1 Khuliitukhu lindi lilisabato, Yeesu yali nacheedaanga khukhalakanyira mu milimi chya varakamu inganu.Veechitswi veeve varaanga khwaamula imuu yi inganu,nukhuvuunga mu makhono kaavo khaandi ni valya. 2 Navutswa Vafarisayo valala vareeva,"Shichira shiina mukholaanga ka malako keerhu kambakhanaanga khuvulwa khukholwa khuliitukhu li Lisabato?" 3 Yeesu yavarhevulira, "Mushiri khusoomakhu shiindu khulondekhanakhu ka Daudi yakhola, mu matukhu kaye halala na vaandu va yali navovali ni insala? 4 Daudi yiinjira muunsu ya Nysaaye, navukula mukati mutakatifu, nakulya khaandi nahaakhu khali vaandu vali naye.Muundu avulakhuho wali nu vunyali vu khulya mukati kweene yoko, navutswa ni vasaalisi voonyeene viyamilwa khulya khulondekhana khuli malako keerhu kavoolaanga." 5 Yeesu yavavoolera, "Mwaana wu Muundu, naye uli nu vunyali khuliitukhu li Lisabato." 6 Nakikholekha khu litukhu liindi li lisabato, Yeesu yiinjira mu liisinakoki ni yeechitsa.Muundu yalimu wu mukhono kweekwe musaatsa kwali nu kwaalema. 7 Vechitsi va malako na vafarisayo valala, vaheensekhitsa valole niiva Yeesu anyala khumuhonyinya khulitukhu li Lisabato, nikanyalikha vanyole shivune shinyala khuchira vamuyaale. 8 Navutswa Yeesu yamanya ka vakanakanaanga, navoolera muundu wali niyalema mukhono mweene woyo,"Haamba usiinjire hanu,"Muundu mweene woyo yiitsa na siinjiraho. 9 Yeesu yavarheeva,"Murheevaanga, malako keerhu kavuchiriraanga khukhola khuliitukhu li Lisabato viindu vilahi anoho viindu vitaamanu, khuhonyinya vulamu anoho khutivitsa?" 10 Khulwa yako,Yesu yishevukha navaheensa voosi;navoolera mundu mweene woyo, "Kololokhitsa mukhono kwookwo."Muundu mweene woyo ya kukololokhitsa, nu kuhona. 11 Navutswa veechitsi va malako nende vafarisayo, vali nu vurhima, nivarhaanga khuhreevana veene khu veene kavanyala khumukhola Yeesu. 12 Na kikholekha mu matukhu yako, Yeesu yasimukha natsia khusaala khu shikulu, namalayo vutukhu vwoosi nasaalaanga khu Nyasaaye. 13 Lwavwali nu vusheere mu mavweevwe, yalaanga veechitswi veeve narhovolamu likhomi na vaviri, vayalaanga Varhumwa: 14 Miirha kavo nikali Simoni (wa yakulikha liirha Petero) nende amwaavo weewe Andereya; Yakobo nende Yohaana, Filipu nende Patsolomeyo, 15 Maatayo na Tomasi, Yakobo mwaana wa Alufayo, nende Simoni wakwanilaanga shivala shyeshye, 16 Yuda mwaana wa Yakobo, nende Yuda Isikarioti, wamanya natsaama Yeesu. 17 Lwa Yeesu yali na mali khwiikha hasi khurhula khushikulu , yasiinjira mu lwomeera, halala nu mukaanda kwa veechitswi veeve vanyiikhi.Mukaanda mukali kwaliho kwa vaandu khurhula mu lusomo lwa Yudeya khaandi khurhula Yerusalemi khaandi mu mataala ka Tiro nende Sidoni, kali khuluchiinga lwiinyaansa.Vali viitsi khuhonyinywa khurhula mu vulwaale vwaavo. 18 Vaandu va matimoni kanyakhitsaanga viitsa nivahonyinywa khaandi. 19 Mukaanda kwa vaandu voosi, vacheelitsa khumutiirakhu,shichira tsingulu tsiarhulaanga muye ni tsivahonyinya voosi. 20 Yeesu yaheensa khu veechitwsi veeve na voola, "Muli nu vukaasu munyee va muli va manani, shichira vwaami vwa Nyasaaye nu vweenyu. 21 "Muli nu vukaasu va muli ni insaala nuunundi,shijiira muliitsa khwiikurhitswa.Muli nu vukaasu munyee vamulilaanga nuunundi, shichira muliitsa khusekha nu muli nu vuyaansi. 22 "Mulii nu vukaasu lwa vaandu vamuhiimaanga, va mwambakhana, ni vamunyeka, nu khuvoola viindu vitaamanu khu munye, shichira Mwaana wu Muundu ! 23 Musaangale mulitukhu yero. na muyaanse shichira shihaanwa shamuliitsa khurhungwa mwikulu ni shikali; ni ndyo khaandi vakuuka vaavo vakholera vaporofeti. 24 Wahii! Navutswa muli khu vutiinyu munye vamuli vahinda nuunundi;shichira mwamala khuleminywa myooyo khale. 25 "Wahii! Muli khuvutiinyu munye vamwikurha vinyiikhi nunundi, shichira insaala iliitsa khumumala! Muli khuvutiinyu munye vamusekhaanga khalunu, shichira muliitsa khwiikhula numulila! 26 Wahii! Muli hu vutiinyu munye va vaandu voosi va mwitsoominyaanga, shichira ni ndyo khaandi vakuuka vavo vakholera vaporofeti vu vuvehi. 