¹ Yeesu yavoolera veechitswi veeve, viindu vichiraanga vaandu nivakhoola vwooni vili hiimbi khwiikhorekha; navutswa muundu uchiraanga viindu vyeene yeevo nivikholekha, ali khuvutiinyu muno! ² Vwakhaveere vulahi muundu khuli mweene wooyo, khusuungwa lichiina likali khuli lyu khusyierakhu mwiing'orhi mweemwe, nu khusuuvwa mu inyaansa, khuvirha khuchira mulala khu vatiititi yava khukwa mu vwooni. ³ Khu lwa yako muvee vacheeri khuloondekhaana khu ka mukholaanga ! Niiva musuuviri washyionyo alava na khooli vwooni, mumukoondekhere, khaandi niiva alikanirha, mumusaamihe. ⁴ Niiva alakhukholera vwooni khali saba khulitukhu lilala, na vuli lwoosi lwa yiitsaaanga khu munye navoola, mali kwiikanira, khutukha mumusaamihe." ⁵ Varhumwa vavoolera Mwaami, "Khukhonye khuve ni lisuuvira li tsingulu!" ⁶ Mwaami yarheevulira, "Niiva munyala khuva ni lisuuvira li tsingulu khuli lukuutsa lutiititi muno khuli lwi lisavaakhwa, mwakhavooleere musaala kusaasaanga mukhuyu yuku, "Rhiinyukha ni miiri, wirhaache mu nyaansa! khaandi kwahiyaamire makhuuva keenyu." ⁷ "Niiva mulala khumunye anyala khuva nu muhiinsiri wu mumulimi, anoho wayitsaanga makoondi.Lwa yitsaanga na rhula mu mulimi, mumuvooleraanga haamba vwaangu wikhale hasi ha shiivwa khulia shyukhulya? ⁸ Shikaveetsa ndyo taawe! Nikhali , shumulamuvoolera "Khuloomere shyukhulya shya halukoloova, na wiifwaare inguvu yu khuhiinsirira nu tekhaanga, ma khaandi ulakhukavulira khulii nu khung'wa; ma nukhwaakhamala khulya, unyala khulya shyoshyo? ⁹ Ndeeva ndi amanya asaanditsa muyiitsiri weewe shichira ukholi kayavoolerwa akhole? ¹⁰ Khu lwa yako nindyo khaandi kali khu munye. Lwa muveetsaanga nu mumwakhamala khukhoola koosi ka mwavoolerwa mukhole, vooli, "Khutse khuli vutswa varhumikhi, khukholi vutswa kakhweenyekhanaanga khukhole." ¹¹ Na yaka kiikhoolekha lwa Yeesu yali nali khu lucheendo lwee natsiitsaanga Yerhusalemu, yaloonda khumpaka khuli hakari ha Samara na Galilaya. ¹² Lwa yali niyiinjilaanga mumuchitsi kuundi, yaakaana na vaandu likhomi vali ni valwaala vuchele; na vali ni vasiinjire ihale weene khurhula khuye, ¹³ na ni valaanjilira ;"Yeesu Murhuchi! Khuveere tsimbavasi.!" ¹⁴ Lwa Yeesu yaloola vaandu veene yavo, yavavoolera , "Rhaanji mutsi khu vasaalisi vamukoole."Lwa vali nivatsiitsaanga vakholwa khuva vanihitswe . ¹⁵ Lwa mulala khuvo yaloola uhonyiinywe, yakalukha ni yitsoominyaanga Nyasaaye, na laanjilira nu mwooyo mukali. ¹⁶ Yiitsa nu khusikama ha vileenje vya Yeesu, nu khumusaanditsa.Muundu mweene wooyo yali Musamaria. ¹⁷ Yeesu yarheeva, "Shyu muveere vaandu likhomi lwa murhumi mutsii khwimanyinya khu vasaalisi, ma mulahoona? Vaandi tisa valeehe? ¹⁸ Shichira shiina muundu mucheeni wuuyu, naye ukalukhee woonyene khusaanditsa Nyasaaye? ¹⁹ Khu lwayako , Yeesu