¹ Litukhu liindi, Yeesu yali na saalaanga havluveka lulala.Lwayali namali khusaala,mulala khuveechitswi veeve yamuvoolera, "Mwaami ukhweechitse khusaala, khuli Yohaana Mupatisi yeechitsa veechitswi veeve." ² Yeesu yavavoolera ,"Lwa muva nu musaala khusaala musaale, "Taata , liirha lyoolyo litsoominywe.Vwaami vwoovwo vwiitse. ³ Vuli litukhu ukhuhee vyukhulya vyeerhu vya khase. ⁴ Ukhusaamiihe vwooni vweerhu, khuli khutse khusaamiihaanga yavo vakhukoseraanga Ukhakhuhira mu machelitso mba." ⁵ Khulwa yako Yeesu yavavoolera, "Nu wiina khu munye aliva nu muliina, ma atsi khuye hakarhi mu vutukhu, navoola, "Mulina waanje,khonyaakhu mikati chivaka; ⁶ shichira mulina waanje khurhula mulucheendo utukhi ha waanje, na yiinse mbulakhu shyukhulya shyoosi shyanyala khumutekhera." ⁷ Na ye ali muunsu amurheevulire,"Ndiikale khale mulyaango.Lekha khusumbula;vaana vaanje vaakoni niinse mu shitali.Shinyala khuvuukha mushitali yumu khuhe mikati. ⁸ Muvooleraanga ndi, khali niiva waambakhaane khuvuukha mushitali mwaali, amuhe mukati,shichira nu mulina weewe, navutswa shichira liitsiitsachirira lyu khwiikulikhitsa nu khusaayasaaya, alavuukha nu khumuha shiindu shyoosi shya adakhaanga. ⁹ "Khaandi muvooleraanga ndi, musaale, na mulaheerwa; mwikuliikhitse, na munye muliikulilwa mulyaango. ¹⁰ Shichira muundu woosi usaalaanga, aheelwaangwa, khaandi muundu wukhavaanga , anyoolaanga; khaandi muundu wikulihitsaanga , yikulilwaangwa. ¹¹ Ni taata shiina mumunye , wa mwaana weewe na musava vushuma, amuheetsa lichina? vukhala vu khumuha isutsi amuhe insukha? ¹² anoho alamusava liivuyu, naye amuhe likhala { ing'e}? ¹³ Niiva munye vamuli vataamaanu mwaamanya khuha vaana veenyu vihaanwa vilahi, ni vyaanga mu vunyiikhi vya Taata weenyu uli mwikulu, aliitsa khuhaana Rooho Mutakatifu khu vaandu vamusaalaanga!" ¹⁴ Yeesu yakhuunga litimoni lyaali nilyambakhana khulomoloma (itiimbiti) .Lwa litimoni lyarhula mu muundu mweene woyo, yaarhaanga khulomoloma, ma shituma sha vaandu ni varhikala ni liicheenya. ¹⁵ Navutswa vaandu valala khuvo vavoola, "Ah, ni Beletsabuli, mukhoongo wa matimoni , naye umuheensaanga tsingulu tsyu khukhuunga matimoni." ¹⁶ Vaandu valala khuvo vachelitsa khureeka Yeesu,niveenya avahee shilorekhitso khurhula mwikulu. ¹⁷ Navutswa Yeesu yamanya tsinganakani tsyaavo na vavoolera,"Vwaami vwoosi vwavukhane shyuvunyala khusiinjira,khaand insu isolanaanga ikwiitsaanga. ¹⁸ Niiva Shetaani alakavukhanamu mweene, vwaami vweevwe vwakhasinjire ndina?Shichira muvoolanga yinse khunga matimoni khuvirhila mu Beletsabuli. ¹⁹ Niiva Beletsabuli akhuunga matimoni, Vimilili veenyu navo vakhuunga matimoni khuvirhila mu wiina? Khu lwa yako navo valiitsa khuva vakhaalachi veenyu. ²⁰ Navutswa niiva khuunga matimoni khuvirhila khu shitere shya Nyasaaye, vuchira liheenda mwooyo vwaamihi vwa Nyasaaye vumali khwiitsa khu munye. ²¹ Muundu wi tsingulu lwa