¹ Melikitsedeki wuyu naye yali Mwaami wa Salemi khaandi musaliisi wa Nyasaaye Uli Ikulu khu Vyoosi.Yakaana na Aprahamu, lwa yali na rhulaanga mu liihe, ni ya khakuurha vaami vane; khaandi na mukaasitsa. ² Apurahamu na muha shyitonye shyilala mu likhomi khurhula khu viindu vyoosi, vya yali na yaayi iweene yeeyo.Khurhaanga likalukhanyinya lyi lyiira lyeelye livoola. "Mwaami wi likhola lyu vuluunji" Lyiira lyeelye livoolaanga khaandi"Mwaami ulerhaanga Mireembe," shichira yali Mwaami wa Salemi.) ³ Khu vulakhuho ha vahaandiika shiindu shyoosi khu londekhana na paapa anoho maama anoho mulala khu va kuuka va Melikitsedeki.Avula lirhaanga lyi livulwa lyeelye khaandi avula livalwa lyi likhutsa lyeelye.Ali khuli Mwaana wa Nyasaaye, Melikitsedeki, alatsiririra khuva musaliisi mihika ni mihika. ⁴ Lolikhu , khuli Melikitsedeki yali wi tsingulu muno.Khali kuuka weerhu, yali ni ya manyikhana yalaangwangwa Aprahamu, ya murhulitsila shitonye shilala mu likhomi khu vuli shiindu yali na yaayi mu vulwaani. ⁵ Malako keechitsaanga ndi khali vitsukhululu va Leevi nivaviikhwa vasaliisi khutuukha valiitsa khuhaana shitonye shilala mu likhomi khurhula khu vaandu;nakwo khuvoola, khu vaandu voovo veene, khali niiva vaandu vaavo ni vitsukhululu vya Aprahamu. ⁶ Navutswa Melikitsedeki, shyi yali mwitsukhulu wa Leevi taawe.Navutswa Abrahamu ya muha shitonye shilala mu likhomi khurhula khu viindu vyoosi, vya yali na yaayi.Melikitsedeki yakaasitsa Aprahamu, muundu yali ni yanyoola lilaaka lya Nyasaaye. ⁷ Vuchira khuhayahayitsa, khwamanya ndi muundu ukasitsaanga wundi avetsaanga naye witsingulu tsinyiikhi khuvirha wa avetsa na kasitsaanga. ⁸ Vasaliisi vaheelwaanga shitonye shilala mu likhomi khurhula khu viindu , vya vaandu vanyoolaanga. Navutswa vasaliisi voosi vakhutsaanga, niikhali Melikitsedeki, shyi yakhutsa taawe; khaandi Mahaandiiko Matakatiifu keechitsaanga ndi ashiri mwooyo. ⁹ Khunyala khuvoola, lwa Aprahamu yarhuunga shitonye shilala mu likhomi, Leeevi (wa vitsukhululu veeve, vanyoola shitonye shilala mu likhomi) yarhunga shitonye shilala mu likhomi khaandi. ¹⁰ Khunyala khu voola, Leevi nashiri khwiivulwa , kali kamanyikhana aliitsa khwivulwa mu vaandu vwu luhya lwa kuuka weewe Aprahamu, yali niyakaana na Melikitsedeki. ¹¹ Niiva lirhweehitswa lyu khuloomba muundu khuva museretse vwa khanyoolekhe khuvirhila mu vusaaliisi vyi vitsukhulu vya Valeevi (shichira munyiinga yaavo vaandu vanyoola Malako, shyu kwakhavere ni lyeenya liindi lyu vusaaliisi vuundi khwansilwa khu Melikitsedeki, khuvirha khuva nu musaaliisi wuundi urhulaanga mu vaandu vyi insu yu musaliisi Haruni. ¹² Niiva vurhovoli vwu musaliisi, vunyala khu kalukhanyinywa ,khaandi malako kwu vurhovoli vwu vusaliisi khutuukha ka kalukhanyinywe. ¹³ Mwaami weerhu,wa vavoola viindu yivi khulondekhana khu , yarhulaanga mu vaandu vu luhya luundi