¹ Khulitukhu liindi li Lisaapato,Yeesu yasimukha natsia khulya mu insu yu mulala khu vimilili va vafarisayo; navamuheensekhitsa. ² Muundu wali nu vulwaale vu khuviimba vilenje na makhono,yiitsa khu Yeesu. ³ Yeesu yalomoloma khu veechitsi va malako na vafarisayo,navareeva,"Malako keerhu kavuchiliraanga khuhoonyinya khu litukhu li Lisaapato anoho khuvula khuhoonyinya?' ⁴ Navutswa voosi vashirhing'ana. Khu lwayako Yesu yavukula muundu wooyo nu khumu hoonyinya nu khumuvoolera atsi. ⁵ Yeesu yamanya arheeve vaandu, "Niiva mulala khu munye alava ni ichirhishi anoho mwaana ma ikwii mu vwiina khulitukhu li Lisaapato, aliitsa khuleekha khumukhweesa khurhulamu?" ⁶ Navutswa vaandu vashirhing'aana vuchira khumurheevulila shiindu shyoosi khu koosi kayarheeva. ⁷ Lwa Yeesu yaloola khuli vacheeni vivukulirha visako vyuluyali ha mesa, yavavoolera lukanu yuulu: ⁸ "Lwa muundu avetsaanga na mulaanji mu shiseerero shyu khuhilaana,muvule khwiivukulirha havundi hu luyali lwamwinjilaanga, shichira muundu wuundi uli nu vunyali khumuvirha anyala khuva ni yalaangwa; ⁹ ma leero muundu wamulaanga munye vaviri , anyala khwiitsa amuvoolere ,"Yiwe sinjilirha muundu wuyu, na uliitsa khuloola tsisoni luvoolerwa yikhala inyuma. ¹⁰ Navutswa lwa uveetsaanga nu laanjirhwee , yikhala havundu hakhutukhire, khu lwa muundu yakhulaanga yiitsa, akhuvoolere,"Mulina,haamba wiikhale khushisako shili shyu luyali yaho, ma uheelwe luyali mu vacheeni voosi valaangwa. ¹¹ Muundu wiikalihiitsaanga mweene khuvirha vaandi, aliitsa khucheehitswa,khaandi wiicheehitsa mweene, aliitsa khuheelwa lichiinguulwa." ¹² Yeesu yavoolera muundu wali na mulaanji,"Lwa uvetsaanga nu haana shyukhulya shya mmbasu anoho shyu khulukoloova,ukhalaanganga valina voovo,anoho vaamwaavo voovo anoho viikho voovo anoho varheende voovo vali vahiinda; shichira navo valiitsa khukhulaanga khaandi, ma vave vakhurhuunji ka waavakhoolera. ¹³ Navutswa luloombaanga vucheeni vwu lilya, laanga vaandu vamanani,vafwookoya, valeema na vaveekhu; ¹⁴ khaandi uliitsa khukaasitswa, shichira vavula lwa vanyala khukhurhuunga. Nyasaaye aliitsa khukhurhuunga khulitukhu lya vaandu valahi valiitsa khwisimukukhitswa khurhula mu liikhutsa." ¹⁵ Lwa muundu mulala khuvo wali ni yiikhale halala na Yeesu ha mesa mulilya yahulirha yaka, yavoora,"Vali niikhaavi yaavo vikhalaanga, nivalya muvucheeni vuliilya mu vwaami vwa Nyasaaye! " ¹⁶ Navutswa Yeesu yamuvoolera, "Liitukhu liindi , muundu mulala yaloomba vucheeni vywi liilya vukali, na laanga vaandu vanyiikhi. ¹⁷ Lwa litukhu li liilya lyatuukha, muundu mweene wooyo yarhuma murhumikhi weewe khuvooleera vaandu vali nivalaanjilwa, "Haambi' shichira viindu vyoosi vili virheecheekhe nuunundi. ¹⁸ Navutswa vaandu voosi , varhaanga khuhaana vivune vyaavo vyu khuvula khwiitsa.Muundu wu khurhaanga yamuvoolera,Nguli mulimi, khutuukha nsii khukulurha; khusaayaanga