¹ Bulano abakheerwa bange, khulwo khuba khuli nende amalakano kano, khunyoole khwelabia chimbeera chiefwe khurula mubumali bwoosi obwo mubiri nende mwoyo eno nikhusiirisia obutakatifu mukhwechomia Nasaye. ² Mure obweyango mumioyo kieng'we, khasi khwakholera omuundu yesi yesi libi, kose khusasia omuundu yesi yesi. ³ Khasi mboola likhuwa elio khulwo khubakhalakira, khulwo khuba ndangirire khuboola mbwe eng'we muli mumioyo kiefwe, kata mukhufwa alala nende khumenya alala. ⁴ Ndi nende ichuoni khweng'we, khandi ndi nende oluyaali lukhoongo khweng'we, ne njichusibwe nende khulemisibwa omwoyo, khandi njichusibwe nende obusangaafu okhira sikero mumanyakhano kefwe koosi. ⁵ khulwo Khuba ngolwa khwola Makedonia mibiri kiefwe khasi kianyoola khubulukha, arali khwasandisibwa buli chimbeka , erwanyi khwali nende eliiye, mukari khwali nende oburi. ⁶ Arali Nasaye adinyisianga badekhere, yarudinyisia khubirira mukhwicha khwa Tito. ⁷ Ne khasi nikhukhwicha khwaye sa, arali okhudinyisibwa khula okhwa yadinysibwa ninang'we, narubolera amakhuwa keng'we akobuluwo nende khulirira khweng'we, nende esinani sieng'we khulwo khubeera esie, nange ndachiririra khusangaala lukali. ⁸ Khulwo khuba kata nakali mbwe ndabasinyisia mubarwa yila, khasi ndekanira, ne kata nindekanira mbona mbwe ibarwa yila yabadinyisia, kata kario khu bikha bididi sa. ⁹ Bulano sangaala, ne khasi ni khulwo khusinyisibwa khweng'we, arali khulwo khubeera khusinyisibwa khweng'we khwabanyalira khwekanira, khulwo khuba mwasinyisibwa mumbeera ya Nasaye mbwe muranyoola khukosia mulikhwa liosi liosi. ¹⁰ Khulwo khubeera esibera esili esia yifwani ya Nasaye sikholanga khwekanira okhurera obuonia obubula esifune esio khuberera, ne esio musialo sireranga liifwa. ¹¹ Ne mulingere mbwe okhubererera khwene khwo okhwa imbeera ya Nasaye khwakhola khuria mukari mweng'we, nende khwerusiamo, nende khusinyikha, nende oburi,nende obuluwo, nende khwedinya, nende khurunga libi khu libi, muyingira yosi muyekesie abene khuba abalafu khu likhuwa elio. ¹² Khulwako ,kata kario ndabandiikira, khasi ndabandiikira khulwa ula owakhola mabi, kose ula owakholerwa mabi, arali mbwe esinani sieng'we khulwo khubeera efwe sibonekhane imberi wa Nasaye. ¹³ Khwadinyisibwa khulwa kene ako, mukhudinyisibwa khwefwe khwasangaala okhira sikero khubeera obusangaafu bwa Tito, khulwo khuba eng'we mweesi mwsangasia omwoyo kwaye. ¹⁴ Khubeera mbwe nindelaya imberi waye mulikhuwa liosi khubeera eng'we, khasi ndambisibwa chisoni, arali kori ngolwa khwababolera amakhuwa koosi mubwadiera, khukario okhwelaya khwefwe khu Tito khwali okhwo bwadieri. ¹⁵ Ne obukheri bwaye khwengwe bubere obungi okhukhira sikero ,niyechulisia okhuria khweng'we mwesi ngolwa mwamwingisia muburi nende khurengerakha. ¹⁶ Khulwa kene ako, ndi nende ichuoni mweng'we mumakhuwa koosi.