¹ Yeesu , lwayali yakhamala khuvolera vaandu vii ndu vyeene yivi vyoosi, yasimukha nukhutsia mulitaala lya Kaperenamu. ² Mwiimiriri wi shikosi sha vasikari va varooma yali nu murhumikhi weewe wa yali ni ya yaansa.Murhumikhi mweene wooyo yali mulwaale khali hiimbi khukhutsa. ³ Lwa mwiimiriri wa vasikari mweene wooyo yahulira makhuuva shichira Yeesu, yarhuma vasakhulu va vayahudi khu Yeesu, khumureeva khwiitsa khuhonyinya murhumikhi weewe. ⁴ Lwa vasimukha ni viitsa khu Yeesu , vamusaaya nu mwooyo kwoosi, ni vavoola "Tooto, atukhana umukholere ka yeenyaanga", ⁵ shichira ya yaansa vaandu vi shivala shyeerhu, khaandi naye wa khumbakhira Lisinakoki." ⁶ Khu lwa yako Yeesu yasimukha natsia navo .Lwa yali nali hiimbi khutuukha khu insu , mwiimiriri wa vasikali mweene wooyo yarhuma valina veeve khu Yeesu, vamuvoolere,"Mwaami lekha khunyaakhana; mbula vunyali vu khukhwinjilitsa mu insu yaanje. ⁷ Nashyo shivune shichira ni mbula khwiitsa khukhulora.Navutswa voolakhu vutswa ling'aana khu murhumikhi waanje ahone. ⁸ Khali inse ndi muundu uli haasi ha viimiriri vaandi vali nu vunyari; khaandi ndi na vasikali vaandi haasi hanje,Mboleraanga musikali mulala," simukha utsii", khaandi atsia,khaandi mbolera wundi , "Hamba," na yiitsa; mbolera murukwa waanje," Khola yishi," na akhola." ⁹ Lwa Yeesu yahulira yaka, yali ni liicheenya, na kalukhana navoolera shituma shya vaandu vamuloondanga,"Muvooleraanga ndi shili khuloorakhu muundu uli ni liisuuvira khuli yili, khali mushivala shya Israeli". ¹⁰ Vaandu vali ni varhumiilwe khu Yeesu, vakalukha muunsu yu mwiimiriri wa vasikali wa varooma mweene wooyo, ni vanyola murhumikhi weewe nali mulaamu. ¹¹ Matukhu ni kamali khuvirha mati, Yeesu yasimukha nu khutsia mu litaala lyalaangwangwa Naini, halala na veechitswi veeve ni shituma shikali sha vaandu. ¹² Lwa yali nali hiimbi khutukha khu shilivwa shilitaala yeelo, yaalora vaandu ni vachiinji mmbiri ku mukhutsu--- mwaana muteerhwa woonyene wu mukhuuntsakhali; shituma shikali shya vaandu vanyiikhi khurhula mu liitaala vali nu mukhuntsakhali mweene wooyo. ¹³ Lwa Mwaami Yeesu yamolora, yamulorera tsimbavasi, namu voolera, 'Lekha khuliira" ¹⁴ Nolwo lwa Yeesu yasimukha natsia khukumira khulisaanduku lyu mukhutsu; khu yavo vali nivajiinji vasiinjire vuluunji.Na Yeesu navoola, "Musaatsa muvuukha khuvooleraanga ndi vukha." ¹⁵ Mukhutsu mweene wooyo yiikhala, naraanga khulomoloma, na Yeesu namuhaana khu mama wu mwaana mweene wooyo. ¹⁶ Vaandu voosi varhi, ni varhaanga khwiitsoominya Nyasaaye ; ni vavoola"Muporofeti wii tsingulu umali khunyoorekha mu khutse veene! Nyasaaye umali khwiitsa khuhonyinya vaandu veeve, ¹⁷ Makhuuva khu vilorekhitso vya Yeesu yali nakholi , kalaanda havundu hoosi mu lusomo lwa Yudeya khaandi mushivala shili hiimbi naho. ¹⁸ Lwa veechitswi va Yohaana vavoolera Yohaana khulondekhana khu vilorekhitso