aveetsa yiyavaale vyuuchi vyeevye vyu vulwaani nu khuliinda imbiinga yeeye, miandu chyeechye chivetsaanga mu mireembe, ²² Navutswa lwa Muundu wi tsingulu humani arhuliraangayo nu khumukuurha, amunuulaanga vyuuchi vyeevye vya yasuuviramu, ma yikavulirha miandu chyali chyu muundu wi tsingulu ²³ Muundu waambakhanaanga khu khoonya yinse,, kilikali naye mutsiku, na muundu waambakhanaanga khu vuunjeeritsa na yiinse, kilikali nu musalaanyinyi. ²⁴ Lwa litimoni lirhulaanga mu muundu, licheenda cheendaanga mu shangalaangwe, nilikhaava havundu hu khuhulukhira.Navutswa lwa livula khunyoola havundu heene yaho, livoolaanga, "Ndakalukha muunsu yaanje mwa ndarhulaamu. ²⁵ Lwa litimoni likalukhaanga muunsu mweene yomo, linyolaanga insu yeeneyo niili inihu khaandi niili mu mireembe. ²⁶ Khu lwa yako , limanya likalukhayo khutsia khulaanga matimoni kaandi saba kali ni tsingulu khulivirha khwitsa khumenyamu. Khu liiva lyu muundu mweene woyo liveetsaanga litaamaanu khuvirha lyukhurhaanga." ²⁷ Lwa Yeesu yamala khuvoola makhuuva yaka, muundu mukhali wali nali mushituma shya vaandu, yalaanjilira,"Ali nu vukaasu mukhali wa khwivula ni tsimbeere tsya khununyinya! ²⁸ Navutswa Yeesu yavoola,"Niikhali vali nuvukaasu yavo vahuliraanga likhuuva lya Nyasaaye, khaandi nu khutsiiririra khuliloonda." ²⁹ Lwa vituma vya vaandu vyali ni vimetekhaanga, Yeesu yavoola,"Vaandu va matukhu kanu khu ni vataamaanu! Vaandeevaanga vakhoolere shilorekhitso, navutswa valiheelwakhu shilorekhitso shyoosi mba, niikhali shilorekhitso shya Yoona! ³⁰ Khuli Muporofeti Yoona yali shilorekhitso khu vaandu vi litaala lya Nineve, khaandi ni ndyo Mwaana wu Muundu aliitsa khuva shilorekhitso khu vaandu va matukhu kanu. ³¹ Murhuchi wi shikhali wi Isavaalu ( Sheeba), aliitsa khusiinjira ayaale vaandu va matukhu kanu khu liitukhu lyu khukhalachilwa shichira yacheenda khurhula mu shivala shyeeshye niyiitsa khuhulira meechitso ku vusitsa ku mwaami Solomoni; Heensi! Muundu mukali wi tsingulu khuvirha Solomoni ali hanu. ³² Vaandu vi litaala lya Nineve valiitsa khusiinjira vamuyaale munye khu litukhu lyu khukhalajilwa, shichira vikanira lwa vahulira Yoona niyirwaatsaanga, khaandi Heensi! Muundu ali hanu wi tsingulu tsinyiikhi khuvirha Yoona! ³³ Avulakhuho muundu uhaambitsa itaaha ma achivikha hivisu anoho muhiinda, navutswa avikhaanga ikulu khu shikurhu shi itaaha, khu muundu woosiyinjiramu alore vulavu vweene yovo. ³⁴ Imoni yooyo ili khuli itaaha yu mmbiri kwookwo.Niiva tsimoni tsyeenyu ni tsinamu, mmbiri kweenyu kwoosi kuli nu vulavu vunyiikhi.Navutswa ni tsivula vulamu, mmbiri kweenyu kuli mu shisuundi shinyiikhi muno. ³⁵ Khu lwa yako, muheense muloore ndi vulavu vuli mu munye, vukhava shisuundi mba. ³⁶ Niiva mmbiri kweenyu kwoosi kuli nu vulavu vunyiikhi, khaandi havundu halala khukwo havula shisuundi, kuliitsa khuva nu vulavu vunyiikhi muno, khuli vulavu vwi itaaha