¹ Mu yinyiinga yeene yeyo , vaandu valala vali nivaliho vavoolera Yeesu makhuuva khulondekhana khu Va Galilaya va Pilato yali ni yiirha, lwa vali nivahaanaaga vihaanwa vyu khukholera misaango khu Nyasaaye. ² Yeesu yavavoolera, "Mukanaganaanga Vakalilaya veene yavo vali ni vaakhoola vwooni vunyiikhi khuvirha Vakalilaya vaandi voosi, kachira viirhwa munjirha khuli yeene yeeyo? ³ Aawa, muvoolera ndi shikali ndyoono taawe! Navutswa niiva mushiri khwiikanira khurhula mu vwooni vwyeenyu, khali munyee voosi muliitsa khukhutsa khuli vo vakhutsa. ⁴ Anoho ni shiina shya khunyala khuvoola khuloondekhana khu vaandu likhomi na munane vaakhutsa, lwu munaarha kwa Silohamu kwaakwa khuvo? Mukanakanaanga navo vali vakhoola vwooni vunyiikhi khuvirha voosi vamenyaanga mu Yeerhusalemi? ⁵ Muvooleraanga, shikali ndyoono taawe! Navutswa numushiri khwiikanira khurhula mu vwooni vweenyu , kahli myunye voosi muliitsa khukhutsa khuli vo vaakhutsa." ⁶ Nalwo lwa Yeesu yavavoolera lukanu yulu: Khwaliho nu muundu wali ni yarhaaka musaala ku mukhuyu mu muliimi kweekwe kwii misapipu. Muundu mweene wooyo yasimukha nu khu tsya khuhaatuula lituunda khu musaala kweene yoko, navutswa shi yanyoola khukhu lituunda lyoosi mba. ⁷ Khu lwa yako ,yaavoolera museemberhi wu mulimi kweekwe, "Loola, khumihika, chivaka yiichi , mmeenyi ni ntsitsaanga mbaatule liituunda khurhula khu musaala ku mukhuyu yuku:navutswa mbulakhu lituunda lyoosi lyaa nyoolakhu. Kurheemere haasi ! Shichira shiina kutsilirire khumala vunuuka vwa valova? ⁸ Navutswa museemberi mweene wooyo yarheevulira mweene mulimi, "Mwaami , kuleekhe kuve , khukuhee muhika kuundi; ntsiitsaanga khukuseemberera khaandi ndeekhu imboleeya. ⁹ Niiva kulaama matuunda khumuhiika kuloondakhu , vuliitsa khuva vulahi muno! Navutswa niiva shyukunyala khwaama matuunda taawe, unyala khukurheemera haasi." ¹⁰ Litukhu liindi li Lisapato, lwa Yeesu yali niyeechitsaanga mu lisinakoki, ¹¹ yaaloola mukhali wuundi naalimu wi litimoni lyaali lwaalitsa khumihika liikhomi na munane.Yali wakokhooma mukoongo, khaandi avulakhu khuli wali unyala khuluunjikhitsa. ¹² Lwa Yeesu yamuloola yamulaanga, namuvoolera, "Mukhali yiiwe, umali khuhoona khurhula mu vulwaale vwoovwo." ¹³ Khu lwa yako , Yeesu yaviikha makhono keeke khu yee, na yakololokha vwaangu, khaandi niyitsoominya Nyasaaye. ¹⁴ Navutswa mwiimiliri wi Lisinakoki, yiitsula vurhima , shichira, Yeesu yali na hoonyinye muundu khu liituukhu li Lisaapato.Yavoolera vaandu, "Khuli na matuukhu sita ku khukhoola mihiinsi.Mwiitse mu matuukhu keene yako muhoonyinywee, navutswa khu lituukhu lilisaapato taawe." ¹⁵ Mwaami yamurheevulira "Munye vamwiikhoola khoolaanga khuva valuunji! Mulala khu munye shya vohololaanga ichirhishi anoho ipuunda yeeye khurhula mushiiko, khuchihira khung'waa maatsi khuliitukhu li Lisaapato? ¹⁶ Mukhali wuyu, shyaali mwiitsukhulu wa Abrhahamu wa Shetaani yanyaakhitsa khumihika likhomi na munane; shyaanyala khuvula khuhoonyinywa khurhula mu vulwaale vweevwe khulitukhu li Lisaapato?" ¹⁷ Lwa Yeesu yali na shivoolaanga ndyo, vatsiku veeve voosi valoola tsiisoni, na vaandu voosi