¹ Khali ndyo Lilakano lyu khurhaanga lyaali na malako khulondekhana khuli lisaala likholwaangwa khu lirova khunu, khaandi Havundu Hatakatiifu ha vasaalilaanga. ² Liheema litakatiifu lyumbakhwa.Mushiko shyu khurhaanga,khwalimu ni shikurhu shyu khuviikhakhu itaaha, ni shiivwa khwavavikhakhu mukati mutakatiifu; ha vuundu heene yaho halaangangwa Havundu Hatakatiifu. ³ Inyuma wu luvaala lwa khaviri khwaliho ni liheema Litakatiifu lyalangwangwa Havuundu Hatakatiifu Heene, ⁴ hali nu vwali vwaloombwa khu itsahapu, vwaali vu khusambirakhu vupani ni lisaanduku lyi lilakano lyali nilyavekhwa lyoosi ni itsahaapu.Lisaanduku lyi lilakano lyeene yero , lyalimu ni ichupa yaloombwa khu itsahaapu, na yalimu na maana, nu lusaala lwali lwa Haruni lwali nu lwamera masaambu na machina kaviri kakhoongwa ka malako kahaandiikwa khu. ⁵ Hiikulu hi lisaanduku lyeene yero, khwaliho ni viloombe vyi tsimbaha vimanyinyaanga vukhumi vwa Nyasaaye, khaandi tsimbaha tsyaavyo, ni tsivaambukhi havuundu hu vwooni vwasamiikhwa.Navutswa khuvulakhu vwiyaangu vu khwivaala vuli shiinudu shyoosi mu vuvaambukhu khu lwa nuunundi. ⁶ Lwa viindu vyeene yevo vyali nivyamala khurechekhwa, Vasaaliisi vinjiraanga mu shiko shyiri ilwaanyi wi Liheema Litakatiifu vuli litukhu , khukhola mihiinsi chyaavo; ⁷ navutswa Mukali wa vasaaliisi voosi, naye winjiraanga wonyene mukarhi mwi liheema, khaandi yakholaanga ndyo lulala lwonyene vutswa khu muhika.Yatsitsayo na masahi kahanaangwa khu Nyasaaye , shichira vwooni vweevwe mweene, khaandi shichira vwooni vwa vaandu vaandi vakhola, vuchira khumanya vakholaanga vwooni. ⁸ Rooho Mutakatiifu yamanyinya vulahi ndi khuvirhila mu keene yako ndi injira yu khwiinjira Havuundu Hatakatiifu Heene, yali nishiri khwiikulwa havulavu, lwi shiko shili ilwaanyi wi Liheema Litakatiifu shyali ni shishiri ho. ⁹ Yishi ni shilolelo shya matukhu kanu, shimanyinyaanga ndi vihaanwa ni milukha chya vakholelaanga Nyasaaye, shyivinyala khuloomba mwooyo kwu muundu usaala khu Nyasaaye khuva museretse taawe; ¹⁰ shichira viri khulondekhana khu shyukhulya, shyu khung'wa, ni milukha chyiindi lukanu chyu khwilavitsa khuva vanihu.Viindu vyeene yevo vyoosi ni malako kali ilwaanyi vutswa, karhumikhaaanga khutuukha lwa Nyasaaye, aliitsa khurhaanjitsa viindu vyoosi vuhya. ¹¹ Kristo yiitsa khuli Mukali wa vasaaliisi voosi wi viindu vilahi vitsaanga.Liheema Litakatiifu lya a rhumikhamu, ni lyi tsingulu khaandi ni lyiri liseretse muno; shyi liri khuli liheema lya loombwa na vaandu, nakhwo khu voola ,shyi liri liheema lyu mu shivala shya loongwa shinu taawe.Kristo yiitsa khuli Musaaliisi Mukali wi viindu vilahi vitsaanga. ¹² Lwa Kristo yavirhila mu liheema, ni yiinjira lulala lwoonyene vutswa Havuundu Hatakatiifu Heene, shyi yavukulakhu masahi kyi tsimbuli na kyi vihuunwa khukholera milukha taawe.Navutswa yavukula masahi keeke mweene, khaandi na khunyoolera vuhonyinyi vwi mihika ni mihika. ¹³ Niiva masahi kyi tsimbuli ni vihuunwa ni likooshe lyarhulaanga khu shimooli shiloori shyi ing'oombe imuchi yasaambwa khumiitswa khu vaandu vavula vunihu, lwa karhulitsaho viindu vitaamaanu