vumwakhiraanga." ³⁷ Lwa Yeesu yali na mali khulomoloma,Mufarisayo yamwiinjilitsa khulya naye.Yiinjilamu niyikhala naalya. ³⁸ Mufarisayo mweene wooyo yali ni licheenya, lwa yaloola Yeesu aliitsaanga shyukhulya vuchira khusaava mikhono. ³⁹ Navutswa Mwaami yamuvoolera, "Munyee vafarisayo mwochitsaanga ilwaanyi wi shikoombe shyeenyukhaandi wi ibakuli yeenyu, navutswa mukarhi mweenyu mwayitsula likhoyi, vunuuli nu vutaamaanu. ⁴⁰ Muli vaandu vasirho! Musuuviraanga Nyasaaye waloomba ilwaanyi, shali khaandi waloomba mukarhi taawe? ⁴¹ Haani viindu vili mu vikoombe vyeenyu nu mu tsibakuli tsyeenyu khu vamanani, na viindu vyoosi khu munye vive viniihu. ⁴² "Navutswa munye vafarisayo, muli khuvutiinyu muno! shichira muhanaanga khu Nyasaaye shitierhi shyi likhomi khu vya mucheesaanga vi viluungu, khuli itania, vituungu, liivokoyi ni tsingutsa tsiindi tsihuunya mwayu mulahi, navutswa mwaachaaya khukhoola vwakilikali nu khuyaansitsa Nyasaaye.Muve nu mukhoolaanga ndyo , vuchira khuchaaya kaandi. ⁴³ Munye vafarisayo muli khu vutiinyu muno, shichira mwayaansa khwikhala khu visako vilahi muno imbeli mu lisinakoki, nu muheerwa mireembe chyu luyali na vaandu mushyiirhu. ⁴⁴ Munye muli khu vutiinyu muno,! Shichira muli khuli viliindwa vikhalorekhaanga, vya vaandu vaseenakhu vuchira khuvimanya." ⁴⁵ Muundu mulala khu veechitsi va malako yamuvoolera,"mweechitsi ukhunyekaanga lwa uvoola ndyo." ⁴⁶ Yeesu yavoola,"Munye veechitsi va malako, muli khu vutiinyu muno! Shichira mutyuukha vaandu misiko militoho chya vakhanyala khuchiinga, navutswa munye veene murhaamwa khuvakhoonya khuchichiinga. ⁴⁷ Munye muli khuvutiinyu muno! Shichira muloombanga viliindwa vilahi vya vaporofeti,va vakuuka veenyu viirha. ⁴⁸ Munye veene mwiyamaanga ndi mwalora ka vakuuka veenyu vakhola; viirha vaporofeti, nu muloomba viliindwa vyaavo. ⁴⁹ Khuloondekhana khu shivune shyeeneshyo, vusitsa vurhulaanga khu Nyasaaye vwavoola,"ndiitsa khuvarhumira vaporofeti na varhumwa.Valiitsa khwiirha valala khuvo, nu khunyaakhitsa vaandi. ⁵⁰ Vaandu va matukhu kaleero valiitsa khusaalilitswa, shichira viirha vaporofeti voosi khurhula shivala ni shiloongwa, ⁵¹ khuraanjilra khu Abili yiirhwa khutuukha khu Zakarhia wiirhwa; yiirhilwa hakarhi hu vwaali na havuundu Hatakatifu.Ni khali, muvooleraanga ndi vaandu va matukhu kaleero, valiitsa khusaalilitswa shichira vo voosi. ⁵² "Munye veechitsi va malako, muli khu vutiinyu muno!Shichira mwaaviikha lufungu lwikulaanga mulyaango kwi insu yu vucheri; navutswa munye veene mwarhamilwa khwiinjiramu; khaandi mwikaliraanga vaandu vacheelitsaanga khwiinjiramu." ⁵³ Lwa Yeesu yali namali khulomoloma, veechitsi va malako na Vafarisayo, varhaanga khumurheeva marheeva matiinyu; khaandi ni vamuvoorela alomolome makhuuva khulondekhana khu viindu vinyiikhi, ⁵⁴ nivaliindiliraanga khumukumira, niiva anyala khulomoloma shiindu shitaamaanu shyoosi.