¹ Muliitukhu liindi lwa Yeesu yali nasiinjire khulujiinga lwi inyaantsa ya Genesareti ,mukhung'aano kwa vaandu vamiinakana nu khumuvoyong'aana ni veenya khulikhiitsa ling'aana lya Nyasaaye. ² Na yalola maarho kaviri nikasundiirhwe himbi khulujiinga lwi inyaantsa.Valuvi veene vali varhulimu, nivochitsaanga tsineti tsyaavo. ³ Yeesu yiinjira muliarho lilala khu maarho kali ni kaliho, na liayinjiramu liali lya Simoni, namureeva alisuundekhu hatitiiti khurhula khuluchiinga.Yeesu yikhalamu na niyeechitsa vaandu nali muliarho liene yero. ⁴ Lwayamala khulomoloma , yamuvolera Simion" suunda liarho mululiiva lwiinyaansa ma ulakhuule tsinenti khuluva." ⁵ Simioni yamurhevulira "Mwaami, khunyaakhaane mbutukhu vwoosi na khunyoolikhu tsisutsi mba; navutswa shichira ling'aana lyolyo ndalakhula tsinet." ⁶ Lwavali vamali khulakhula tsineti tsyaavo,:vajimira tsisutsi tsinyiikhi muno. ⁷ Vamanya valaanga valuvi vashiavo, yavo vali khuliarho luvega lundi vitse khuvakhoonya, na vitsa nivitsulitsa marho koosi kaviri tsisutsi nikaansa khwiiyina mukarhi. ⁸ Petero lwayalola ndio, yakwa hasi hi vileenje vya Yeesu khu masikamo, na voola, rhula haandi yaha, shivune yinse ndi mwooni, oh Mwaami. ⁹ Yacheenya halala na vayali navo, khu shivuumba shi tsisutsi tsya vanyoola. ¹⁰ Khaandi kali ndyo khu Yakobo halala na Yohana, vaana va Zebedayo yavo vahaambana na Simoni.Na Yeesu yavavoolera Simoni, ukharhia mba, khurhula khaluunu ulava muluvi wa vaandu. ¹¹ Nii lwavali vakhaleerha maarho kaavo khulujiinga, valekhana ni vyoosi nu khumuloonda . ¹² Lwa Yeesu yali nali mulitaala lilala mu mataala keene yako, muundu yiitsaho wali yalwaala vuchele.Lwa muundu mweene wooyo yalola Yeesu, yasikama imberi weewe na musaaya nayaaansa ," Mwaami, niiva wenyaanga, unyala khukhola khuva munihu." ¹³ Na Yeesu yanyiira mukhono kweekwe natiira khuye.Yeesu yavoola "mbuchiliire va munihu".Na vuchele vwarhula mu muundu mweene woyo vwaangu. ¹⁴ Na haweene yaho Yeesu yamukaya "Ukhavoolerakhu muundu woosi , navutswa simukha , utsii vuluunji khu musaalisi akhukoole,khaandi uhaane shihanwaa shyu khukholerwa musango kwa Musa yalaaka, khuli shimanyinyilo, khu vaandu voosi vamanye ndi umali khuhona." ¹⁵ Navutswa lukhumu khulondekhana khu Yeesu lwatsilila khulanda vuli hawoosi, ma vituma vya vaandu vanyiikhi niviivunjelitsa halala khumuhuliikhitsa ,nu khuhonyinywa khurhula muvulwaale vwyaavo. ¹⁶ Na mbunyiikhi Yeesu yivisaakhu a khurhulaho nukhutsia ha vaandu vavula, khulukhusaala. ¹⁷ Liitukhu lindi , lwa Yeesu yali ni yeechitsaanga, vafarisayo na veechitsi va malako khurhula vuli muchitsi chu lusomo lwa Galilaya, Yudeya na Yerusalemu, vali ni vikhaaleho.Tsingulu tsyu Mwaami Nyasaaye tsyaali na Yeesu khuhonyinya vaandu vali valwaale. ¹⁸ Vaandu valala viitsaho, nivachiinji khu shitali muundu wafwookoya; vachelitsa khumwiinjilitsa muinsu, khutsia khumuviikha imbeli wa Yeesu. ¹⁹ Navutswa lwavanyoola havulakhuho hukhumwiinchilitsira shichira shituma sha vaandu, vaniina ikuulu khushisekese, niviikula havundu havamwiikhitsila nali khu shitali sheeshe khutuukha hakari hi shituma sha vaandu imberi wa Yeesu . ²⁰ Lwa Yeesu yaalola