yivi vyoosi, yalaanga veechitswi vaviri khuvo ¹⁹ navarhuma khu Mwaami Yeesu vamurheeve, "Niiwe wa Yohaana yavoola uliitsa khwiitsa anoho khutsililire khuliindilira wundi.? ²⁰ Lwa veechitswi veene yavo vatukha khu Yeesu ,vavoola "Yohaana Mupatisi ukhurhumi khu yiiwe khukhurheeve, Ni yiwe wa yavoolaanga uliitsa khwiitsa anoho khutsililire khuliindilira wuundi?" ²¹ Mu matukhu keene yako Yesu yahonyinya vaandu vanyiikhi, vali nivalwaala tsiikhutsu na va matimoni kali ni kiinjira muvo; khaandi nahonyinya vaandu vanyiikhi , vali nivavekhula ni valoola. ²² Yeesu yavarheevulira,"Kalukhi mutsii khuvoolera Yohaana, kamunyee veene muloli khaandi nu muhulira:vaandu vavekhula valolaanga, vaandu valeema vachednaanga,;vaandu valwaala vucheere vahoni, vaandu vali tsitiimbiti vahuliraanga, vaandu vakhutsu visimukukhaanga khurhula mu liikhutsa, na vamanani viirwaatsirwa Ivaanjeri. ²³ Ali nu vukaasu muundu uvulaanga khuhayahaya mwisuuvira khulondekhana khu yiinse." ²⁴ Lwa varhumwa va Yohaana valivamali khurhulaho,Yeesu yarhaanga khu lomoloma khu viyuma vya vaandu makhuuva khu Yohaana, navoola, "Lwa mwasimukha nu mutsia mu shangalangwe, mwasuuviraanga muliitsa khulola shiina?Shituundu shi imbuutsa ihuutsanyinyaanga? ²⁵ Ni shiina sha mwaatsia khulolra? Muundu niyifwaali tsinguvu tsyu vukuli vululu?Vaandu vifwaalanga tsinguvu khuli tsyeenetso, vamenya mu tsiinsu tsya vaami . ²⁶ Mbooleri, ni shiina shya mwatsya khulora? Muporofeti? Ni kilikali, mu vooleraanga ndi khali khuvirha muporofeti. ²⁷ Yohaana naye wa mahaandiko Matakatifu kavoolaanga makhuuva khulondekhana khu, "Nyasaaye yavoola, ndiitsa khurhuma murhumwa waanje imberi woowo; khwiitsa khu khuloombera injira." ²⁸ Yeesu yavavoolera, "Muvooleraanga kilikali ndi mu vaaandu voosi vamenyaanga mu shivala shiinu, muundu avulakhuho uli nu vunyali vunyiikhi khuvirha Yohaana; navutswa wooyo uli wa haasi muno mu vwaami vwa Nyasaaye, naye uli nu vunyali khuvirha Yohaana." ²⁹ (lwa vaandu voosi vahulila makhuuva keene yako,khali vasololi vu vushurhu nivalimu, vitsoominya Nyaaaye khuli ali wi likhoola lyu vuluunji;shichira Yohaana mupatisi yali wavapatisa; ³⁰ navutswa vafarisayo na veechitswi va malako vambakhana lyeenya lya Nyasaaye ali nalyo khulondekhana khuvo,ni vambakhana Yohaana khuvapatisa.) ³¹ "Vaandu va matukhu kanu nyala khu vasasanyinya khu shiina,khaandi valolekhaanga khuli shiina? ³² Valorekhaanga khuli vaana ni viikhare khu shiirhu.Vaana shituma shya shilala shilaanjiriraanga, ni shivoolera shiindi, "Khwa mwiimbira tsinyimbo tsi shiserero shu khuhilana, navutswa mwambakhana khusyeeva; khwamwiimbira tsinyimbo tsyu khwiikhula, navutswa mwambakhana khwiikhula!" ³³ Yohaana mupatisi yiitsa , nahoonga vuchira khulya, khaandi vuchira khung"wakhu idivai; nu mumuvoolera , "Litimoni lili muye" ³⁴ Mwaana wu Muundu yiitsa, nalya shyukhulya khaandi