¹ Yeesu yalaanga halala veechitswi veeve likhomi na vaviri,navaha tsinguul nu vunyali vu khukhuunga matimoni koosi nu khuhonyinya vaandu vulwaale. ² Yeesu ya va rhuma khutsia khwirlwaatsa makhuuva khuloondekhana khu vwaami vwa Nyasaaye, khaandi khuhoonyinya vaandu vali ni valwaala. ³ Yavoola,"Mukhachiingi khu shiindu shyoosi khu lucheendo, anoho musiiko ku khusuumiramu, anoho mukati anoho tsisenti.Khali mukhajiingi inguvu yiindi ya khaviri. ⁴ Havuundu hoosi ha vamuliinjilitsa, muliitsa khumenya muunsu mweene yomo , khutuukha lwa muliitsa khurhula mulitaala lyeene yelo. ⁵ Niiva vaandu valiitsa khwaambakhana khu mwiinjilitsa, lwa muliitsa khuva nu murhulaanga mu litaala lyaavo, mwenyekha musuunguse lukushi luli khuvireenje vyeenyu, khuvamanyinya ndi muleechi." ⁶ Veechitswi vaarhula nivatsia, nivavirira hawoosi mu michiitsi, nivirwaatsaanga Ivaanjeri khaandi nivahonyinya vaandu vali nivalwaala vuli havuundu hoosi. ⁷ Lwa Herode, yali nali mwaami wu lusomo lwa Galilaya yahulira vuli shiindu shyoosi shyali nishikhorekhaanga, yali ni liiheenda mwooyo, shichira likhuuva lyahulilikhana, nilivoolwaangwa ndi Yohaana Mupatisi umali khwiisimukukha khurhula mu liikhutsa. ⁸ Vaandi vavoolaanga ndi Eliya umali khulolekha;na vaandi ni vavoola ndi, mulala khu vaporofeti va khale umali khwiisimukukha khurhula mu liikhutsa. ⁹ Herode yavoola,"Niinse wakhalaka murhwii kwa Yohaana; navutswa ni wiina wuyu, wambuliraanga viindu vinyiikhi khulondekana khuye?" Yakhaava khuli anyala khumolora Yeesu. ¹⁰ Lwa varhumwa vakalukha , vavoolera Yeesu kavali ni va kholi.Yeesu yavavukula natsia navo mulitaala lya Bethesaida. ¹¹ Lwa vituma vya vaandu vahuulira ndyo,vamuloonda.Yeesu yaviinjilitsa, nalomoloma khuvo makhuuva khuloondekhana khu vwaami vwa Nyasaaye, khaandi na honyinya yavo veenyaanga khuhonyinywa. ¹² Lwa lyuuva lyaali liraangaanga khuyeera, veechitswi veeve likhomi na vaviri, vatsya khu Yeesu ni vavoola, "Seevula vaandu khu vatsii mu michiitsi nu mumiliimi chili hiimbi hanu vikhaavire shyukhulya shya valyaa khaandi havenya khukona; shichira havuundu hanu ni hiivisu." ¹³ Navutswa Yeesu yavavoolera ,"Munye veene muvahee shyukhulya sha vanyala khulya." navo vavoola, :khuli vutswa ni mikati chirhaanu ni tsisutsi tsiviri tsyonyeene --- hawuundi nukhutsire khuvakulira shyuukhulya shitukha vaandu yava voosi." ¹⁴ Khwaliho na vasaatsa vatukha hiimbi tsiheelefu tsirhaanu.Navutswa Yeesu yavoolera veechitswi veeve,"Vavooleri viikhare mu vituma, vuli shilala, hiimbi khuli vaandu makhomi karhaanu karhaanu." ¹⁵ Veechitswi veeve vakhola ndyo;nivikhalitsa vaandu voosi hasi. ¹⁶ Yeesu yavukula mikati chirhanu ni tsisuutsi tsiviri, naheensa mwikulu, nasaanditsa Nyasaaye shichira vyoo. Yatong'olanyinya , khaandi naaha veechitswi veeve vakavuliire vaandu. ¹⁷ Vaandu voosi valya, ni viikurha.Khulwa yako, veechitswi vavuncheeritsa mihiinda lihomi na chiviri chi shyukhlya chaarhikala. ¹⁸ Liitukhu lindi, lwa Yeesu yali nasaalaanga ye woonyeene, veechitswi veeve vatsia khuye.Yavarheeva," Vituma vya vaandu vivoola yiinse ndi wiina?" ¹⁹ Vamurhevuliira, "Valala vavoolaanga uli Yohaana Mupatisi; vaandi vavoolaanga uli Eliya; navutswa valala vavoolanga uli mulala khu vaporofeti vali vakhale wiisimukukha