¹ Yeesu yavavoolera veechitswi veeve lukanu yuulu, khu veechitsa ndi shya khasee khoosi khutuukha vasaale vuchira khukhutsa mwooyo, ² Yavoola, Muli taala liindi, khwalimu nu mukhalachi wali niyambakhana khurhia Nyasaaye anoho khuha vaandu luyali. ³ khaandi khwaliho nu mukhutsakhali mulitaala lyeene yero, wali ni yamenya natsitsaanga khuye khumurheeva na yaansa amukhonye "Kholeera vwatooto khu vatsiku vaanje." ⁴ Mukhalachi mweene wooyo yambakhana khumukhonya khu matuukhu manyiikhi; navutswa lukhumalilikha yirheeva mweene, "Khali niiva shindarhia Nyasaaye anoho shimbeetsaanga vaandu luyali taawe, ⁵ nikhali, shichira mukhutsakhali wuuyu, unyakhitsaanga, ntsitsaanga khumukholera vwatooto khu vatsiku veeve.Niiva shinyala khumukholera ndyo taawe, alasinya shichira khutsitsachiirira khwiitsa khweekhwe!" ⁶ Nalwo lu Mwaami yavoola, "Hulikhitsi khuli mukhalachi mutaamaanu mweene wooyo yavoola." ⁷ Nyasaaye sha liitsa khukholera vaandu veeve vayarhoovola vwatooto niivali yavo vamuliliraanga mmbasu nu vutukhu? Shalavukula luhoono khuvakhonya! ⁸ Muvooleraanga, aliitsa khuvakholera katooto khaandi alakhola vwaangu.Navutswa lu Mwaana wu Muundu aliitsa khwiitsa,kanyala khuva ni kilikali aliitsa khunyoola vaandu khu lirova nivali ni lisuuvira? ⁹ Yeesu yavoola lukanu yulu khaandi khu vaandu valala, vikhola kholitsaanga khuva valuunji nu khuchaya vaandi. ¹⁰ Litukhu lilala vaandu vaviri vasimukha ni vatsya mu Liteembeeri khusaala: mulala khuvo yali Mufarisayo, na wuundi musololi wu vushuru. ¹¹ "Mufarisayo yasinjila haluveka na saala, "Nyasaaye khu saandinsaanga shichira shindi kuhli vaaandu ----vuvung'aang'a , vambakhanaanga khukhoola katooto, vaveehi, anoho khuli musoleri wu vushuru wuuyu taawe. ¹² Mboonga vuchira khulya shyukhulya hali khaviri khulisiitsa;khaandi khuheetsaanga shitieri shi likhomi khurhula khu viindu vyoosi vyanyoolaanga khu mirhuungo chyaanje." ¹³ "Navutswa musolori wu vushuru yasiinjira ihale, niyambakhana khuheensa mwikulu, navutswa yatuuya, khu shiliirhu shyeeshye nu khuvoola, "Nyasaaye umbeere tsimbavasi shichira ndi muundu mwooni ¹⁴ Muvoolera ndi musololi wu vushuru yakalukha ingo weewe, nakhoolerwe khuva wi likhoola lyu vuluunji khuvirha Mufarisayo wooyo; shichira muundu wikalihitsaanga mweene khuvirha vaandi, aliitsa khucheehitswa, navutswa muundu wicheehitsaanga mweene, aliitsa khukalihitswa." ¹⁵ Vaandu valala valeerha vaana vatiititi vavo khu Yeesu avavikhilekhu makhono keeke.Veechitswi veeve vavavoolera nu khuvakoondekhera khu khoola ndyo. ¹⁶ navutswa Yeesu yalaanga vaana veene vyavo khwiitsa khuye, naavoola ,"Leekhi vaana vatiititi viitse kwiinse, khaandi muvule khuvakaya, shichira vwaami vwa Nyasaaye ni vwa vaandu khuli yava. ¹⁷ Muvooleraanga kilikali ndi muundu wiitsa khuvula khunyoola vwaami vwa Nyasaaye khuli mwaana mutiititi, aliitsa khuvula khwiinjilamu! ¹⁸ Mwimilili mulala muyahuti yarheeva Yeesu,"Mweechitsi mulahi, ni shiina shyanyala khukhoola, khu nduukhe khunyoola vulamu vwu mihika ni mihika?" ¹⁹ Khu lwayako Yeesu yamurheevulira,"Shichira shiina unangaanga mulahi?Muundu avulakhuho mulahi nakhali ni Nyasaaye woonyene. ²⁰ Waamanya malako yaka, "Ukhiirha