vutswa , khaandi muundu avulakhuho warhula mu vaandu vwu luhya lweene yolo,wakholakhu muhiinsi khu vwaali. ¹⁴ Kamanyikhana havulavu ndi Mwaami weerhu yivulwa mu vaandu vuluhya lwa Yuda; khaandi khurhulana khu yako, Muusa avulakhu shiindu shyoosi, shya ya lomoloma khu londekhana khu luhya lweene yolo, lwa ya lomoloma makhuuva khu londekhana khu vusaaliisi. ¹⁵ Makhuuva ka khuvooli khali kanyalikhana havulavu munjira indahi, musaliisi lukanu lundi umali khulolekha uli munjila indala yeene khuli Melikitsedeki. ¹⁶ Shyi kanyala khuva yakholwa khuva musaliisi, shichira malako ka vaandu, navutswa khuvirhila mu tsingulu tsyu vulamu vukhaweetsaanga taawe. ¹⁷ Mahaandiiko Matakatiifu kavoolaanga,"Ulava musaliisi wi mihika ni mihika, munjila indala yeene khuli Melikitsedeki." ¹⁸ Lilako lyali lya khale shyi lya viikhwa haluveka shichira vutetekhere nu khuvula vukhonyi vwoosi vweene khali hati --- ¹⁹ nikhali khaandi Malako ka Muusa karamilwa khuloomba shiindu shyoosi khuva shiseretse .Khu lweeneyulu lisuuviritswa lilahi lyeene lyahaanwa, lichiraanga nu khwisuunda hiimbi khu Nyasaaye. ²⁰ Vusaaliisi vwa Valawi vwali vichira lisuuhitswa! Khwaliho na vasaliisi vakholwa khuva vasaliisi vuchira lyisuhitswa lyoosi, ²¹ navutswa Yeesu yakholwa khuva musaliisi khu virhila mu lyisuuhitswa lya Nyasaaye yamuvoolera, "Mwaami umali khwiisuuha khaandi shyaliista khu kalukhanyinya khu tsinganakani tsyeetsye taawe: Ulava musaliisi wi mihika ni mihika." ²² Lyisuuhutswa yili lileraho vwavukhani, khaandi vuloomba Yeesu khuva shimanyinyiro shya tooto shyi lilako lilahi. ²³ Vwavukhani vuundi , navwo yuvu: Khwali na vasaaliisi vaandi vamyiikhi khuli veene yavo, shichira vakhutsa khaandi shivatsirira nu muhiinsi kwaavo ku vusaaliisi taawe. ²⁴ Navutswa shichira Yeesu ali mwooyo mihika ni mihika, muhiinsi kweekwe ku vusaaliisi, shyu kunyala khuherwa wuudi taawe. ²⁵ Khu lwayako Yeesu ali nu vunyali vwu khuhonyinya yavo visuundaanga khu Nyasaaye khuvirhila muye, shichira ali mwooyo mihika ni mihika, na avasaviraanga khu Nyasaaye avakholere ka venyaanga. ²⁶ Kali nu vulahi khuva nu Mukali wa vasaliisi voosi khuli mweene woyo, shichira naye Mutakatiifu , avula khu imbala yoosi khaaandi yahulilwa haluveka khurhula mu vaandu vooni, khaandi yaheerwa luyali khuvirha shya shiindu shyoosi mwikulu. ²⁷ Shyali khuli Mukali wa vasaliisi voosi vaandi taawe; shyanyala khuhola mulukha vuli litukhu khurhuunga, shichira vwooni vweevwe khaandi shichira vwooni vwa vaandu taawe.Yakhola mulukha lulala, lulala lwoonyene vutswa, lwa yihaana mweene khukhutsa. ²⁸ Ni kyirikali, Malako ka Muusa kachilaanga vaandu vatetekhere, varhovolwa khuva vakali va vasaaliisi voosi; navutswa lilaka lya Nyasaaye yaloomba khuvirhila mu lisuuhitswa, lyalolekha malako ni kashiri khutuukha, lirhovola Mwaana, na kholwa khuva museretse mihika ni mihika.