khurhula mu liikhutsa." ²⁰ Yeesu yavarheeva, "Navutswa munye muvoolaanga yiinse ndi wiina?"Petero yamurheevulira, "Uli Masiha wa Nyasaaye." ²¹ Navutswa Yeesu yavakaya vavule khuvoolerakhu muundu makhuuva keene yako. ²² Yeeesu yavoola khaandi, "Khutuukha Mwaana wu Muundu aliitsa khunyakhana khuvirhila mu viindu vinyiikhi, ma vasaakhulu, vasaaliisi vakali,na veechitsi va malako, vamwambakhane.Aliitsa khwiirhwa navutswa matukhu kavaka ni kakhavirha, aliitsa khwiisimukukhitswa khurhula mu liikhutsa." ²³ Yeesu yavavoolera voosi, "Niiva muundu yenyaanga khunoonda, aliitsa khwiilekhitsa liiva lyelye, nu khujiinga musalaba kweekwe shya khase khoosi;ma anoonde. ²⁴ Muundu wenyaanga khu honyinya vulamu vweevwe, aliitsa khuvukorhitsa; navutswa muundu weenyaanga khukorhitsa vulamu vweevwe shichira liirha lyaanje, aliitsa khuvuhonyinya. ²⁵ Nu vukhala shiina vwa muundu anyala khunyola ,niiva anyala khunyola shya shiindu shyoosi mu shivala, navutswa akorhitse vulamu vweevwe anoho akurhwee? ²⁶ Niiva muundu alandolera inse na meechitso kaanje tsiisoni, Mwaana wu Muundu aliitsa khumulolera khumulolera tsisoni, lwa aliitsa khukaluka mu vukhumi vweevwe khaandi mu vukhumi vwa Taata weewe, halala ni tsingerosi tsindakatifu. ²⁷ Musuuviritsa ndi khuli na vaandu valala haanu valiitsa khuvula khukhutsa, nivashili khulola Vwaami vwa Nyasaaye." ²⁸ Matukhu nikakhavirha hiimbi munane, lwa Yeesu yali na mali khuvoola viindu vyeene yevo, yavukula Petero, Yohaana, na Yakobo nasimukha navo khutsya khusaala khu shikulu. ²⁹ Lwa Yeesu yali nasaalanga, likoondo lyelye lyakalukhana, ma tsinguvu tsyetsye nitsyang'aang'aa vulavu tswee. ³⁰ Na heensa vaandu vaviri , nivali Musa nende Eliya valolekha ni valomoloma na Yeesu, ³¹ vaalorekha mu vukhumi vu mwikulu ni valomoloma na Yeesu khulondekhana khuli arhweekhitsa lyeenya lya Nyasaaye vwaangu yuvu, lwa aliitsa khukhutsira mu Yerusalemi. ³² Petero na veshyeenye vaviri vali vakonaanga tsindoolo,navutswa lwa vaavukha, valoola vukhumi vwa Yeesu nende vaandu vaviri, nivasiinjire naye. ³³ Lwa vaandu veene yavo vali ni valekhaanga Yeesu, Petero yavoolera Yeesu, "mwaami nu vulahi khuli hanu! Khuluumbakha matili kavaka,lilala lyolyo, liindi lya Musa, na liindi lya Eliya"(Shikali yali namanyi makhuuva ka yavoolaanga taawe). ³⁴ Lwa yali na shivoola yaka, malesi kiikha ni kava khunikha; ma veechitswi veeve ni varhia lwa malesi kali ikulu wavo. ³⁵ Mwooyo kwarhula mu malesi, nu kuvola, "Uyu naye Mwaana waanje , wa ndarhovola, mumuhuliikhitse!" ³⁶ Lwa mwooyo kweene yoko kwali nu kumali khuvoola ndyo, vanyola Yessu nali woonyene vutswa.Veechitswi veeve vaveho vutswa mulishiling'ana shichira keene yako koosi, ni vavula khuvoolerakhu muundu ka vali ni valoori mu matukhu keene yako. ³⁷ Khulitukhu lyaloondakhu , Yeesu na veechitswi veeve vavaka vakholomokha hasi nivarhula khu shikulu , na shituma shikali sha vaandu va mwakaanila Yeesu. ³⁸ Muundu mulala khurhula mu shituma sha vaandu, yalaanjirhira navoola,"Mweechitsi, nuyaansa mbeentserakhu mwaana waanje muteerwa wuyu. ³⁹ Litimoni limwiinjililaanga, ma raanga khukhupa tsikhwiiri nu khulanjirira.Limusiuvaanga hasi , ashiinda, ma luhuulu lwaansa khurhula mumunwa mweemwe.Liamenya limusaliritsaanga vuchira khu