27 "Navutswa muvooleraanga munye vamumbuliraanga ndi muyaanse vatsiku veenyu, khaandi mukholere yavo vamuhiimanga malahi. 28 Mukaasitse yavo vamulaamanga, musaalile yavo vamukholeranga viindu vitaamanu. 29 Niiva muundu alakhusamula lukhovi khu luseeya, mumuhe luseeya lundi khaandi; niiva muundu aliitsa khuvukula isa yeenyu, mumulekhe avukule likoti khaandi. 30 Haana khuvaandu voosi viindu vyaa vamusavaanga, khaandi lwu muundu wundi avukulaanga shiindu shyeenyu, mukhamurheevi amukalukhitsire mba. 31 Mukholere vaandu viindu khuli munye mwenyanga vo vamukholere khaandi. 32 "Niiva mulayaansa vaandu vamuyaansa voonyeene vutswa, nu vukhala shina vwa muli navwo? Khali vaandu vooni vayaansa yavo vavayaansa. 33 Niiva mulakholera malahi vaandu vamukholeraanga malahi vonyeene vutswa, nu vukhala shina vwa muli navwo? khali vaandu vooni vakholaanga ndyo. 34 Niiva mulahaana shiindu khu vandu vamwenyaanga valimurhunga,nu vukhala shiina vwa muli navwo?Khali vaandu vooni shi vahaananga khu vaandu vooni, ma vamaveenya valirhungwa muvunyiikhi khaandi. 35 Navutswa muyaanse vatsiku veenyu , khaandi muvakholere malahi.Muhaane vuchira khukalukhitsilwa; na murhungo kweenyu kuliiva mukali. Muliitsa khuva vaana va Nyasaaye Uli Ikulu khu vyoosi, shichira nu mulahi khu vaandu vambakhanaanga khusanditsa khaandi viimani. 36 Muve vaandu vi tsimbavasi, khuli Taata weenyu ali wi tsimbavasi. 37 Mukhakhalachira vaandu mba, khu Nyasaaye alivula khumukhalachira, mkhatula vaandu, khu Nyasaaye alivula khumutula.musamihe vaandu, Nyasaaye, alimusamiha. 38 Muhe vaandu, khu Nyasaaye aliimuha.Ni kilikali, muliitsa khunyoola shipimo shitsuure, vukhoonyi nu mwooyo mulala, na vwitsule mu makhono keenyu-- vwoosi vwa munyala khukaasitswa navwo.Shipimo sha mupimiramu vaandi, nashyo shya Nyasaaye aliitsa khumupimiramu." 39 Yeesu yavavoolera lukanu yulu:muundu muvekhu anyala khwimirirakhu muvekhu wundi?Shivanyala khukwa voosi vaviri muvwiina? 40 Mweechi shaali mukali khuvira mweechitsi weewe taawe, navutswa mweechi woosi namali khweechitswa aliitsa khuva khuli mweechitsi weewe. 41 Khulwa yako , shichira shiina ulolaanga khasaala khali mumoni ya amwavo woowo, navutswa shyunyala khulola kumiingo ku kusaala kuli mu moni yoyo taawe? 42 Anoho wakhavoolera ndi amwavo woowo "Mwaana werhu lekha khurhulitse khasaala khali mumoni mwoowo , navutswa yiwe mweene shyunyala khulola kumiingo kukusaala kuli mumoni mwoomwo taawe?Yiwe wikholakholitsaanga khulolekha uli wi liikhola lyu vuluunji! Rhaanga urhulitse kumiingo ku kusaala kuli mumoni mwoomwo, khu ulole vulahi vweene khuli urhulitsa khasaala khali mumoni ya amwavo woowo. 43 Musaala mulahi shyukwamanga matunda mataamanu, anoho musaala mutaamanu shyukwamaanga matunda malahi taawe. 44 Vuli musaala kwoosi kwamanyikhana, shichira matunda ka kwo;shichira matunda ku mukhuyu shikanyala khuhatulwa khurhula khu misaala cha mawaa;anoho matunda ki misabibu khuhatulwa khurhula khu minyenya taawe. 45 Muundu mulahi ali ni viindu vilahi khurhula mulivikhiro lyu mwooyo kweekwe; na khaandi akhola viindu vilahi; khaandi muundu mutaamanu ali ni viindu vitaamanu mu livikhiro lyu mwooyo kweekwe, ma akholanga viindu vitaamanu. Muundu alomolomaanga khulondekhana khu kaali nako mu mwooyo kweekwe. 46 Shichira shiina munaangaanga, "Mwaami, Mwaami", navutswa numwaambakhana khukhola ka muvooleraanga? 47 Vuli muundu woosi unondaanga nu khuhulira makhuuva kaanje nu khukakhola, nsiitsa khumumanyinya khuli ali. 48 Ali khuli muundu yumbakhaanga insu yeeye, ayavaanga haasi muliirova khuviikha musiinji kweekwe khu lwaanda.Lwa micherera cha maatsi chiitsa ni chichelitsa khupomola insu tsana, inyoolekha yatiinya khukwa, shichira yumbakhwa vulahi. 49 Navutswa muundu uhulilaanga makhuuva kaanje khaandi avula khukakhola , ali khli muundu yumbakhaanga insu yeeye vuchira khuyava musiinji; lwa michelera cha maatsi chikholomokhaanga chyihilana insu yeene yeyo vwaangu, ma yiikwa haasi munyiikha mukali.