwa Nasaye, obwa makanisa ka Makedonia kaberesibwa, ² khulwo khuba ngolwa bali nibateemwa mumanyakhano mangi, obungi bwa isangaalo yabwe nende obumanani bwabwe bwali bungi obwamwamederwa obuyiinda bwo bwani bwa bwe. ³ Khulwo khuba babarusiria obuloli mbwe khulwo bunyala bwabwe , nende khulwo khukheera khwabwe bene, barusia ebiindu biabwe, ⁴ nibarusaba muno alala nende khurwekweeda khulwa makhuwa ko bukosia buno, nende obwambani buno , nende khukhalabanira abatakatifu. ⁵ Ne kene kano khasi kekholehana kori nga khwali khuparire, arali barangira berusia khu Mwami, ne nibamala niberusia khwefwe khulwe lienya lia Nasaye ⁶ Khulwako khwasaba Tito owachakisia mirimo kino, mbwe amalirisie emirimo kio bukosia kino. ⁷ Ne muli nende obungi bwa makhuwa koosi, mubusubiri,nende mukhulomaloma, nende mumakesi, nende esinani siosi, nende mubukheeri bweng'we khwefwe, khandi kario munyoole khuchiririra muyikhola yo bukosia yino. ⁸ Khasi mbola khulwo khubaberesia lilako, arali ni khulwo khudakha khumanyirisia obwadieri bwo bukheri bweng'we nikhukerania nende sinani sia baandu bandi. ⁹ Khulwo khuba mumanyire obukosia bwo Mwami wefwe Yeso Kirisito , mbwe kata kario yali omuyinda, yekhola omumanani mbwe eng'we munyoole okhuba bayinda. ¹⁰ Lino nilio elikerako liange ilibakhoyera mulikhuwa lino. Mwaka kwabwere khasi mwali abamberi mukhurusia khwongene, arali nende okhuba nende omwoyo kwo khukhola. ¹¹ Ne bulano musirisie khukhola khula ngolwa mwali abarekekhe khwenya okhola murio, kario mube abarekekhe okhusirisia mubunyala bwa muli nabwo. ¹² Khulwo khuba linaaya nililiwo, omuundu afukirirwa khulondana nende ebiayali nabio, ne khasi nikhulondana nende ebia bula nabio. ¹³ Ne khasi mboola kano mbwe abaandu bandi banyoole isangaalo nang'we munyoole ebidinyu, ¹⁴ arali amakhuwa kabe akayeraana mubikha bia bulano obungi bweng'we bubakhoyera mubulemufu bwabwe, ne obungi bwabwe bubakhoyera eng'we nimuralemerwa mani khube nende khuyeraana. ¹⁵ Kori kaandikwa mbwe owabusia ebingi khasi yali nende bingi okhirao, ne ula owabusia bididi khasi yalemerwa sio sio. ¹⁶ Ne khwebasie Nasaye Ula Orechaanga esinani sila mukari mwo mwoyo kwa Tito khulweng'we. ¹⁷ Nibwadieri mbwe yafukirira amakerako, khandi niyedinya khuba nende sinani, yasamula khuchia oweng'we khulwo khukheera khwaye mwene. ¹⁸ Ne alala ninaye, khwaruma omusiani wefwe ula owe ifuma yaye khubirira khuyifanjili yasalaana mumakanisa kosi. ¹⁹ Khandi khasi nako kongene sa, arali yalobolwa nende makanisa , mbwe asamule alala ninafwe khulikhuwa elio bukosia buno , obwakhalabaniranga, mbwe Omwami afumisibwe ne burekekhe bwefwe bubonekhane. ²⁰ Nikhwekaya nende likhuwa lino, omuundu areecha yarubululira khulwa makhuwa ke sianwa sino esia khwekhonyisiria. ²¹ Khasi khupaara okhola akali malayi imberi wo Mwami sa, arali nende imberi wa baandu. ²² Nafwe alala nabo khurumire musiani wefwe owakhwabona bikha bingi mumakhuwa mangi nali nende esinani, ne kata bulano ali nende sinani muno khulwe linaaya likhoongo elia ali nalio khweng'we. ²³ Bulano omoundu niyenya amakhuwa ka Tito, ye niye omwambani , khandi omukholi we mirimo alala nange khulweng'we, khandi khulwa makhuwa ka baana befwe, ne nibo abarumwa ba makanisa nende oluyaali lwa makanisa, ²⁴ mbwe mubekesie imberi wa makanisa obwadieri bwo bukheri bweng'we , nende okhwelaya khwefwe khulweng'we.