¹ Lwa matukhu mati kali kamali khuvirha, Mwaami yarhovola vaandu makhomi saba na vaviri, navarhuma shya vaviri khutsia imbeli weewe mu shya litaala khaandi shya havundu hosi wa yenyaanga khutsia' ² Yeesu yavavoolera,:Liichesa ni linyiikhi muno; navutswa isavu ya ya vachesi ni inditiiti, khu lwa yako, khutuukha musaale khu Mwaami mweene liichesa ameete vachesi vu khuchesa mu mulimi kweekwe. ³ Ruli hanu mutsii! Loli , murumaanga khuli vimeeme vya makoondi khutsia mu ving'aang'a . ⁴ Mukhachiingikhu shiveti shi tsirupya anoho musiko ku khusumirhamu, anoho vilaaro; khaandi muvule khusiinjilakhu khu muhaanda,nu khuhaana mireembe khumuundu woosi. ⁵ Insu yoosi yamwiinjiramu, raanji muvoole, "Mireembe chive muunsu yumu!" ⁶ Niiva muundu uleraanga mireembe amenyamu, mireembe chyeenyu chiliitsa khuva naye; navutswa nakhamenyamu , mireembe chyeenyu chiiliitsa khumukalukhira. ⁷ Mwiikhare muunsu mweene yomo, numulya nu khung'wa shyoosi sha vamuha, shichira muhiinsiri utukhiire khurhuungwa; khaandi muvule khuhuyahuya khurhula muunsu yiyi nu mutsia muyiindi. ⁸ Mulitaala lyoosi lya mwiinjira khaandi vamwiinjilitsa , muliitsa khulya shyoosi shavaliitsa khuva ni vamuheere, ⁹ nu muhonyinya vaandu valwaala mu litaala lyeenelo, nu khuvavoolera,"Vwaami vwa nyasaaye vumali khwiitsa hiimbi na munye." ¹⁰ Navutswa lwa mwiinjira mu litaala lyoosi, ma vaandu vali mulyo vambakhane khu mwiinjiltsa, tsi mu tsiinjira tsi litaala lyeenero nu muvoola, ¹¹ khali lukuushi lwi litaala lyeenyu luli mu vilenje vyeeru,khusungusula khu mumanyinya ndi mukholi shiindu shitaamaanu;navutswa khutuukha mumanye ndi vwaami vwa Nyasaaye vumali khwiitsa hiimbi na munye.! ¹² Muvooleraanga ndi khu litukhu lyu khu khalachirwa, Nyasaaye aliitsa khuloolera tsimbavasi vaandu vi litaala lya Sodomu khuvira litaala yili! ¹³ Woyi khu yiwe Koratsini! Muliitsa khuva nu vutiinyu muno. Woyi khu yiwe litaala lya Betsesaida muliitsa khuva khaandi khuvutiinyu muno.Niiva vilolekhiitso vyakholelwa mu munye, vyakhakholwelwe mu mataala ka Tiro na Sidoni, khani vaandu viyiwene yeyo vayikanira khale, nivikhale, nivifwaali tsinguvu tsya makunia khaandi ni vamali khwiivekha liikooshe. ¹⁴ Navutswa khu litukhu lyu khukhalachirwa,Nyasaaye aliitsa khulolera tsimbavasi vaandu va mataala ka Tiro na Sidoni khuvira munye, ¹⁵ Munye vaandu vi litaala lya Kapernamu, mu kanakananga muliitsa khuheerwa vukhumi khutukha mwikulu?Muliitsa khusuvwa hasi mu shihatisi!" ¹⁶ Yeesu yavoolera vechitswi veeve, "Muundu umuhulihitsaanga , ambulikhitsaanga,Muundu wambakhanaanga munye ,ansambakhanaanga,Muundu unsambakhanaanga, yambakhanaanga woyo wanduma." ¹⁷ Vaandu makhomi saba na vaviri vakalukha nu vuyaansi unyiikhi muno, nivavoola,"Mwaami,khali matimoni kakhuhulira, lwa khwalomoloma khuvirhila mu liirha lyolyo," ¹⁸ Yeesu yavarheevulira,' Ndalola Shetani niyakulukhaanga khuli luheni, nuluhemukhaanga khurhula mwikulu. ¹⁹ Huliikhitsi! Mali khumuha vunyali vu khuseenaka khu tsiinsukha ni tsiinge; khaandi khukuurha tsingulu tsyoosi tsyu mutsiku.Shiindu shivulakhuho, shliitsa khumusalilitsa munye. ²⁰ Navutswa muvule khusaangala shichira matimoni kamuhulilaanga, nikhali musangale shichira miirha keenyu kahaandikwa mwikulu." ²¹ Mumatukhu keene yako,Yeesu yali nu vuyaansi vunyiikhi vurhulaanga khu Rooho Mutakatifu, navoola,:Taata, Mwaami wi likulu nende liirova! Khusaandinsaanga shichira wavisa vaandu vu vusitsa khaandi vi limanya viindu yivi; navutswa wamanyinya vaandu valolekhaanga khuli vaana vatiititi.Nikhali, Taata, kikholekha karyo khulondekhana khu lyeenya lyolyo. ²² Sha vuli shindu shyoosi