mba, ukhiiva mba, ukhachikhirha vaandi ta, khaandi uhee taata woowo na mmama woowo luyali." ²¹ Muundu mweene wooyo yamurheevulira, "Ndaloonda malako yaka koosi khurhula ni ndi muvukha." ²² Lwa Yeesu yahulira yako, yamuvoolera, "Ushili ni shiindu shilara sha wenyekhaanga ukhole.Ukulitse viindu vyuli navyo vyoosi, ukavile vamanani tsiseenti tsyeenetso; na ulava ni livikhiro mwikulu; ma wiitse unoonde." ²³ Navutswa lwa muundu mweene wooyo yahulira ndyo, yaveerera muno, shichira yali nu vuhiinda vunyiikhi. ²⁴ Lwa Yeesu yamuloora na veerere, yavoola, "Nu vutiinyu muno vaandu vahiinda kwiinjira mu vwaami vwa Nyasaaye! ²⁵ Nu vutoorho muno khu ingamia khwiinjira mu induhu yiisindani, khuvirha muundu muhiinda khwiinjra mu Vwaami Vwa Nyasaaye." ²⁶ Yaavo vamuhulira navoola ndyo varheeva, "Khu nu wiina unyala khuhonyinywa?" ²⁷ Yeesu yavarheevulirha, " Ka muundu akhanyalitsa khukhola, koosi kanyalikha khu Nyasaaye." ²⁸ Navutswa Petero yavoola, "Loola, khwamala khuleekha tsiinsu tsyeerhu na vyoosi , nu khukhuloonda." ²⁹ Yeesu yamuvoolera ,"Muvooleraanga katooto ndi woosi walekha insu yeeye anoho mukhali weewe anoho vamwaavo veeve anoho taata weewe anoho mmama weewe, anoho vaana veeve, shichira vwaami vwa Nyasaaye, ³⁰ aliitsa khunyoola viindu vinyiikhi muno mu matukhu kanu,khaandi mu matukhu kaliitsa khuvaaho vulamu vwi mihika ni mihika." ³¹ Yeesu yavalerha halala veechitswi veeve likhomi na vaviri, navahira haluveka, nu khuvavoolera , "Heensi, khutikuulukhaanga khutsya Yerhusalemi, khaandi vuli shiindu shyoosi shahaandiikwa na vaporofeti khuloondekhana khu Mwaana wu Muundu, shiliitsa khurhwekhitswa. ³² Na haanwe khu vaandu vi tsyimbya tsiindi. Valiitsa khumukhoolera shiheenyeheenye, nivamunyeeke nu khumusutsirha maree. ³³ Viitsa vamushute ni shivoko nu khumwiirha, navutswa matukhu kavaka nikakhavirha, yiitsa yisimukukhitswe khurhula mu likhutsa." ³⁴ Navutswa veechitswi veeve, shivalihu nilimanyikhitsa shiindu shyoosi khuloondekhana khuviindu vyeene yevo taawe.Vaviswa shivune shya makhuuva keene yako; khaandi vakorhwa khumanya ka Yeesu yali na lomolomaanga khu loondekhanakhu. ³⁵ Lwa Yeesu yali nali hiimbi khutuukha mu litaala lya Yerhicho, muundu muvekhu yali niyikhaale khundulu khu muhaanda sava savaanga. ³⁶ Lwa muundu mweene wooyo yahulira shituma shya vaandu ni vavirhaanga, yarheeva shyali ni shikholekhaanga. ³⁷ Na yavoolerwa, "Yeesu wa Natsareti avirhaanga haanu." ³⁸ Khulwayako muundu muvekhu wooyo yarhaanga khulanjilira, "Yeesu! Mwaana wa Dauti! Mbela tsimbavasi!" ³⁹ Navutswa vaandu voosi, vali imbeli vamukondekhera, nivamuvoolera ashiring'ane; navutswa yatsilirhira khulanjilirha ikulu muno, nu khuvoola, "Mwaana wa Dauti! Mbela tsimbavasi!" ⁴⁰ Yeesu yasiinjira nu khuvoola, vamulerere muundu mweene wooyo; navutswa lwa yisuunda hiimbi, Yeesu yamurheeva, ⁴¹ "Ni shiina shya weenya khukholere?'Naye yamurhevulira, "Mwaami, ndeenya tsimoni tsyaanje tsiloore khaandi." ⁴² Yeesu yamuvoolera, "Loola! Lisuuvira lyolyo limali khukhuhonyinya." ⁴³ Muundu mweene wooyo yaloola vwaangu;naloonda Yeesu, nukhusaanditsa Nyasaaye.Lwa shituma shya vaandu valoola ndyo, voosi vitsoominya Nyasaaye.