¹ Lwa vaandu vanyiikhi mu tsihelefu vali nivakani halala, muvunykhi khli ni varhaanga khusenakana veene khu veene,Yeesu yavoolera veechitswi veeve khurhaanga "Muvee vacheri khu mameera ka Vafarisayo, nakhwo khuvoola khwiikhola khola khwaavo khukhuva valuunji. ² Shivulakhuho shiindu shyoosi shakhunikwa shirivula khukhunulwa, khaandi shyoosi shyaviswa shiliitsa khumanyikhana havulavu. ³ Khu lwa yako, shiindu shyoosi shya mwavoolera mushisuundi, shiliitsa khuhuliirikhana mmbaasu nu kwaakhaanga.Shiindu shyoosi shya mwamoonya mu vwiivisu muunsu yikaalwe, shiliitsa khulaanjiritswa khurhulira mu viseekese vi tsiinsu. ⁴ Muvoolera munye valina vaanje, mukharhii vaandu virhaanga muviri , navutswa nivamali keene yako, shivali ni shiindu shiindi shyoosi shitaamaanu shyavanyala khukhola taawe. ⁵ Navutswa nda mumanyinya wa muha luyali:Muhee Nyasaaye luyali, shichira na mali khwiirha, ali nu vunyali vu khusyuuva mu shihaatisi. Muvooleraanga kirikali ndi naye wa muha luyali! ⁶ Mushili khumanya ndi manyonyi ki tsimili karhanu ka kulitswaangwa tsisenti tsiviri?Khali Nyasaaye, shyanyala khwiivirira linyonyi lilala khuko taawe, ⁷ Khali liiswi lyoosi lili khu mirhwi chyeenyu lyavaalitswa.Mukharhia mba , muli nu vukhuli vululu muno khuvirha tsimili tsinyiikhi. ⁸ Mu vooleraanga ndi muundu u voolaanga ha vulavu imbeli wa vaandu nu waanje, Mwaana wu Muundu aliitsa khukhoola malala meere khuye imbeli wi tsingerosi tsya Nyasaaye. ⁹ Navutswa muundu unyambakhanaanga imbeli wa vaandu, Mwaana wu Muundu aliitsa khu mwambakhana imbeli wi tsingerosi tsya Nyasaaye. ¹⁰ "Muundu unyeekaanga Mwaana wu Muundu, aliitsa khusaamiihwa; navutswa muundu unyeekaanga Rooho Mutakatifu, aliitsa khuvula khusaamiihwa. ¹¹ Lwa vamuleerha imbeli wa Masinakoki anoho khu vagavana anoho vaamiihi, muvule khuheenda mwooyo khuli lwa mwishiinga veene anoho shya muvoola; ¹² shichira Rooho Mutakatifu aliitsa khumweechitsa isaa yeene yeeyo, shya mwenyekhaanga muvoole." ¹³ Muundu mulala mushituma sha vaandu yavoolera Yeesu, "Mweechitsi, voolera amwaavo waanje angavulirekhu miandu chya taata weerhu yakhuleekheerha inse naye." ¹⁴ Yeesu yamuvoolera, "Mulina waanje nu wiina waamba vunyali vu khuva mukhalachi anoho khukavulira munye vaviri miandu?' ¹⁵ Nalwo yavavoolera,"Muheense vulahi; khaandi muve vacheeri, shichira vung'ang'a lukanu lwoosi, shichira vulamu vwa tooto vu muundu, shyuvuliho shichira vunyiikhi vwi miandu chyeechye taawe. ¹⁶ Yeesu yavavoolera lukanu yulu:"Litukhu liindi khwaaliho nu muundu muhiinda wali nu mulimi munuulu kwaminyaanga virhakwa vilahi. ¹⁷ Yaraanga khukanakana mweene, "Ni shiina shya nyala khukhoola lwaambula havuundu ha mbiikha vyukhulya vyancheesa. ¹⁸ Yavoola, "manyi vulahi shya nsiitsaanga khukhoola.Ndasaambula vyaachi vyaanje, khaandi nduumbakhe vikali.Namwo mwanganjira imu yaanje nende viindu vyoosi vya ndi navyo. ¹⁹ ma ndivoolere mweene, uli ni viindu vinyiikhi, vyunyala khurhumikhila khu mihika minyiikhi.Vulamu vulava vulahi; ndalya nukhuung'wa ni ndiikhonya." ²⁰ Navutswa Nyasaaye yamuvoolera,"Musiilo yiiwe, ukhutsa vutukhu vwa leero.Nu wiina uliitsa khunyola viindu vyoosi, vya wiviikhila mweene?" ²¹ Yeesu yamalikhitsa nu khuvoola, "Ni