¹ Matukhu mati lwakamala khuviirha, Yeesu yacheenda na khalakanyila mu mataala nu mu michiitsi, niyrwaatsa Ivanjeri khulondekhana khu vwaami vwa Nyasaaye.Veechitswi veeve likhomi na vaviri ,vasimukha ni vatsia naye. ² Khaandi vaandu vakhali vaandi vali ni vahonyinywa khurhula mu mirooho mitaamanu nu vulwaale , vasimukha nivatsia naye;navo ni Mariya, walaangwangwa liirha lindi Magadalena; wa matimoni saba kali ni karhulamu; ³ na Yoani, nali mukhali wa Kutsa wali mulala khu varhumikhi vasinjiriraanga insu yu mwaami ya Herode;Susana, na vakhali vaandi vanyiishi varhumikhila miandu chavo khukhonya Yeesu na veechitswi veeve. ⁴ Lwa shituma shikali shya vaandu vakaanira halala, khaandi vaandu ni varhula mu mataala lukanu , Yeesu yavavoolera lukanu yulu, ⁵ "Litukhu lilara, muundu yasimukha natsia khumitsa vukuutsa vweevwe. Lwa yali namitsaanga vukuutsa mu mulimi, vulalakhuvwo vwakwa khunjira, ma vaandu ni vavuseena ni vileenje, khaandi manyonyi kiitsa ni kavuvootsa, ⁶ Vukuutsa vuundi vwakwaa khu lwaanda;lwa vwaama, vwaniala shichira liirova liali na maatsi mati. ⁷ Vukuutsa vuundi vwakwa mu mawa,; nu vwaama khaandi mawa ni kavutsoma. ⁸ Vukuutsa vundi vwakwa mulirova liinulu, manuvumeera; ma nuvwaama vyaamo imia indala."Lwa Yeesu yavoola ndyo, yamalira khuvoola, Wooyo uli na marhoyi ku khuhulira, na ahurikhitse." ⁹ Khu lwa yako, veechitswi varheeva Yeesu avavoolere shya lukanu lweene yolo luvoolaanga; ¹⁰ ma Yeesu na vavoolera, "Munye mwaheerwa vucheri khumanya kaaviswa ku vwaami vwa Nyasaaye ; navutswa vaandu voosi, valiitsa khu kanyola khuvirila mu tsiinganu, khu khali vaheensa shivaliitsa khulola,khaandi ni va hulikhitsa, shivaliitsa khumanya taawe. ¹¹ "Yaka nako ku lukanu khu mumiitsi luvoolaanga:lukuutsa ni likhuuva lya Nyasaaye. ¹² Vukuutsa vwakwa khuunjira,navo vaandu vahuliraanga likhuuva; navutswa Ibilisi yitsaanga khaandi avanuula likhuuva khurhula mu myooyo chyavo,,khuvikalira vavule khu suuvira nu khuhonyinywa. ¹³ Vukuutsa vwakwa mu tsimbuyee(lwaanda) navo vaandu vahuliraanga likhuuva ;valiinjritsa nu vusaangali, navutswa shilinjilaanga muvo mukarhi taawe; vasuuviraanga khu lwinyiinga intiititi,navutswa lwa matukhu ka macheritso kiitsaanga, valekha liisuuvira. ¹⁴ Vukuutsa vwakwa mu mahwa,navo vaandu vahuliraanga likhuuva; navutswa liheenda mwooyo ni myaandu , ni likoomba lyu mu limenya lyu mushivala shiinu liitsulaanga mu myooyo chyaavo, ma lisuuvira lyaavo lyoonekha, khaandi shivanyala khuhiindira taawe. ¹⁵ Vukuutsa vwakwa mulirova liinulu, navo vaandu vahuliraanga likhuuva,vahaanda khu nu mwooyo mulahi khaandi kwi liisuuvira, ma viikhutsira khutuukha lwa vaama matuunda. ¹⁶ Avulakhuho muundu uhaambitsaanga itaaha ma achikhunikhira mu muhiinda, anoho achiviikha mulwaalo mwiishitali, navutswa achirenjekhaanga khu shikurhu shi itaaha, khu vaandu vinjila munsu valole vulaavu. ¹⁷ Shiindu shyoosi shaviswa shiliitsa khuvikhwa havulavu;khaandi shiindu shyoosi shakhunikhwa shiliitsa khukhuunulwa. ¹⁸ Muve vacheeri khu kamuhulira,Muundu ulii ni shiindu shyoosi aliitsa khumeetwa viindu viindi mu vunyiikhi, navutswa