¹ Yeesu yavoolera khhaandi veechitswi veeve, "Khwaliho nu muundu mulala muhiinda wali nu muhiinsili wasinjililaanga miandu chyechye. Yatsamilwa ndi muhiinsili weewe arhumikhilaanga miandu chyechye mu injira indamaanu ² Muhiinda wooyo yaalaanga muhiinsili weewe, namurheeva, "Makhuuva shiina kambulilaanga khu yiwe?Mboolera khu shiindu khuli uliindaanga miandu chyaanje, shichira shyunyala khutsianyinya khusinjilila miandu chyaanje khaandi taawe. ³ Muhiinsili wooyo yirheevana mweene, "Shimanyi nyala khukhoola shiina nuunundi? Murhuchi waanje yenyaaanga khusinjilitsa khu mihiinsi chyaanje? Na mbula tsingulu tsyukhulima, na khaandi ni tsisooni khusavasava vaandu viindu vyaavo. ⁴ Manyi shaansitsa khukhoola khurhula nuunundi, khu lwa sinjilitswa khu mihiinsi chyaanje, mbee na valina vanyiikhi vukhuntsijilitsa mu tsiinsu tsyaavo. ⁵ Khulwayako yalaanga shya mulala khu vaandu vali na makoovi ku murhuchi weewe.Namurheeva muundu wu khurhaanga , "Uli ni likoovi lyu murhuchi waanje lituukha shiina? ⁶ Naye yamurheevulila, "Lituukha mapiipa imya indala ka makurha ku musayituni."Yamuvoolera, "Vukula ikaratasi yooyo ya makoovi, wikhale hasi vwaangu, uhaandike ulii ni likoovi makomi karhaanu. ⁷ Yarheeva wuundi,"uli ni liikoovi lituukha shiina?Naye yamurheevulira, "Makunia ki yingaanu imya indala."Yamuvoolera, "Vukula ikaratasi yooyo ya makoovi, wikhale hasi nu khuhaandiika uli ni likoovi makhomi munane. ⁸ "Murhuchi mweene wooyo yitsoominya muhiinsili wambakhaana khuva musuuvilwa khuvirhira mu vucheeri vweevwe; shichira vaandu vu mushivala shinu ,, vali nu vucheeri vunyiikhi khukhoola makhuuva kaavo ku mu shivala shinu khuvirha vaandu vamenyaanga mu vulavu." ⁹ Yeesu yatsiririra khuvavoolera,"Muvooleraanga ndi murhumikhire miandu chyu mushivala shinu khwiinyoolera valina, khu lwa chiliitsa khuhwa, muliinjilitswa haango hii mihika ni mihiika.. ¹⁰ Muundu uli musuuvilwa mu viindu vitiititi, nu musuuvilwa mu viindu vinyiikhi; na muundu wambakhanaanga kuva musuuvilwa mu viindi vitiititi, sha nyala khuva musuuvilwa mu viindu vinyiikhi taawe. ¹¹ Niiva mwayambakhana khuva vasuuvilwa khusinjilira miandu chya mwanyoola mu shivala , nu wiina wa namuhee khusinjilira miandu cha tooto? ¹² Niiva mwa yambakhana khuva vasuuvilwa khu miandu chya vaandu, nu wiina uliitsa khumuha miandu chyeenyu munye veene? ¹³ Avulakhuho murhumikhi unyala khurhumikhira va rhuchi vaviri; anyala khuhima mulala, nu khuyaansa wuundi, anoho aliitsa khuva musuuvilwa khu mulala khaandi alecheeritse wuundi.Shyumunyala khurhumikhila Nyasaanye neende tsisenti taawe." ¹⁴ Vafarisayo vali ni vayaansa tsiseenti, vahulira makhuuva keene yako koosi, vamuchaya Yeesu. ¹⁵ Navutswa Yeesu yavavoolera, Munye navo vamwiikhoolakhoolaanga khuva valuunji imberi wa vaandu; navuvtswa Nyasaaye wamanya kali mu myooyo chyeenyu; shichira viindu vya vaandu vitsoominyaanga mu shivala shinu, vilolekhaanga khuli ni shifwavu imberi wa Nyasaaye. ¹⁶ "Malaako ka Musa na mahaandiko ka Vaporofeti