¹ V1Yeesu yakalukha khurhula mu mucherha kwa Yordani niyitsuulwe Rooho Mutakatifu,na niyimirirwa na Rooho Mtakatifu khutsya mushiangalangwe, ² wayamanya achelitswe na Ibilisi niyakhamalayo matukhu makhomi kaane.Mumatukhu keene yako koosi shivulakhu shyukhulia shayalya, nikhali yali ni inzala lwa matukhu keene yako kali kaweerhe. ³ Ibilisi yamuvoolera, "niiva yiwe ni mwaana wa Nyasaaye , voolera lichina yili likwi mukati." ⁴ Navutswa Yeesu yamurevulira, Khuvoolera kaang'otwa mu maandiko matakatifu,"Muundu shaalamenya khuva mwoyo khu mukati kweenyene navutswa khuliing'ana lya Nyasaaye. ⁵ Ibilisi yamuhirha khushikulu shikali na mumanyinya vwamihi vwosi vwi liirova khu inyiinga yeene yeayo. ⁶ Ibilisi yamanya amuvoolere ndi "Nditsa khukhuha tsingulu yiitsi tsyoosi ni myaandu yichi chyoosi.Ndaheerwa chyoosi na nyala khuha muundu wandeenyaanga. ⁷ Niiva ulaasikamira viliitsa khuva vyoovyo." ⁸ Yeesu yamurhevulira na muvoolera,"Kang'ootwa ,"Ulasaala khu mwaami Nyasaaye woonyene naye adukhaane khurhumikhirwa." ⁹ Khaandi Ibilisi yamuhira Yeesu mu Yerusalemu, na musuunda likali havutengeesi vwi liteemberi namuvoolera, niiva uli mwaana wa Nyasaaye rhuuma khurula yaha khutsia hasi, ¹⁰ Shichira kang'ootwa, alahaana tsingerosi tsyetsye khukhuliinda. ¹¹ "Uliitsa khukwa mumamakhono mwaavo , vuchira khwisikarila shileenje shyoshyo khwiichina lyoosi." ¹² Yesu yamuvoolera, mahandiko matakatifu kavoolanga, "Lekha khuchelitsa Mwami Nyasaye uli Nyasaye wowo." ¹³ Lwa Ibilisi yali namali khucheritsa Yesu mu tsiinjira tsyoosi, yamanya amuleekhe hatiititi. ¹⁴ Yeeesu yakalukha mu tsiingulu tsya Rooho Mutakatifu khutsia Mu Galilaya:lukhumu lweelwe lulaanda vuli havuundu hoosi mulusomo lweene yolo. ¹⁵ Yaraanga khweechitsa mu masinagogi kaavo , khaandi vuli muundu na mwiitsoominya. ¹⁶ Lwayatsia khutuukha mu litaala lya Nazareti, hayavilukhira, yiinjila mu lisinagogi mu litukhu li lisaapato khuli kwali mwiima.Na yasiinjila khusooma ¹⁷ Shitapu shyu muporofeti Isaya shayali na heleerhwe.Na khunula havahaandiika: ¹⁸ "Rooho wa Nyasaaye ali khuyinze, shichira umali khundoovola khwii-lwaatsiraa vaandu vadakha Ivanjeri.Waanduma khwiilwatsa vuvoholoolekhu vavoohwa, nu khuhonyinya vavekhu khuvooholola vaandu vatambitswaangwa ¹⁹ Khaandi khuviilwatsira muhika kwa Nyasaaye khuhonyinya vaandu veeve kuumali khutuukha." ²⁰ Yamanya akhunikhe shitapu , nashikalukhitsira woyo wa muha khwiikhala hasi.Vaandu vali mu liisinagogi voosi vamuumikha tsiimoni. ²¹ Yeesu naraanga khuvavoolera, 'Nuunundi maandiko matakatifu kaamali khu rhweekhitswa khuli muhuliire ni sooma.' ²² Vaandu voosi vamwiitsoominya na nivacheenya khu makhuuva kayali navooli, na nivareevana, "Wuyu shali mwaana wa Yosefu?" ²³ Navavoolera, "katooto mu lamboolera lukanu yulu, "Muhonyi wa vaandu :yihonyinye mweene. Khaandi muliitsa khumboolera khaandi khukholelekhu hanu hawiivulwa vilorekhitso vya wakhola mwiitaala lya kaperenamu. ²⁴ Navutswa , "Muvoolera