mulekha. ⁴⁰ Mboolere veechitswi voovo nivayaansa valikhuunge, navutswa varhaamilwe khulikhuunga." ⁴¹ Yeesu yamurheevulira khu lukhuvoola, "Munye liikhula litaamanu lyativa,khaandi vilisuuvira litiititi! Mweenyaanga mbe na munye khutuukha luhoono shiina? Mwenyaanga ntsilirire khwiikhutsira na munyee khutukha liina?Leerha muyayi woowo yaha." ⁴² Lwa mwaana yali naleerhwaanga,litimoni lyamurhula hasi, narhaanga khushiinda.Navutswa Yeesu yakondekhera litimoni ,nahonyinya mwaana mweene woyo, naha taata weewe. ⁴³ Vaandu voosi vali ni licheenya , shichira vunyali vwi tsingulu tsya Nyasaaye. Lwa vaandu vali nivashikanakana khu viindu vya Yeesu yali na kholaanga, Yeesu yavoolera veechitswi veeve, ⁴⁴ "Mukhiviriri mukhuuva kaanje ndi Mwaana wu Muundu atsitsaanga khutsaamwa khu vaandu ⁴⁵ Navutswa veechitswi veeve vakorhwaa kayali na voolaanga.Vali vaviiswa limanya, khu valivula khumanya; khaandi varhia khumurheeva shya makhuuva keene yako kavoolaanga. ⁴⁶ Veechitswi va Yeesu varheevana veene khu veene nu wiina wali mukali muno' ⁴⁷ Navutswa lwa Yeesu yali namanyi ka vakanakanaanga,yavukula mwaana na musiinjilitsa hiimbi khuye, ⁴⁸ na vavoolera Muundu wiinjilitsaanga mwaana uyu khuvirhira mu liirha lyaanje, ansinjilitsaanga; khaandi muundu unsinjilitsaanga, shikanyala khuva ansinjilitsaanga woonyene taawe,navutswa yinjilitsaanga khaandi woyo wanduma; shichira muundu uli mutiititi mu munye voosi, naye mukali muno." ⁴⁹ Yohaana yalomoloma navoola, :Murhuchi, khulooli muundu na khuungaanga motimoni mu liirha lyolyo, ma khulamukaya alekhe, shichira shyali mulala khu shituma shyeru." ⁵⁰ Navutswa Yeesu yamuvoolera, "Muvule khumukaya, shichira woyo ukhahiinganyinyaanga munye nu weenyu." ⁵¹ Lwa matukhu kali hiimbi khutukha ka Yeesu ahiliilwa mwiikulu; yakanakana nava nu vuha vukhutsia Yerusalemi. ⁵² Yarhuma varhumwa imbeli weewe, ni vatsia mu muchiitsi kuli Samaria khumurhechekhera havundu. ⁵³ Navutswa vaandu vi iweeneyo vambakhana khumwiinjilitsa ; shichira yali ni liichomo lyu khutsia Yerusalemi. ⁵⁴ Lwa veechitswi veeve , ni vali Yakobo, na Yohaana valola ndyo, varheeva ,"Mwaami, weenyaanga khusaale mulirho kurhule mwiikulu khwiitsa khuvamulula?" ⁵⁵ Yeesu yishyevukhu navakondekherha. ⁵⁶ Khu lwa yako, Yeesu na veechitswi veeve vasimukha ni vatsia mu muchiitsi kuundi. ⁵⁷ Lwa vali ni vali khu lucheendo lwaavo, muundu wundi yavoolera Yeesu."Ndiitsa khu khuloonda shya havundu hoosi haweenyaanga khutsia." ⁵⁸ Yeesu ya muvoolera, "Vivwee vimenyaanga mu vwiina, na manyonyi kamenyaanga muvitsu; navutswa Mwaana wu Muundu avulakhu havundu hanyala khukona na huluukha." ⁵⁹ Yeesu yavoolera muundu wundi ,"Noonda." Navutswa muundu mweene woyo yavoola, "Mwaami, leekha nsi ndange khuyavirha mmbiri kwa taata waanje mu shiliindwa." ⁶⁰ Navutswa Yeesu yamuvoolera, "Leekha vaandu vakhutsu vayavirhee mu shiliindwa mmbiri cha vaandu vakhutsu vaavo veene; navutswa simukha utsi khwirwaatsa makhuuva khulondekhana khu vwaami vwa Nyasaaye." ⁶¹ Muundu wundi yavoola, "Mwaami ndiitsa khu khuloonda; navutswa leekha nsii khuhaana mireembe chu khulekhana khuvaandu vi insu yaanje." ⁶² Yeesu yamuvoolra, Muundu uvukulaanga lijeembe lyu khulimira nu khwiishevukha inyuma avula vukhonyi mu Vwaami vwa Nyasaaye."