¹ Khandi efwe khwakhachaka khwefumia abene? Kose khudakha chibarua chio khufumia khweng'we kose khurula khweng'we kori nga baandu bandi? ² Eng'we bene neng'we ibarwa yefwe eyo khufumia, eyandikibwa khu mioyo kiefwe,eyamanyikhana niyisomwa nende baandu boosi. ³ Ngolwa mwamanyisibwa obulafu okhuba ibarwa ya Kirisito eya efwe khwareresia, eyirandikibwa nende obuyino, arali nende Roho wa Nasaye oli mulamu. Ne khasi kandikwa khu chimbao chia makina, arali ni khu mioyo kia baandu. ⁴ Ne khuli nende lisubira lie ingira ino imberi wa Nasaye khubirira khu Kirisito. ⁵ Khasi bili mbwe efwe bene khuyera khubola mbwe sindu sio siosi sirula khwefwe, arali khulira khwefwe khurula khu Nasaye. ⁶ Nasaye niye yarukhola khuba abakholi be lilakano liyaakha. Ne lino khasi ni lilakano lie liandiko arali ni lia Roho. Khulwo khuba liandoko liira naye Roho arera bulamu. ⁷ Arali okhukhola khwe liifwa okhwandikwa nende khuchorwa khu makina, kali akoluyaali, kata mbwe abaana ba Isiraili sibenya khulola obweni bwa Musa khulwo khubeera oluyaali lwali khubweni bwaye, ne lwali oluyaali lubira. ⁸ Okhukhola khwa Roho nakhwo sikhuchia okhirakhoo muluyaali? ⁹ Khulwo khuba nikali mbwe obukholi bwo bukhalaki bwali nende luyaali, ne obwo bulungifu nabwo buchia khuba nende luyaali lwaka lurie? ¹⁰ Khulwo khuba sila esiakholwa okhuba esia luyaali khasi siali oluyaali mumbera yino, khulwe sifune esio luyaali olusikhira. ¹¹ Khulwo khuba nakali mbwe sila esiali sibira siali nende luyaali, ne sila esia chinyanga chiosi sichia khuba nende luyaali lwaka lurie? ¹² Bulano kori khuli nende lisubira elio, khuli nende ichuoni. ¹³ Efwe nafwe khasi khuli kori Musa owefunikha lububi mubweni bwaye mbwe abaana ba Isiraili baranyalirwa khulola obumalirikhi bwo luyaali lula olubira. ¹⁴ Arali maparo kabwe kakholwa okhuba momu. Khulwo khuba okhuula inyanga yino nibasoma lilakano likhale, olububi lula lubasirikho sa. Lusiri khumalwao, kuhlwo khuba bili mbwe lumalweo mukari mwa Kirisito. ¹⁵ Arali okhuula inyanga yino, olububi lufunikhanga emioyo kiabwe nibasoma khu Musa. ¹⁶ Kata kario, omundu niyecha khu Kirsito, olububi lurusibwao. ¹⁷ Bulano omwami ni Roho, ne owa Roho wa Mwami ali, obulekhule buliwo. ¹⁸ Bulano efwe fwesi abali nende obweni bwamalwakho lububi, khulolanga oluyaali lwo Mwami. Ne khukalukhanisibwanga nikhwingisibwa mufwani yo luyaali lwene olwo khurula khu luyaali nikhuchia khu luyaali lundi, kori khurula khu Mwami, oli Roho.