muundu uvula shiindu shyoosi, khali shitiititi shali nashyo, aliitsa khunuulwa." ¹⁹ Litukhu liindi mama wa Yeesu na vamwaavo va Yeesu viitsa khuye,navutswa shivatuukha khuye taawe,shichira shituma sha vaandu. ²⁰ Muundu wundi yavoolera Yeesu,"Mama woowo na vamwaavo voovo vasiinjire ilwaanyi, khaandi venyaanga khulomoloma na yiiwe." ²¹ Navutswa Yeesu yamurheevulira nu khu muvoolera, "Mama waanje na vamwaavo vaanje ni yavo vahuliraanga likhuuva lya Nyasaaye, ma vakhola kiliikhuuva lyeene yelo livvoolaanga. ²² Litukhu liindi Yeesu yiinjira mulyarho na veechitswi veeve, navavoolera, "Cheendi khwaambukhe khutsi luveka luundi lywi inyaansa yoolo!" Vasimukha niivatsya. ²³ Lwa vali nivambukhaanga inyaansa, Yeesu yakona tsindoolo.Naho noho imbuutsa inditoho yahuutsa khuyinyaansa, na maatsi ni karaanga khwiitsula mulyarho,khali ni vava mu marhava. ²⁴ Veechitswi vatsia khu Yeesu ni vamuvukhitsa ; ni vavoora, "Mweechitsi! Khuli hiimbi khukhutsa! nalwo lwa Yeesu yavukha nu khukondekhera imbuutsa ni vikuvuli; visinjira khali maatsi nikasiinjira. ²⁵ Yeesu yavarheeva, Lisuuvira lyeenyu lili heena?'' Veechitswi varhia,nivacheenya ni va voolerana veene khu veene,Nu muundu shiina uyu?akondekhera nu khuhaana malako khu imbuutsa ni vikuvuli viinyaansa na vimuhulira!" ²⁶ Yeesu na veechitswi veeve vambukha ni lyarho nivatuukha lusomo lwa Gerasini, khuluveka luli ivuukwi wii inyaansa ya Galilaya. ²⁷ Lwa Yeesu yali ni yakharhula mulyarho, yaakaana nu muundu wa matimoni kali muye.Muundu mweene woyo yacheendaanga sheekenye khu lwa matukhu manyiikhi, niyiirhukha khumenya haango; navutswa namenyaanga muviliindwa wa vayaviraanga miviri cha vakhutsu. ²⁸ Lwa muundu mweene woyo yalola Yeesu, yalira ma na sikama imberi weewe,nu khuhaansukha nu mwoyo mukali, "Yeesu, Mwaana wa Nyasaaye Uli Ikulu khu Vyoosi! Weenya khukhola ndiina yinse! Nuyaansa ukhasaalilitsa, ²⁹ Muundu mweene woyo yavoola ndyo shichira Yeesu yali na koondekhere litimoni khurhula muye.Litimoni lya mukumiraanga vuli khase; khali niiva yali muvohee, yali yavohwa ni minyololo chi vivhya khu vileenje vyeevyee na makhono keeke; navutswa yaakutulanyinyaanga minyolo, ma litimoni limuhila mu shaangalaangwe. ³⁰ Yeesu yamurheeva, "Liirha lyoolyo nu wiina?" Muundu mweene wooyo yamurhevulira, "Legioni,"Shichira matimoni manyiikhi kali kayinjira muye. ³¹ Matimoni keene yako kamusaya Yeesu nayaansa avule khukakhunganyinya khutsia mu shihatisi. ³² v32Shituma shikali shi shyayo shi tsiingulume, shaliho nitsiliitsaanga shyukhulya khuundulu khwii shikulu.Matimoni kaasaya Yeesu nayaansa akavujilire khutsia mu tsiingulume.Na Yeesu yakaseevula katsii. ³³ Matimoni kaarhula mu muundu mweene wooyo, nikiinjira mu tsiingulume ,ma shayo shyoosi shi tsiingulume ni shikholomokha khurhula khu shikulu, nitsitsia mu inyaansa ma nishikhamiramu. ³⁴ Lwa vaandu valiindaanga tsingulume valoola kali ni kakholekhe, vilukhaka ni vavoolera vaandu vi litaala likali khaandi shya havuundu hoosi. ³⁵ Vaandu vasimukha nivatsia khulola makhuva kali ni kikholekhe,na lwavatuukha khu Yeesu, vanyoola muundu wi litimoni lyaalimu