niviikhonya khuloondekhana khu viindu vyoosi vyu khucheenyinya vya yali naakholi. ¹⁸ Yeesu yarheeva, "Vwaami vwa Nysaaye vuli khuli shiina? Ni shiina shya khunyala khusaasanyinyakhu? ¹⁹ Kali khuli lukuutsa lutiititi muno, lwa muundu yavukula namiitsa mu mulimi kweekwe.Lwa meera nu kuva musaala, ma manyonyi ni kiitsa, nikuumbakha vitsuu vyaavo mu tsiisya tsyaakwo." ²⁰ Yeesu yarheeva khaandi, "Ni shiina shyaanyala khusaasanyinya khu nu vwaami Vwa Nyasaaye? ²¹ "Vuli khuli mameera ku mukhali yavukula natsukaanyinya mutsilita 40 tsyu vusii khutuukha lwa shinokho shyoosi shyaviimba. ²² Yeesu yasimukha na khalakanyira mu mataala nu mu michiitsi, niyeechitsaanga nali khu lucheendo lweelwe lu khutsya Yerhusalemi. ²³ Muundu wuundiyamurheeva, "Mwaami, ni isaavu indiititi yoonyene ya vaandu, valiitsa khuhoonyinywa?" Yeesu yamurheevulirha, ²⁴ "Mucheelitse khwiinjirha khuvirhila mu mulyaango munyeerere; shichira ni kiliikali vaandu vanyiikhi valiitsa khuchelitsa khwiinjira khuvirhilamu, navutswa shivalinyaala khwiinjira. ²⁵ Mweene insu aliitsa khusiinjira nukhwikala mulyaango ; lwa muliitsa khuva numusiinjire ilwaanyi nu mwiikulikhitsaanga khu mulyaango, nu muvoola, "Mwaami, khwiikulire mulyaango! Aliitsa khumurheevulira, Shinyala khumanya wa murhula taawe! ²⁶ Muliitsa khurhaanga khuvoola, "Khwalya nu khung'wa nayiwe,khaandi nu weechitsa mu mataala keerhu, ²⁷ Navutswa mweene insu aliitsa khuvoola, Shinyala khumanya wa murhuli taawe.Munye vaandu vooni voosi, rhuli haanu! ²⁸ Muliitsa khulirira havundu heene yaho, numuteteitsa miino, lwa muliitsa khuloola Abrhahamu ,Isaka na Yaakobo na vaporofeti voosi nivali mu vwaami vwa Nyasaaye; navutswa munye nu musyuvirhwe ilwaanyi. ²⁹ Vaandu valiitsa khwiitsa khurhula mu tsaimbeka tsii ivukwii na imatiori, ni ivaale ni isavaalu, ma vikhale khulya mu vucheeni vu liilya mu vwaami vwa Nyasaaye. ³⁰ Yavo vali vu khumalilikha lweeneyulu, valiitsa khuva vukhurhaanga , khaandi yavo vali imbeli lweene yulu, valiitsa khuva vukhumaliilikha. ³¹ Mumatukhu keene yako, Vafarisayo valala viitsa, nivavoolera Yeesu, "Wiilukhee khurhula haanu, utsii haawuundi, shichira Heroode akhaava khukwiirha." ³² Yeesu yavavoolera, "Simukhi mutsi muvoolere shivwee yeesho: "Loola,khungaanga matimoni khaandi mbonyinyaanga vaandu valwaala nuunundi khaandi mukaamba; na khulitukhu lyaa khavaka, ndamanya mbee nimali muhiinsi kwaanje. ³³ Khu lwayako khutukha ntsii khulucheendo lwaanje nuunundi na mukaamba khaandi ni liitukhu liloondakhu;shichira shyuvuli valahi muporofeti khwiirhilwa yihaale weene khurhula Yerhusalemi taawe. ³⁴ Yiiwe Yerhusalemi, yiiwe litaala likali lya ,Yerhusalemi! Wiirhaanga vaporofeti, uvarhasa na machina yavo vali varhumwa va Nyasaaye akhurhumilaanga! Hali khaanga ni njelitsaanga khuvunjelitsa halala vaandu voovo voosi khuli ingokho ivunjeelitsaanga viminyooli vyaayo mutsimbaha ya tsyayo; navutswa wayambakhana! ³⁵ Loolakhu! Liteemperi lyolyo lyalekwa lyeere. Khuvooleraanga ndi uliitsa khuvula khundoola matukhu kashiri khutuukha lwa uliitsa khuvoola, Nyasaaye akaasitse wooyo wiitsaanga khuvirhila mu liirha lyu Mwaami."