katooto, ndi shyalikhuho muporofeti wiyamwaangwa mulitaala lyavo taawe. ²⁵ Katooto muvoolera ndi khwali na vakhutsakhali vanyiikhi mu Israeli munyiinga ya Eliya, lwa imbula yavula khukhuva khumihika chivaka na mieli sita, na insala indulu niva vuli hoosi mushivala shyenesho. ²⁶ Niikhali Eliya yarhumwa mu litaala lya Zerefati mulusomo lwa Sidoni khu muundu wundi woosi taawe; navutswa yarhumwa khu mukhutsakhali mulala woonyene vutswa. ²⁷ Khwali khaandi na vaandu vanyiikhi vali vachele mu shivala shya Israeli mumatukhu ku muporofeti Elisha,navutswa khali mulala khuvo shiyahonyinywa taawe, niikhali Nahamani warhulaanga Siria woonyene vutswa." ²⁸ Vaandu voosi vali mu liisinakoki vahulira makhuva ka Yeesu yavoola, vamanya vitiukhe vurhima vunyiikhi. ²⁹ Vasiinjira nu khumuzoomanyinya Yeesu ilwaanyi yi litaala lyaavo, nivamuhirha khushikulu hilitaala lyaavo lyumbakhilwakhu , khuvamuluumbe akwiire murwi muluhoongo. ³⁰ Navutswa yacheenda navirhira hakarhi havo nu khutsia hawundi. ³¹ Yamanya na kholomokha Kaperenamu , litaala lili mu lusomo lwa Kalilaya , na niyaanza khuveechitsa muliitukhu liliisapato. ³² Vaandu voosi vacheenya khuli yeechitsaanga , shichira yalomolomaanga nu vunyali. ³³ Khwali nu muundu mu liisinakoki wali ni litiimoni muye,Na yahaansukha na voola, ³⁴ Yeesu wa Nazareti,shina shya khukhukosere yiwe, witsi khukhumala, khwakhumanya uli mutakatifu wa Nyasaye," ³⁵ Yeesu yakoondekherha liitimoni yerho navoola, "Shiling'aana, na urhule muye! Naliamanya limusiuva hasi imbeli wa vaandu voosi, na nilirhula muye vuchira khumusalilitsa. ³⁶ Vaandu voosi vacheenya, nivareevana veene khu veene, "ling'aana shina yiri:vunyali shina khaandi tsingulu shina tsyakhungila matimoni mataamanu khutsia na katsia? ³⁷ Na lukhumu lwe lwalanda hoosi mu mataala kali mu lusomo lweene yolo. ³⁸ Yeesu yasiinjira nukhurula mu liisinakoki natsia muiinsu ya Simioni.Nakhuvitsala wa Simioni yali nali mulwaale wu mureengo, na vamuvavoolera Yeesu amuhonyinye. ³⁹ Yeesu yasimukha , nasiinjira ha shitali shyu mulwaale yali nakondekhera vulwaale vwa yali novwo na nuvurhula muye.Nakhuvitsala Simioni yahona vwaangu , na raanga khuvalomberha shyukhulia. ⁴⁰ Lwa liuva liali liyeranga vosi vali nu vulwaale tsinganu ni tsinganu valeerhwa khu Yeesu ,na viikha khuvo makhono keeke khu sha mulala nu khuvahonyinya. ⁴¹ Matiimoni karhula khaandi muvaandu veneyavo, ni kakhuva tsikhwiirhi nu khuvoola, "Yiwe ni mwaana wa Nyasaaye!"Yeesu yakondekherha matiimoni na kashiling'anyinya kavule khulomoloma, shichira kali kamanyi yee naye Kristo. ⁴² Lwa vwali nuvusheetsaanga mu mavweevwe, Yeesu yarhula mu litaala lieene yelo natsia hawundi hayali woonyene .Na vaandu varaanga khumukhaava na lwa vamunyola wayali, vachelitsa khumushiinga avule khurhulaho. ⁴³ Navavoolera ,kaniika khwiirwatsa vwami vwa Nyasaye mu mataala kaandi shichira ndarhumwa khuko. ⁴⁴ Na Yeesu yatsianyinya khwiirwatsa mu masinakoki kali mulusomo lwa Yudeya.