ni lirhuli muye, niyiikhale hiimbi khu Yeesu, ni yiifwaali tsiinguvu khaandi nali mulamu; ma ni varhia. ³⁶ Vaandu vali ni valooli keene yako, vavoolera vaandi khuli muundu wi litimoni lyalimu yali na honi. ³⁷ Nalwo lwa vaandu voosi mu lusomo lwa Gerasini,vavoolera Yeesu arhule mu lusomo lwaavo, shichira vali ni vatecheeraanga.Na Yeesu yiinjira mu lyarho na rhulaho. ³⁸ Muundu wa Yeesu yali narhulitseemu matimoni , yasaaya Yeesu nayaansa vatsi naye; navutswa Yeesu yamukhuunga, namuvoolera, ³⁹ Kalukha ingo woowo, uvoolere vaandu koosi ka Nyasaaye akhukholere."Khu lwa yako, yasimukha natsia nakhalakanyila mu litaala likali,navoola makhuuva khulondekhana khu viindu vya Yeesu yali na mukholere. ⁴⁰ Lwa Yeesu yakaalukha khurhula luveeka luundi lwi inyaansa, shituma sha vaandu vali ni vamuliindiliraanga. ⁴¹ Muundu walaangangwa Yairo, waliinji mwiimilili wi liisinakoki yatuukhaho.Naasikama havileenje vya Yeeus, na murheeva nayaansa yiinjire khu muunsu mweemwe, ⁴² shichira mwaana weewe wi shikhaana mulala woonyene, yali nali ni mihiika liikhomi na chiviri, yaali na khutsaanga.Lwa Yeesu yali na tsitsaanga, vituma vya vaandu vali hiimbi khumuseenaka muliminakana lyaliho. ⁴³ Khwaliho nu mukhali wali wanyakhana khu lwi mihiika likhomi na chiviri, shichira khurhaatsa masahi vuchira khunyola mushilikhi; ⁴⁴ yiitsira inyuma wa Yeesu, natiirha khu lupiindo lwi inguvu ya Yeesu,na khurhaatsa khweekhwe khwa masahi khwasiinjirha vwaangu. ⁴⁵ Yeesu yarheeva, "Nu wiina utiiri khwiinse wooyo?" Lwa vaandu voosi vali ni vambakhanane, Petero yavoola,"Mweechitsi, vaandu ni vanyiikhi, khaandi vakhumiinaanga! ⁴⁶ Navutswa Yeesu yavoola,"Muundu untiirhikhu; shichira mbuliire tsingulu nitsirhulaanga mwiitse.' ⁴⁷ Lwa mukhali mweene wooyo yaalola ndi shanyala khwiivisa; yiitsa na techeeraanga, na sikama ha vilenje vya Yeesu, na muvoolera havulavu imbeli wa vaandu voosi shivune shijili na mutiirhakhu, ma khaandi khuli ya honyinywa vwaangu. ⁴⁸ Yeesu ya muvoolera,"Mwaana wi shikhaana waanje, liisuuvira lyolyo limali khu khuhonyinya; simukha utsii mu mireembe." ⁴⁹ Lwa Yeesu yali na shiiomolomaanga,muundu wundi yarhumwa khurhula mu insu ya Yairo, khwiitsa khuvoola,"Mwaana wi shikhaana wowo umali khukhutsa; lekha khunyakhitsa mweechitsi vutswa." ⁵⁰ Navutswa lwa Yeesu yahulira ndyo, yavoolera Yairo,"leka khurhia; suuvira vutswa, naye alahona." ⁵¹ Lwa Yeesu yali yakhutukha ha insu ya Yairo, shiyavuchiirilakhu muundu wundi woosi khwiinjiramu, na khali Petero, Yohaana, Yakobo halala na taata na maama wu mwaana. ⁵² Vaandu voosi valiho, vali muliliirha nu khwiikhula.Navutswa Yeesu yavavoolera,"Lekhi khulira. Mwaana ashili khukhutsa;navutswa akonaanga tsindoolo." ⁵³ Vaandu voosi vamusekha, shichira vali ni vamanyi mwaana yali na mali khukhutsa. ⁵⁴ Lwa Yeesu yakumira ku mwaana mweene wooyo, yalaanga, "Mwaana waanje, vukha! ⁵⁵ Mwaana mweene wooyo yaraanga khweeserhana , ma nasinjira vwaangu; na Yeesu navoola"Muhii shyukhulya shalya." ⁵⁶ Viivuli vu mwaana mweene wooyo vali ni liicheenya, navutswa Yeesu yaavakaya vavule khuvoolerakhu muundu kali ni kakholekhe.