kaliho khutuukha khu matukhu ka Yohaana Mupatisi.Khurhaanjila mumatukhu keene yako, Ivanjeeri khuloondekhana khu Vwaami vwa Nyasaaaye yamala khwiirwaatswa; khaandi sha vuli muundu woosi arhumikhilaanga tsingulu khwiijilamu. ¹⁷ Navutswa nu vutoorho likulu ni lirova khurhulaho khuvirha khali indukurha intiititi yeene ya Malako khuvula khurhweekhitswa. ¹⁸ "Musaatsa ukhungaanga mukhali weewe, khaandi ahila mukhali wuundi akholaanga vuheeyi; na khaandi musaatsa uhiilaanga mukhali wu musaatsa weewe yakhuunga, akholaanga vuheeyi naye. ¹⁹ "Liitukhu liindi khwaliho nu muundu muhiind, yali niyifwaala tsinguvu tsya sambarhau tsyu vukuli vululu muno, na vuli litukhu, yali yamenya limenya lyu khwiiyaansitsa mweene. ²⁰ Hashilivwa heehe,muunu mumanani wa valaangaanga Latsaro yikhalaho, yali yayitsula makule khu mmbiri kweekwe. ²¹ yaliho nu khwiikoomba khulya shyukhulya shyali ni shirhoonyi hasi khurhula khu imesa yu muhiinda mweene wooyo,Tsisiimbwa tsyatsitsaanga khumukhoomba mu makule keeke. ²² Na yiinyinga yatukha mumanani mweene wooyo yakhutsa nahilwa ni tsingerosi khwiikhala hiimbi na Abrajhamu mwiikulu .Muundu muhiinda wooyo yakhutsa, nayavilwa mushiliindwa. ²³ Muhiinda mweene wooyo nali mu shihaatisi , khaandi nali mulinyaakhani linyiikhi, yachiinguula tsimoni tsyeetsye naaloola Abrahamu ihale weene, na Latsaro niyikhaale hiimbi khuye. ²⁴ Khu lwa yako yaalaanga nu mwooyo mukali, "Taata Abrahamu, umbeere tsimbavasi na undumire Latsaro wooyo, nambula atsi khwiinikha shitere shyeshye mu maatsi nu khwiitsa khundonyiinyila khululimi lwaanje imburhu ya maatsi kashinditse lulimi, shichira salilitswa vululu muno mumuliro yumu!" ²⁵ "Navutswa Abrahamu yavoola, "Mwaana waanje wamanya ndi mulimenya lyolyo , wali waheelwa vuli shiindu shyoosi shilahi; navutswa Latsaro shiyali yaheelwakhu shiindu shyoosi taawe.Navutswa nuunun ndi amali khuleminywa mwooyo hanu,; nikhali usalilitswaanga vululu muno. ²⁶ Khumeeta khu keene yako, hakarhi heeru na yiwe, khuli nu vwiina vu luhoongo lurhaambi,khali yavo venyaanga khwaambukha khurhula ha khuli hanu kwiitsa wa uli yeeyo,shivanyalakhu taawe.Muundu anyalakhu khwambukha khurhula wa uli yeeyo khwiitsa khulucherekha wa khuli yinu. ²⁷ Muhiinda mweene wooyo yavoola, "taata Abrahamu, nuyaansa khandumire Latsaro ²⁸ shichira ndi na vamwaavo vaanje varhanu . Lekha atsi mu vaandu vi insu ya taata waanje khuvachelihitsa, khu valivula khwiitsa havuundu ha nyakhanilaanga hanu. ²⁹ Navutswa Abrahamu yavoola,"Vamwaavo voovo vali na Malako ka Musa na khaandi na mahaandiko ka Vaporofeti;Lekha vahulikhitse sha kavoolaanga. ³⁰ "Yaavoola "Taata Abrahamu, shikali ndyonio taawe; navutswa niiva muundu mulala ,anyala khutsya khuvo, niyisimukuhitswe khurhula mu liikhutsa, valatuukha khwiikanira khurhula mu vwooni vwaavo. ³¹ Abrahamu yamuvoolera,"Niiva varhamwa khuhulikhitsa Malako ka Musa na Mahaandiko ka Vaporofeti, valiitsa khuvula khusuuvira khali niiva muundu anyala khwiisimukukha khurhula mu likhutsa,"