khuvalavitsa khu londekhana khu mulukha mu muviri. ¹⁴ Lwa yaka kali ka tooto; ni hali khaanga ha masahi ka Kristo wihaana khu Rooho wi mihika ni mihika nali shihaanwa shyiseretse , kanyala khurhweekhitsa khwoochitsa mu vunyiikhi myooyo chyeenyu khurhula mu mihiinsi mikhutsu khu khunyole khurhumikhira Nyasaaye Uli Mwooyo? ¹⁵ Shichira yaka, ye nu muhambanyinyi wi lilako lyihya.Yaka kali ndyo shichira likhutsa ,limali khuvaho khurhunjira mahyoolo kali kyi lilako lyu khurhaanga, khu yavo valaangwa vanyoole lisuuviritswa lyi myaandu chyi mihika ni mihika. ¹⁶ Shichira ha khuli ni lilaka lyi likavulwa lyi myaandu chyalekhwa, katuukhana khuve nu khwavaho likhutsa lya woyo walihaandiika. ¹⁷ Shichira lilakana lyi myaandu livetsa ni tsingulu vutswa lwa mweene walihaandika ni yamali khukhutsa , niikhali livulakhu tsingulu tsyoosi inyiinga mweene lilakana tsaana avetsa na shiri mwooyo. ¹⁸ Nashyo shivunen sha chira lilakano lyu khurhaanga, niiliva nu vukhonyi muno khuvirhira mu masahi konyene vutswa. ¹⁹ Lwa Muusa yali ni yakhavoolera vaandu voosi vuli lilako mu Malako koosi, yavukula masahi ki vimooli ni tsimbuli na maatsi, luvusi lumuuchi, ni tsisya tsyu musaala kwa hisopu, a namitsa khu shitabu shya Malako khaandi khu vaandu voosi. ²⁰ Muusa yavoola, "Yaka nako masahi kukhuhambanyinya lilakano lya Nyasaaye yamu voolera murhweekhitse." ²¹ Munjira indala ntsere, Muusa yamitsa khaandi masahi keene yako khu Liheema Litakatiifu,khaandi khu viindu vyoosi vyarhumikhaanga khu khola milukha mulyo. ²² Ni kyirikali khu londekhana khu Malako , hiimbi viindu vyoosi vikholwaangwa khuva vinihu khuvirhira mu masahi; khaandi vwooni shyuvunyala khusamiihwa, masahi ni kashiri khusuundulwa taawe. ²³ Viindu vyeene yevo, vili khuli shyilolero shyi viindu vyatooto viri mwikulu, vyaanihitswa khuvirhira munjira khuli yeene yeyo. Navutswa viindu vili mwikulu vyeene, khutuukha vikholerwe milukha milahi chyeene. ²⁴ Kristo shyiyinjira Havuundu Hatakatiifu Heene hali ni haloombwa na vaandu, halolekhaanga khuli shyilolero shya havuundu ha tooto taawe.Kristo yinjira mwikulu mweene vutswa, walolekhaanga nuunundi mweene havukono heerhu imberi wa Nyasaaye. ²⁵ Mukali wa vasaliisi voosi wa va vayahuuti yinjiraanga Havuundu Hatakatiifu Heene vuli khu muhika na mashi kwu murhuku. Navutswa Kristo shyiyinjiramu mweene khwiihaana hali khanyiishi khuli mulukha taawe; ²⁶ Shichira kakhaveere ndyo, yakhanyakhaane hali khanyiikhi khurhula shivala ni shyi loongerwa musiinji. Navutswa yalolekha ho lulala lwoonyene vutswa, khuli kali lwa matukhu kukhumalilikha kali ni kali hiimbi khuhwa, khurhulitsaho vwooni khuvirhila mu shihaanwa shyi likhutsa lyeelye mweene. ²⁷ Khuli kavirhitswa khutuukha vaandu vave ni vakhutsaanga lulala lwoonyene vutswa, nu khu siinjira imberi wa Nyasaaye khukhalachirwa, ²⁸ nindyo khaandi khuli Kristo yihaana mweene khukholerwa shihaanwa lulala lwoonyene vutswa, khurhulitsaho vwooni vwa vaandu vanyiikhi.Aliitsa khukalukha lwa khaviri, shyikanyala khuva khukholakhu shiindu shyoosi khu vwooni taawe, navutswa khwitsa khuhonyinya yavo vamuliindiliraanga.