ndaheerhwa na Taata waanje; khaandi muundu avulaho wamanya Mwaana , nakhali Taata; khaandi muundu avulaho wamanya Taata , nakhali Mwaana nende yavo vu Mwaana arhovola khumanyinya Taata." ²³ Nalwo lwa Yeesu yiishevukha veechitswi veeve, na vavoolera mu vwiivisu,"Muli ni ikhaavi shichira muuloli ka muloolaanga! ²⁴ Muvooleraanga ndi vaporofeti vanyiikhi na vaami viikoombaanga valoore khu ka muloolaanga; navutswa vaarhamilwa khuloola.Vali ni lyeenya lyu khuhulira ka muhuliraanga, navutswa vaarhamwa khuhulira." ²⁵ Mweechitsi waa malako yasiinjira na cheelitsa khurheeka Yeesu, na rheeva,"Mweechitsi, ni shiina shinyala khuloomba, khunyoole vulamu vwi mihika ni mihika?'" ²⁶ Yeesu yamurheevulira, "Ni shiina sha mahaandiiko Matakatifu kavoolaanga? Unyala khukasooma ndiina?' ²⁷ Mweechitsi mweene wooyo yahaana marheevuli ndi, "Uyaanse Mwaami Nyasaaye, uli Nyasaaye woowo nu mwooyo kwoosi,ni liiva lyoolyo lyoosi, ni tsiingulu tsyotsyo tsyoosi , nende tsinganakani tsyootsyo tsyoosi, khaandi uyaanse murheende woowo, khuli mweene wiyaansa." ²⁸ Yeesu yamuvoolera, "Uhaani marheevuli malahi muno; khoola ndyo khutsiitsachirire khuva mwooyo." ²⁹ Navutswa mweechitsi wa Malako, khulu khwiikhola mweene khuva wi liikhola lyu vuluunji, yarheeva Yeesu,"Nu wiina murheende waanje?" ³⁰ Yeesu yamurheevulila, "Litukhu liindi muundu yali nakholomokhaanga khurhula Yerusalemi, natsitsaanga mu litaala lya Yerhiko, ma vaandu vanuuli ni vamukhamarha.Nivamufwaalula tsinguvu tsyeetsye, nivamurhumula;ni viirhukha nu khumwiivala narhikaliile hiimbivutswa ni lya ha mwooyo. ³¹ Khu lwi ikhavi indahi, musaaliisi yali na kholomokhaanga khu muhaanda kweene yoko.Lwa yaalola muundu mweene woyo, yacheenda navirhila handulu haand. ³² Khali muundu ya rhulaanga mu vaandu vu luvaamba lwa Leevi yaakhoola khaandi ndyo.Lwa yalola muundu mweene wooyo yacheenda na virhila khundulu haandi. ³³ Navutswa Musamarhia, wali khu lucheendo lweelwe navirhila khu muhaand kweene yoko, yatuukha hu muundu mweene woyo yali niyaalikhitswe. Lwa yamulola, yamulolera tsimbavasi, ³⁴ yaatysa khuye ma navekha makurha nende idivai khu makuule ku muundu mweene woyo nu khukavoha.Yamuchiinga na muviikha khu ipuunda yeeye, namuhira mu insu ya vacheeni, wa yamuliinda vulahi. ³⁵ Litukhu lya loondakhu, yavukula tsidinarhi tsiviri ,namuha muliindi wi insu ya vacheeni.Yamuvoolerha, "Umuliinde vulahi;khaandi shya shiindu shyoosi shya uliitsa khurhumikhila khuye, ndiitsa khukhurhuunga lwa ngalukha." ³⁶ Yeesu yamurheeva, "Nu wiina khu vavaka veene yavo, wa ukanakanaanga yakhoola khuli murheende watooto khu muundu wa vanuuli vakhamarha nu khulumiinda? ³⁷ Mweechitsi wa malako yarheevula,"Muundu wamuvererera nu khumulolera tsimbavasi."Yeesu yamuvoolera,"Simukha utsii , ukhoole khuli yakhoola." ³⁸ Lwa Yeesu na veechitswi veeve vali ni vali khu lucheendo lwaavo, vatuukha mu muchiitsi mwa mukhali walaangwangwa Malita yamwiinjilitsa haango heehe. ³⁹ Malita yali nu mwaana wavo amwaavo weewe walaangwangwa Mariya, wali niyikhale havilenje wu Mwaami khaandi na huliikhitsa mechitso keeke. ⁴⁰ Navutswa Malita yali ni liheend mwooyonu muhiinsirho kwoosi kwa yakhoolaanga.Yasimukha natsia khu Yeesu na murheeva,"Mwaami shyunyala khumbeenderakhu mwooyo, mwaana wi shikhaana weerhu wuyu, undekheere kholaanga mihiinsi chyoosi woonyeene taawe? Muvoolere yiitse khukhonya," ⁴¹ Navutswa Mwaami yamurheevulira, "Malita, Malita uheendaanga mwooyo nunyakhana , shichira viindu vinyiikhi; ⁴² navutswa shiindu shilala hyoonyene, shya utukhana unyole, Marhiya urhovoole shiindu shilahi;shiliitsa khuvula khurhulitswa khuye."