¹ Yatukhu inyiinga vasolooli vwu vushurhu vali ni viitsa khu Yeesu khumuhulikhitsa na lomolomaanga. ² Valala khu Vafarisayo na Veechitsi va Malako, varhaanga khung'uung'uuna , nukhuvoola, "Muundu wuuyu yiinjilitsaanga vaandu vooni, na khaandi nalya navo." ³ Khu lwayako Yeesu yavavoolera lukanu yuulu: ⁴ "Khuvoole, niiva mulala khu munye ali na makoondi yimya indala ma akorhitse lilala khuko, avule khuleekha makoondi karhikaale makhomi tisa na tisa mu lwayiro, nu khutsya khukhaava liikoondi lilala likorhi lyeene yeero khutuukha lwa alinyoola? ⁵ Na inyiinga lwa alinyoolaanga, alichiingaanga khu maveeka keeke nali nu vuyaansi. ⁶ Lwa atuukhaanga mumuchitsi kweekwe , alaangaanga valina veeve na vareende veeve halala, nu khuvavoolera."Haambi mwikhoyere ni yinse shichira mali khu nyoola likoondi lyaanje lyali ni lyakorha." ⁷ "Munjira indala ntsere, muvooleraanga, ndi khuliitsa khuva nu vuyaansi vunyiikhi mwiikulu, shichira mwooni mulala wikanirhaanga khuvirha vaandu vi likhola lyu vuluunji makhomi tisa na tisa vambakhanaanga khwikanira. ⁸ "Khvoole mukhali uli ni tsishilinji lkhomi tsyaloombwa khu ifetsa, ma akorhitse likongolo lilala khutsyo, anyala khukhola shiina?Alavula khuhaambitsa itaaha, nu khuyeentsa muunsu mweemwe khukhava iseenti yeeneyeyo, khutuukha lwa achinyoora. ⁹ Lwa ava niyakhachinyoora alalaanga halala valina veeve na vareende veeve, avavooleere,"Haambi mwikhoyere ni inse shichira mali khunyoora isenti yi ishilinji yaanje iveere ni koorhi. ¹⁰ Mu injira indala ntsere, muvooleraanga ndi tsingerosi tsya Nyasaaye tsivetsaanga nu vuyaansi vunyiikhi shichira muundu mwooni mulala umali kwiikanirha," ¹¹ Yeesu yatsiririra khuvoola, "Litukhu liindi, khwaliho nu muundu wali na vaana vi shiyaayi vaviri,. ¹² Mwaana mushye yavoolera taata weewe, "Taata , mbee shikha shyaanje khu miandu cho nuunundi.Taata weewe yakavulira vaana veeve vaviri veene yavo miandu chyeechye. ¹³ Matukhu matiititi ni kakhavirha, mwaana mushye yavuncherhitsa miandu chye chyoosi na kulitsa, na hamirha mushivala shi yihaale muno.Nali yiweeneyo yamalirha tsisenti tsyetsye khulimenya liishivala livula vukhonyi. ¹⁴ Lwa yali yamali khurhumikhila tsisenti tsyoosi na shyoosi sha yali nashyo, inyinga yi insala yakwa mushivala mweene yomo; naye yali mu vunyaakhani. ¹⁵ Yamanya natsia khuhaandiika khukhola ikaasi haango hu muundu mulala wi shivala shyeene yesho.Muundu mweene wooyo yamurhuma khutsya khukhoola mihiinsi mu mulimi mweemwe, ku khuha tsingulume shyukhulya. ¹⁶ Yiikoomba khulya vyukhulya vi tsingulume tsyaliitsakhu; navutswa avulakhuho muundu wamuheetsakhu shyukhulya shyoosi. ¹⁷ Lwa muyayi wooyo yali yakhacheliha," Vahintsili voosi va taata waanje yasamuliitsa khumukhoolera mihiinsi vali ni vyukhulya vinyiikhi, khali vivarhama khumala, navutswa insala yeenyaanga khutsirhila haanu! ¹⁸ "Nda simukha ngalukhe khu taata waanje, muvoolere, "Taata waanje, ndaakhoola vwooni khu Nyasaaye khaandi khu yiiwe; ¹⁹ Khali shindukhana khulaangwa mwaana woowo taawe; khoola mbe khuli mulala khu vahiitsili voovo, va wasamulitsa." ²⁰ Yarhula natsya khu taata weewe. "Navutswa lwa yali nashili khuunjira ihale weene khurhula ingo, taata weewe yamuloola.Yamuloolera tsimbavasi, niyiirhukhaka, natsya khu mukhumbeerera khaandi natsuntsuna mwaana weewe mweene wooyo. ²¹ Mwaana mweene wooyo ya muvoolera taata weewe, "Taata waanje, ndaakhoola vwooni khu Nyasaaye khaandi khu yiiwe; khu lwayako shindukhire khulaangwa mwaana woowo taawe." ²² Navutswa taata weewe yavoorera varhumikhi veeve, "Leerhi vwaangu inguvu indaahi yeene, mumufwaale; khaandi mufwaali ipete khu mukhoono kweekwe ni vilaaro mu vileenje vyeevye. ²³ Musiinsili shimooli shikhoomeru yeeyo, khwikhoyere liilya lilinyoolekha lyelye. ²⁴ Shichira mwaana waanje wali yakhutsa navutswa, khu lwa leero munyooli nashili mwooyo; yali yaakorha navutswa nunundi khumali khumunyoola,khulwa yako varaanga hwiikhoyera lilya lyu khunyoolekha lyelye. ²⁵ "navutswa mwaana weewe , muyayi mukhuluundu yali nali mu mulimi.Lwaa yiitsa nali hiimbi khutuukha khu insu,yahulila vaandu viimbaanga tsinyiimbo tsyu vuyaansi nu khusieva. ²⁶ Yalaanga murhumikhi mulala, namurheeva amwiivalire makhuuva kali ni kikhoolekhaanga. ²⁷ Murhumikhi mweene wooyo yamuvoolera, "Amwaavo woowo umali khukalukha haango haanu, na taata woowo umusiinsile shimooli shikhomeeru, shichira umali khunyoolekha na shili mwooyo khaandi mulamu. ²⁸ Mwaana mukhuluundu yali nu vurhiima vunyiikhi muno, niyaambakhana khwiinjira muunsu.Khulwa yako, taata weewe yaiitsa ilwaanyi khumusaaya na yaansa yiinjire; ²⁹ navutswa yavoolera taata weewe, "Loola, mihika yichi chyoosi, ndaamenya haanu ni khukhooleraanga mihiinsi khuli murhukwa, khaandi shili khwaambakhanakhu malako kooko koosi. Ni shiina sha waambaakhu?Khali ushiri khumbaakhu imbuli, khu ndikhoyerekhu na valina vaanje. ³⁰ Navutswa mwaana woowo wuyu wamalila miandu chyu waamuha khu vakhali ni vakhoolaanga vulaaya; navutswa lwa amali khukalukha haango , umusinsiile shimooli shikhoomeru! ³¹ Taata weewe yamurheevulira, mwaana mukhuluundi ndi"Mwaana waanje, vuli khase khoosi umenyaanga ni inse, khaandi miandu chya ndi nacho chyoosi ni chyochyo ³² Vuvere vulahi khwiikhoyere nu khuyaansa , shichira amwaavo woowo yali waakhutsa, navutswa nuunundi ashili mwooyo; yali yaakorha, navutswa nuunundi khumali khumunyoola."