ndyo katsitsaanga khu kholekha khu muundu wiviikhilaanga mweene miandu, navutswa shyaali muhiinda imbeli wa Nyasaaye taawe?" ²² Nalwo lwa Yeesu yavoolera veechitswi veeve , muvoolera ndi mukhaheendikhu mwooyo mulimenya lyeenyu, khuloondekhana khu shyukhulya shya mulya anoho tsinguvu tsya mwiifwaala. ²³ Vulaamu vuli nu vukhoonyi muno khuvirha shyukhulya; khaandi mmbiri kuli nu vukhoonyi khuvirha tsinguvu. ²⁴ Henseli khu makhokho; shikaraakanga vukuutsa anoho khucheesa;kavula insu yu khuviikhamu viindu anoho vyaachi; nikhali, Nyasaaye akaliikhitsaanga vulahi.Mutuukhirha khunyoola muvunyiikhi khuvirha manyonyi! ²⁵ Nu wiina khu munye , wi liheenda mwooyo lyeelye linyala khumuloomba amenye nu khwitasa mihika? ²⁶ Khu niiva shyunyala khukhola ndyo khali hatiititi khuli shyeenesho taawe, shichira shiina muheendelaanga viindu viindi mwooyo? ²⁷ Looli khuli mawua kumbulimo ( khuli Linalikhokho) kameelaanga: shikahiinsilaanga, anoho khwiifwaala tsinguvu taawe.Navutswa muvooleraanga ndi khali Mwaami Solomonini ni miandu chyeechye chyoosi, shiyalikhu ni tsinguvu tsiindahi muno khuli lilala khu mawua ki vimuli yaka taawe. ²⁸ Munye vaandu vamuli ni lisuuvira litiititi! Navutswa niiva Nyasaaye afwaalaanga vunyasi vuli haanu mushikurhi lweene yulu khaandi mukaamba vusyuuvwa mumuliro, shaliitsa khumufwaala khuvirhana muno. ²⁹ Muvule khukanakaniilakhu mu myooyo khuloondekhana khu shiindu shyamulya anoho shyamung'wa, anoho khuheenda mwooyo khuloondekhana khu keene yako. ³⁰ Vaandu vi tsimbya tsyoosi mu shivala shinu vaheenderaanga viindu vyeene yevo mwooyo khu lwa matukhu koosi.Navutswa Taata weenyu wamanya ndi mweenyaanga viindu vyeene yevo. ³¹ Niikhali muheendere mwooyo vwaami vweevwe, khu amuhee viindu vyeene yevo vyoosi. ³² "Munye vamuli khuli shyayo shitiititi shya makoondi, muvule khurhia, shichira Taata weenyu ayaansitswaangwa khumuha vwaami. ³³ Mukulitse viindu vya muli navyo vyoosi muhe vaandu vataakha tsisenti tsyeene yeetso Mwiinyoolere veene visiko vi tsisenti,vinyala khuvula khurhaandulwaa, khaandi mwivikhiire liviikhiro linyala khuvula khuhwa mwikulu, wa mwiivi akhanyala khutukhaho, khaandi wa tsinguyi tsikhanyala khuvula khwoononyinya. ³⁴ Mwooyo kweenyu kuvetsaanga inyiinga yoosi hi miandu chyeenyu chili. ³⁵ Muve vaandu virheechekha khukhoola shya shiindu shyoosi, nu mwiifwaala liikhoola mihiinsi ni tsitaaha tsyeenyu nitsyakhaanga, ³⁶ Khuli varhumikhi valiindaanga murhuchi waavo khukalukhu khurhula mushiseerero shyukhuhirana. khu vamwikulile mulyaango vwaangu , lwa yiitsa khwikulikhitsa khu mulyaango. ³⁷ Vali ni ikhaavi varhumikhi yavo vu murhuchi waavo anyoola ni vali imoni ndaavu, khaandi ni virheechekha lwava na kalukhaanga!Muvoolera kilikali ndi, aliitsa khurhulitsa likoti lyeelye nukhuvavoolera viikhale haasi, nu khuvaaha shyukhulya. ³⁸ Niiva aliitsa khukalukha hakarhi mu vutukhu,anoho mu isaa tisa mu vutukhu, khaandi avanyoore ni vashiheensaanga, varhumikhi veene yavo vali ni ikhaavi. ³⁹ Navutswa keenyekha mumaanyee ndi, niiva mweene insu, aliitsa khuva na maanyi isaa yu mwiivi yiitsaanga, shiyakhalekhi insu yeeye yiinjililwe taawe. ⁴⁰ Munye khaandi mwirheechekhe; shichira Mwaana Wu Muunndu aliitsa khwiitsa