nuyaansa umbeere, mbula vwiiyaangu. ¹⁹ Wundi khaandi navoola, "Nguli tsichirishi likhomi tsyukhulimira, na ndenyaanga khutsya khutsichelitsa,khu khusaaya nuyaansa umbeere, mbula vwiiyaangu. ²⁰ Wuundi navoola, "mbiiri mukhali vwaangu yuvu, khu lwayako, shinyaala khwiitsa khukhuloola taawe. ²¹ Murhumikhi woyo yakalukha na voolera murhuchi weewe shya vuli shiindu shyoosi, shya vali nivavooli.Murhuchi mweene wooyo yali nu vurhima, navoolera murhumikhi weewe "Simukha utsii vwaangu mu mihaanda nu mutsiinjira tsinyerere tsyu mwitaala;ma underheere haanu vaandu vamanani, vafwookoya,vaveekhu na valeema. ²² Murhumikhi wooyo yavoola" Mwaami mali khukhoola shya shiindu shyoosi shyu umbooleere; navutswa khu shiliimu vwiiyaangu vwa vaandi. ²³ Murhuchi mweene woyo yamuvoolera, "Simukha utsi mumihaanda nu mu ysinjiira tsinyerere, uvaloombe vaandu viitse khwiinjila, khu insu yaanje yiitsule. ²⁴ Muvooleraanga munye voosi ndi khali mulala khu vaandu vali nivalaangwa veene yavo, aliitsa khuvula khutsaantsama khu shyukhulya shyaanje." ²⁵ Lwa vituma vikali vyali viyuunji khuloonda Yeesu, Yeesu yishevukha navavoolera, ²⁶ "Niiva muundu yeenyaanga khunoonda, khutuukha yambakhane taata weewe na nyiina weewe, mukhali weewe, vaamwaavo veeve na vaambootso veeve, khali nu vulamu vweevwe mweene; na narhamilwa khukhola ndyo, shya nyala khuva mweechitswi waanje taawe. ²⁷ Muundu wambakhanaanga khuchiinga musalaba kweekwe nu khunoonda, shyanyala khuva mweechitswi waanje taawe. ²⁸ Nu wiina khu munye weenyaanga khuumbakha munaara, avula khurhaanga nu khwiikhala hasi , amanye vukuuli vu munaara kweene yoko kunyala khuvukula, nu kheensa aloole niiva ali ni tsiseenti tsinyala khumala muhiinsi kweene yoko? ²⁹ Nakhakholi ndyo, ma arhaanjitse musiinji, navutswa avula vunyali vukhuumbakha , vaandu va veetsaanga ni valooli kakhoolaanga, avarhaanga khumukhoolera shiheenyeheenye; ³⁰ ni vavoola, "Muundu wuyu yiilukhachila khuumbakha, navutswa yarhamwa khumala muhiinsi. ³¹ "Anoho nu mwaami shiina, atsiitsaanga khulwaana nu mwaami wuundi, avulaanga khwiikhala hasi nu kwiirheevana niiva alarhumikhila vasikali veeve tsiheelefu likhomi, khutsia khulwaana nu mwaami wuundi uli na vasikali tsiheelefu makhomi kaviri? ³² Niiva shyali ni tsingulu tsyukhumulwaana, lywu mwaami wuundi wooyo aveetsaanga na shili ihaale weene, yilukhachirha khurhuma murhumwa weewe khutsya khurheeva vamolome khuleerha mireembe. ³³ Mu inchira indala ntsere, muundu avulakhuho mu munye unyala khuva mweechitswi waanje, na khalekhi vuli shiindu shyoosi shyali nashyo. ³⁴ Muunyu nu mulahi; navutswa niiva muunyu kulakorhitsa shinochi sha kwoo,kukhoolwa ndiina khu khaandi kukalukhe khuva muunyu? ³⁵ Kuvulakhu vukhoonyi khali hati khu mulimi anoho khuloombwa imboleeya; nashyo shichira vaandu vakusyuva ihaale weene.Muundu uli na marhooyi ku khuhuulira, na uhuulikhitse."