ya muvoolera "Siinjira utsi; liisuuvira lyolyo liimali khukhuhoonyinya." ²⁰ Valala khu Vafarisayo varheeva Yeesu lwu Vwaami vwa Nyasaaye vuliitsa khwitsa.Yeesu yavarheevulira, "Vwaami vwa Nyasaaye ,shuvuliitsa khwitsa munjira ya mwiitsa muloole ni tsimoni tyseenyu nu vwiitsaanga. ²¹ Shyukhulikhuho muundu wiitsa avoole "Loola vuli haanu! anoho Loola vuli yeeyo! shichira vwaami vwa Nyasaaye vuli mu munye." ²² Kulwayako Yeesu yavavoolera veechitswi veeve, "Matukhu kaliitsa khwiitsa lwa mwiitsa mweenye khuloola litukhu lilala khu matukhu ku Mwaana wu Muundu, navutswa mwiitsa muvule khuliloola. ²³ vaandu viitsa vaveho , viitsa vamuvoolere, "Looli,yeeyo! anoho Looli haanu! Navutswa mukhatsiyo, anoho mukhavaloondiyo. ²⁴ Khuli luheeni luhemukhaanga mumalesi nu khwakhitsa vulavu khurhula luveka lulala khutukha luundi, ni ndyo haandi Mwaana wu Muundu nave khulitukhu lyeelye. ²⁵ Navutswa khurhaanga , Mwaana wu Muundu yiitsa anyakhaane vululu muno, nu khwaambakhanwa na vaandu vilikhula lya matukhu kanu. ²⁶ Khuli lwa kikhoolekha mu matukhu ka Nuhu, ni ndyo khaandi kiitsa kikhoolekhe mu matukhu ku Mwaana wu Muundu. ²⁷ Vaandu vatsitsachiirira khulya nu khung'wa; vaandu vasaatsa na vakhali ni vahirhana, khutukha khu litukhu lyu khumalilikha lwa Nuhu yiinjila mulyarho.Maatsi ki michelera kiitsa manyiikhi ni kamulula vaandu voosi. ²⁸ Khaandi ni ndyo kikhoolekha mu matukhu kali ka Looti.Vaandu voosi vatsitsachiirira khulya nu khung'wa; ni vakuula nu khukulanyinya,khaandi ni varhaaka nu khuumbakha. ²⁹ Navutswa lwi litukhu lwa Looti yarhula mu litaala lya Sodomu, muliro na salufa vyarhoonya khurhula mwiikulu, ni viirha vaandu voosi. ³⁰ Nindyo khaandi kaliitsa khwikholekha khu liitukhu lyu Mwaaan wu Muundu aliitsa khumanyinywa. ³¹ "Khulitukhu lyeeneyero, muundu uli ikuulu khushiseksese shiinsu akhiikha khutsya khwinjira muunsu khuvukula viindu vyeevye, munjira indala ntsere , muundu uli mu muliimi akhakalukhakhu muunsu. ³² Mwiitsukhitse kikhoolekha khu mukhali wa Looti! ³³ Muundu woosi uchelitsaanga khuhonyinya vulamu vweevwe, aliitsa khuvukorhitsa; navutswa muundu ukorhiitsaanga vulamu vweevwe, aliitsa khuvuhonyinya. ³⁴ Kilikali muvoolera, muvutukhu vweene yovo, khulitsa khuva na vaandu vaviri ni vakoni khu shitali shilala; mulala aliitsa khuvukulwa, na wuundi alarhikwa inyuma. ³⁵ Khuliitsa khuva na vakhali vaviri muluchina vasyeetsaanga vyaakhulya halalala; mulala aliitsa khuvukulwa, na wuundi yivalwe inyuma. ³⁶ Vaandu vaviri viitsa vave ni vahiinsilaanga mu mulimi; mulala aliitsa khuvukulwa, na wuundi yivalwe inyuma." ³⁷ Khulwa yako veechitswi veeve vamanya vamurheeva,"Mwaami ni heena?" Yeesu yavarheevulira, "Havuundu hoosi hu mmbiri ku khutsi kuli, manyonyi ki tsiinditso kivuncheritsa havundu heene yaho."