isaa ya muvula khumaanya yiitsaanga. ⁴¹ Petero yarheeva "Mwaami lukanu yulu luli khu khutse voonyene anoho khali khu vaandu voosi?" ⁴² Mwaami Yeesu yamurhevulira,"Nu wiina uli murhumikhi musuuvilwa khandi ulii nu vusitsa? Nu murhumikhi wu murhuchi weewe aha vunyali vu khusijirira vaandu vi insu yeeye, khaandi ahe varhumikhi vaandi shyukhulya shyaavo khu isaa yenyeekhaanga. ⁴³ Ali ni ikhaavi murhumikhi woyo, wu murhuchi weewe alikalukha nu khumunyoola nakhoolaanga ndyo. ⁴⁴ Muvoolera kakirikali, ndi murhuchi mweene wooyo aliitsa khumuha vunyali vu khusiinjirira miandu chyeechye chyoosi. ⁴⁵ Navutswa niiva murhumikhi mweene wooyo aliitsa khwivoolera,"Murhuchi waanje ucheereve khukalukha, ma arhaanje khurhumula varhumikhi vasatsa na varhumikhi vakhali khaandi akorheele muliilya nu khutaanda, ⁴⁶ Khu murhuchi wu murhumikhi mweene wooyo aliitsa khukalukha khu litukhu lyu murhumikhi akhamanyi ni isaa yakhamanya.Murhuchi mweene wooyo aliitsa khumurheemanyinya muvitonye ma amukhoole khusaanga halala na vaandu vavula vusuuvilwa mu vutiinyu vwaavo ⁴⁷ Murhumikhi waamanya ku murhuchi weewe yeenyaanga akhoole, navutswa yaambakhanaanga khukhoola, aliitsa khuhuulwaa vivoko viluulu muno. ⁴⁸ Navutswa murhumikhi wakhamanya ku murhuchi weewe yeeyaanga. niikhali akhoolaanga shiindu shinyala khuloomba asalilitswe, shyaliitsa khu shyutwa vivoko vinyiikhi taawe.Vinyiikhi vyeenyeekha khurhula khu muundu waheerwa mu vunyiikhi, vinyiikhi khuvirha shicheero vyeenyekha khurhula khu muundu wa heerwa mu vunyiikhi khuvirha shycheero. ⁴⁹ Ndaamala khwitsa khu haambitsa muliro khulirova,maku khuli ndikoombaanga kuve nu kwaakha khale! ⁵⁰ Ndii ni lipatiswa lyaambirhilaamu;khaandi nyakhanaanga mu mwooyo kwaanje,lwa shiri khurhweekhitsa keene yako! ⁵¹ Mukanakanaanga ndiitsa khuleerha mireembe mu shivala? Aawa, shichiri ni mireembe taawe, navutswa ni lyaavukhana; ⁵² khurhaanjira nuunundi vuli insu ya vaandu varhaanu, iliitsa khwaavukhanamu, vavaka khu vaviri khaandi vaviri khu vavaka. ⁵³ Vataata valiitsa khwaavukhana na vaana vaavo; khaandi vaana vi shikhaana na vamwaavo vaavo, vakuukhu vishiyaayi na va nakukhuulu vi shikhaana, na nakhuvitsala alaavukhana na nyiina muyayi ." ⁵⁴ Yeesu yavoolera vaandu vali mu shituma:Inyiinga ya mulolaanga maleesi ni kavuukha imatioli, haweene yaho mu mamuvoola, imbula yiitsaanga na ni ndyo kaveetsaanga. ⁵⁵ Na lwamulolaanga vushyindu nuvuhuutsa khurhuula isavaalu, muvoolaanga, khutsiitsa khuva nu muleenjeero, na kama kikholeekha ndyo. ⁵⁶ Munye viikhoolakhonyinyi vu khuloreekha valuunji, munyalitsa khu heensa khulirova nu khumaleesi mwikulu nu khuvoola khuli shivala shitsitsaanga khuva.Shichira shiina mukorhwaa khwiivaala shya matukhu kanu kavoolaanga? ⁵⁷ Shichira shiina mwambakhanaanga khwikhalachira veene khukhoola likhoola lyu vuluunji? ⁵⁸ Lweene lwa muveetsaanga kkhunjira nu mutsiku woowo muhiiranaanga khumuyaalitsi,cheelitsi khuli munyala khuhulikhitsaana naye veene khu veene mushiri khunjira nashiri khukhuhira khumukhalachi, na mukhalachi akhuaane khumusikali ukhuvooha mucheera. ⁵⁹ Muvoolera ndi muliitsa khuvula khulakhulwa khurhula mushivoho numushiri khurhuunga tsisenti tsyoosi tsi yipoonti yu uvasiirhwe."