¹ Likhuuva likali lya khucheritsa khuvoola ni yili: khuli nu Mukali wa vasaliisi voosi yikhala haasi khu mukhono musaatsa kwi shisako shyu vwaami vwa Nyasaaaye Uli Ikulu khu Vyoosi mwikulu. ² Arhumikhaanga Havuundu Hali Hatakatiifu Heene, khuli muakali wa vasaliisi voosi , nakhwo khu voola ,liheemo lya tooto lyumbakhwa nu Mwaami Nyasaaye, navutswa shilinyala khuva lyumbakhwa na vaandu taawe. ³ Vuli mukali wa vasaliisi voosi, arhovolwaangwa khuhaana vihaanwa khu vwaali, khaandi khukhola milukha.Khulwa yako, Mukali wa vasaliisi voosi weerhu, khutuukha avekhu khaandi ni shiindu shyu khuhaana. ⁴ Niiva Kristo yakhavele khwilova hunu nuunundi, shyiyakhaveere musaliisi khali hati heene taawe shichira khuli lwa vasaliisi vahanaanga vihaanwa khulondekhana khu malako. ⁵ Muhiinsi kwa vakholaanga ku vusaaliiai, kuli khuli shiindu shyu muhinsi kwi viindu vikholekhaanga mwikulu; navutswa shyukhunyala khusasanyinywa khukwo taawe. Muhinsi kweene yoko nokwo mulala mweere kwa Muusa yakholaanga.Lwa Muusa yali nali hiimbi khuumbakha Liheema Litakatiifu, Nyasaaye ya muvoolera, "Chelitsa uloole ndi upiime vuli shiindu shyoosi khu londekhana khuli wamanyinywa khu shyikulu." ⁶ Navutswa nuunundi Yeesu umali khuheerwa muhiinsiro kwu vusaliisi kwu vunyali vunyiikhi khuvirha kwaavo, khuli lilakano lyayakhola haakari ha Nyasaaye navaandu veeve, lili ni tsingulu tsinyiikhi khuvirha vuli shiindu shyoosi ; shichira lyarhulana khu lilaaka lyi viindu vilahi vyeene. ⁷ Niiva lilakano lyali lyu khurhaanga, lya khaveere livula vutaamaanu, shyu khwakhaveere ni shivune shyu khuva ni lilakano lya khavili taawe. ⁸ Navutswa Nyasaaye yanyoola liiva litaamaanu mu vaandu , na voola, "Heensa matukhu kiitsaanga - yavoola Mwaami Lwa ndiitsa noombe lilako lyihya halala na vaana va Israeli na Yuda. ⁹ Lilakano lyeene yero , liliitsa khuva lyu khuvula khuhwa shiliitsa khuva khuli lilakano lya ndaloomba na vakuuka vaavo khu litukhu lya ndavarhulitsa mushivala shya Misiri; lwa vambakhana khutsyanyinya khu suuvira mu li lakano lya ndaloomba navo; khaandi nimbula khu vakhoonya. Inse Mwaami Nyasaaye mali khuvoola." ¹⁰ Mwaami Nysaaye avoolaanga : "Yili nalyo lilakano lya ndiitsa khu-- khola na Vaisraeli mu matukhu kiitsaanga Ndiitsa khuvaloomba vamanye malako kaanje, khaandi vakavikhe mu myooyo chyaavo. Ndiitsa khuva Nyasaaye waavo, navo viitsa vave vaandu vaanje. ¹¹ Muundu avulakhuho khuvo wiitsa khweechitsa mureende weewe, anoho amwaaavo weewe, nu khu muvoolera, "Umanye Mwaami Nyasaaye." Shichira voosi valiitsa khumanya inse Mwaami Nyasaaye, khuraanjira khu mutiitiiti khutuukha khu mukali mweene. ¹² Ndiitsa vasamiiha khurhula mu vwooni vwaavo khaandi shyindiitsa nditsukhitsakhu vutaamaanu vwa viitsa vave ni vakhola." ¹³ Lwa Nyasaaye alomolomaanga makhuuva khu londekhana khu lilakano "lyihya", kamanyinyaanga ndi lilakano lyu khurhaanga, lyali ni lyaavirha matukhu, lyivula vukhonyi vwoosi, khaandi lyasaakhula na lili hiimbi khukorhitswa khu vwaangu yuvu.