naang"wa, ma numuvoola"Lolikhu muundu wuyu! Nu muundu mwiinyeeseri khaandi nu mutaandi wi idivai, nu muliina wa vasolori vu vushurhu na vooni vaandi!" ³⁵ Khulwa yako, vusitsa vwa Nyasaaye vumanyikhaanga khuva vwatooto khuvirira mu vaandu voosi vamuvuchiriraanga." ³⁶ Mulala khu vafarisayo yaloomba vucheni litukhu liindi, na laanga Yeesu khwiitsa khulya shyukhulya naye.Yeesu niyakhiinjira muunsu mu muundu mweene woyo, yiikhala nukhulya. ³⁷ Nu mukhali mwooni wu mwitaala lyeenelo, yahulira Yeesu yiitsaanga vucheni muunsu yu mufarisayo; yiitsa ni ichupa yu vukuli vululu niyitsule makura ku mwaayu mulahi ku khwiiveha, ³⁸ ma niyisokonyora inyuma wa Yeesu, havileenje vyee. Naraanga khutsukhurhula maliika keeke; nukweeya vilenje vya Yeesu ni liiswi lyu khumurhwi kweekwe. Yatsunsuuna vilenje vya Yeesu na muvekha makurha ku mwaayu mulahi. ³⁹ Lwa mufarisayo yali nalaanji Yeesu yalola ndi, yireevana mweene,"Niiva ni kilikali muundu wuyu nu muporofeti, shiyakhamanyi nu mukhali shiina umutiirakhu uyu khaandi amenyaanga limenya lya lukanu shiina,shichira nu mukhali wu kholaanga vwooni. ⁴⁰ Yeesu yamurheevulila, Simoni, ndi ni likhuuva lya ndenyaanga khukhuvoolera."Nalwo lwa Simoni yamurheeva, "Mweechitsi, ni likhuuva shina, mboolera likhuuva lyeene yero? ⁴¹ "Litukhu liindi, muundu yikopitsa vaandu vaviri tsisendi tsi tsidinari.Mulala yamuha tsidinari tsimia tsirhaanu( mirhungu chi mihika chirhaanu), na wundi tsidinari makhomi karhaanu (mirhungu chi mieli chiviri) . ⁴² Lwa varhamwa khurhuunga, yamanya na vasamiha voosi.Nu wiina khuvo unyala khuyaansa muno mwikopitsi mweene woyo? " ⁴³ Simoni yamurheevulira, "Suuviraanga nu muundu wali ni likoovi linyiikhi wi tsidinari tsimia tsirhaaanu lwayasamihwa."Khulwa yako Yeesu yamuvoolera, "Uvooli vulahi." ⁴⁴ Yeesu yishevukha naheensa mukhali mweene woyo, navoolera Simoni,"Ulora mukhali wuyu ?Khurhula lwa ndinjire muunsu mwoomwo , wambakhane khumba maatsi kwiikhwisaava vilnje vyaanje, nikhali mukhali uyu usaavitse vilenje vyaanje na maliika keeke, khaandiweeyi vilenje vyaanje ni liiswi lyeelye. ⁴⁵ Shyunsunsunikhu taawe;navutswa khurhula lwa ndiinjire munu,ashili khulekha khunsunsuna vilenje vyaanje. ⁴⁶ Yiwe shyumbekhikhu murhwi kwaanje makurha ta; navutswa umali khevekha vileenje vyaanje makurha. ⁴⁷ Khu lwa yako, muvooleraanga ndi umali khusamihwa khurhula mu vwooni vweevwe vunyiikhi, amanyinyaanga vuyaansi vunyiikhi; navutswa muundu umali khusamihwa, hatiititi amanyinyaanga vuyaansi vutiititi." ⁴⁸ Yeesu yavoolera mukhali mweene woyo, "Umali khusamihwa khurhula mu vwooni vwoovwo." ⁴⁹ Khulwa yako vaandu vali nivaliitsaanga shyukhulya naye, varaaanga khuvoolerana veene khu veene, "Uyu nu muundu shiina, khali asamihaanga vaandu khurhula mu vwooni?" ⁵⁰ Nalwo lwa Yeesu yavoolera mukhali mweene woyo, Lisuuvira lyolyo limali khukhuhonyinya.Simukha utsii mu mireembe.