lisuuvira lya vaandu veene yavo vali nalyo, yavoola,"Mulina waanje, vwooni vwovwo vusamihelwe." ²¹ Veechitsi va malako na vafarisayo, varaanga khwireevana, "Uyu ni muundu shina unyekaanga Nyasaaye?Nyasaaye woonyene naye uli nu vunnyali vukhusamiha vaandu khurhula mu vwooni, navutswa wundi avulakhuho! ²² Lwa Yeesu yamanya kavali ni vakanakanaanga, yavareeva , shichira shina mukanakanaanga muryo mu myooyo cheenyu? ²³ Nu vutoro khuvoolela muundu wafwookoya uyu, "Umali khusemehwa khurhula mu vwooni vwovwo, anoho khumuvoolera, sinjira uchende? ²⁴ Navutswa ndamumanyinya ndi Mwaana wu Muundu ali nu vunyali khuliirova khusemeha vaandu khurhula mu vwooni."Khulwa yako , Yeesu yavoolera muundu wafwokoya mweene woyo,"Siinjira, vukula shitali shyoshyo, utsi ingo!" ²⁵ Heene yaho nalwo lu muundu mweene woyo yasiinjira vwaangu imbeli wavo voosi, na vukula shitali shyeshye shayali nakoniikhu, natsia ingo ni yitsoominyaanga Nyasaaye, ²⁶ Vaandu voosi vali ni liicheenya linyiikhi! varhia ni vitsoominya Nyasaaye nivavoola, khuloli nunundi viindu vyu khucheenyinya!" ²⁷ Yaka nikamali khwikholekha, Yeesu yarhulaho na tsya ilwanyi,nalola musololi wu vushurhu walaangwa Levi, niyikhaale mu insu ya vasololelamu vushurhu .Yeesu yamuvoolera , "Noonda". ²⁸ Levi yasinjira, nalekha vuli shiindu shyoosi, namuloonda. ²⁹ Khulwayako, Levi yalombera Yeesu vucheni vukali vwu liilya mmunsu mweemwe; khaandi khwalimu na vasololi vu vushurhu vanyiikhi na vaandu vaandi mu liilyaa lyeene yelo. ³⁰ Valala khu vafarisayo na veechitsi va malako, vali mu shituma shyavo, vang'uung'uunira veechitswi va Yeesu. Vareeva, "Shichira shiina uliitsaanga shyukhulya , khaandi nu khung'wa halala na vasololi vu vushurhu nende vooni vaandi?" ³¹ Yeesu yavarevulira, "Vaandu valamu shivanyala khweenya mushilikhi taawe; navutswa yavo valwalaanga voonyene vutswa. ³² Shindiitsa khulaanga vaandu vilikhola lyu vuluunji taawe, navutswa vaandu vooni khwiikanira." ³³ Vaandu valala vavoolera Yeesu, "veechitswi va Yohana vahoongaanga vuchira khulya shya khase khoosi nivasaala, khaandi veechitswi va vafarisayo, vakholanga ndyo; navutswa veechitswi vovo, valiitsanga shyukhlia nivang'wa." ³⁴ Yeesu yamurhevulira,"Mukanakanaanga munyala khukhoola vucheni nu khuhoonga vuchira khulya shyukhulya, musaatsa uselelaanga mwiiha nali navo? ³⁵ Navutswa liitukhu liriitsa khutukha lwa musaatsa useleraanga mwiiha, aliitsa khurhulitswaho; nalwo valihoonga vuchira khulya mu matukhu keene yaako." ³⁶ Yeesu yavavoolera khaandi lukanu yulu:"Muundu avulakhuho urandulaanga shiraka shi inguvu impya khaandi anaavira khu inguvu ikhulu.Niiva aliitsa khukhola ndyo, aliitsa khuva narandule inguvu impya;khaandi shiraka shi inguvu impya shishinyala khuva shilala ni shi inguvu ikhulu taawe. ³⁷ Muundu avulakhuho unyala khutsukha idivai impya mu maseero makhulu ki idivai;niiva aliitsa khukhola ndyo, idivai impya ilarulaka maseero keene yako na idivai khusundukha; na maseero khwoonekha. ³⁸ Navutswa idivai impya itsukhwaangwa mu masero mahyia! ³⁹ Muundu avulakhuho wenyanga khung'wa idivai impya, namali khung'wa idivai ikhulu ,shichira avoolaanga "Ikhulu neyo indahi '"